47
Tupàn uze'eg Piri ywy rehe har wanehe Zeremi pe
1 Ezit ywy rehe har wanuwihawete uzàmàtyry'ym Kaz tawhu oho. A'e 'ym mehe we Tupàn Tuweharupi Wiko Ma'e uze'eg ihewe Piri ywy rehe har wanehe.
2 — Pexak nehe.
Ywy kwarahy heixe haw awyze har kutyr har rehe uzeupir 'y iko.
A'e wi uwyryk putar yrykawhu ài
tyhu haw 'ar rehe zàwenugar ài.
Upyk putar ywy nehe.
Upyk putar ywy rehe har paw wà nehe no:
Tawhu wà, wapupe har wà no.
Uhapukaz upyro àwàm henoz pà wà nehe.
Ko ywy rehe har paw heiheihem putar wahy haw pupe wà nehe.
3 Kawaru wapy uwànoànog putar wà nehe. A'e teko wenu putar wànoànog mehe wà nehe.
Wenu putar ywyramawa zeàmàtyry'ymawhu pe har wà nehe no.
Wànoànog putar wà nehe.
Awa nuzewyr kwaw wa'yr wapiaromo wà nehe. Ta'e wazywa na'ikàg kwaw wà xe. U'ar putar wà nehe.
4 Uhem Piri ywy rehe har waiwy imumaw paw 'ar kury.
Xir tawhu pe har wà, Xitom pe har wamyrypar wà no,
omono kar putar uze'eg umyrypar wanupe wà nehe. — Urepytywà pe nehe ty wà, i'i putar wanupe nehe.
Uhem a'e 'ar kury. A'e 'ar mehe napytywà kar kwaw wamyrypar wanupe ihe wà nehe.
Ihe Tupàn Tuweharupi Wiko Ma'e amumaw putar Piri ywy rehe har ihe wà nehe.
Amumaw putar Kereta yrypypo'o wi ur ma'e kwer ihe wà nehe no.
5 Teko Kaz tawhu pe har uzemumikahy wà.
Akerom tawhu pe har nuze'eg kwaw wà.
Piri ywy rehe har ywy rehe upyta ma'e kwer wà, Màràn 'ar umumaw putar uzai'o pà wà nehe.
6 Pehapukaz nezewe.
— Tupàn itakihepuku, Ma'e 'ar mehe erepytu'u puruzuka re nehe.
Ezewyr neapirer pe nehe.
Epyta a'e pe nepytu'u pà nehe, peze peiko.
7 Màràzàwe tuwe takihepuku hereko har upytu'u putar nehe.
Azapo kar ima'ereko haw izupe ihe.
— Ezàmàtyry'ym Akerom tawhu nehe, a'e izupe.