60
Zeruzarez pyahu ma'e ipuràg eteahy haw
1 Epu'àm nehe, Zeruzarez.
Tuwe neruwa heny katu nerurywete haw rehe nehe,
ta'e neratainy uhem kwez kury xe.
Tupàn Tuweharupi Wiko Ma'e ikàgaw ipuràg eteahy haw uhyape katu iko penehe a'e kury.
2 Pytunaw upyk ywy.
Teko wiko pytunaw rehe wà.
Tupàn Tuweharupi Wiko Ma'e hatainy uhyape katu iko nerehe a'e.
Tupàn ikàgaw ipuràg eteahy haw uzexak kar ne'aromo.
3 Teko ywy nànànar ur putar newe wà nehe, Zeruzarez,
ta'e neratainy ipuràg eteahy putar wanupe a'e nehe xe.
Ne'ar ipyahu ma'e heny haw
umur kar putar tuwihawete tetea'u newe wà nehe.
4 Zeruzarez. Eme'e nezeiwyr nehe. Exak uzeapo romo ma'e nehe.
Nera'yr uzewyr wà waiko wà. Uhem wà waiko wà.
Muite wi nera'yr wanur wà.
Nerazyr ur waiko uhy wazywa rehe wà no.
5 A'e ma'e hexak mehe erehyape katu putar nerurywete haw rehe nehe.
Nezà'à ututukahy putar nerurywete haw rehe nehe.
Teko yryhu ikupe kutyr har ur putar wà nehe.
Werur putar wemetarer paw newe wà nehe. Werur putar uma'e paw newe wà nehe no.
6 Teko Minià ywy rehe har wà nehe, Epa ywy rehe har wà nehe no, ur putar
kawaru kupewa'a tetea'u wanerur pà wà nehe. Werur putar ma'e tetea'u wakupepe wà nehe.
Teko Xawa ywy rehe har ur putar wà nehe no.
Werur putar itazu or wà nehe. Werur putar yhyk hyàkwegatu ma'e wà nehe no.
A'e paw umume'u putar Tupàn Tuweharupi Wiko Ma'e hemiapo kwer ikàg ma'e a'e wà nehe.
7 Teko werur putar àràpuhàràn hawitu ma'e Kenar ywy wi wà nehe, Nawaiot ywy wi wà nehe no.
Uzuka putar weimaw wanapy pà
ma'ea'yr hapy haw rehe Tupàn henataromo wà nehe.
Omono putar izupe imurywete kar pà wà nehe.
Tupàn Tuweharupi Wiko Ma'e
umupuràg eteahy wera'u putar wàpuzuhu ipuràg ma'e a'e nehe no.
8 Amo kanuhu ur waiko ywàkun uwewe ma'e ài wà. Ma'e wi wanur wà.
Nuzawy kwaw pykahu uker haw pe uzewyr ma'e wà.
9 Muite wi a'e kanuhu wanur a'e wà.
Uhua'u wera'u ma'e ur amo wanenataromo wà.
Werur Tupàn hemiaihu wanereko waiwy rehe wà.
Werur itaxig parat wà. Werur itazu or wà no.
Wazar omono putar a'e ma'e Tupàn Ikatuahy Ma'e Tuweharupi Wiko Ma'e Izaew wazar pe a'e wà nehe.
Tupàn umur ukàgaw upuràg eteahy haw peme a'e. Peiko hemiaihu romo.
10 Tupàn Tuweharupi Wiko Ma'e uze'eg Zeruzarez pe.
— Teko amo ae ywy rehe arer uzapo wi putar nepàrirogaw iaiha ma'e tàtà ma'e a'e wà nehe.
Wanuwihawete uma'ereko putar newe wà nehe no.
Aikwahy ihe, a'e rupi azepyk nerehe.
Nezewe rehe we uruamutar katu ihe. Urupuhareko katu no.
11 Nuzewàpytym pixik kwaw nerukenaw nehe.
Ni 'aromo ni pyhaw nehe.
A'e rupi ywy nànànar wanuwihaw upuner putar wemiruze'eg wanerur pà newe wà nehe,
wemetarer herur pà newe wà nehe no.
12 Teko amo ywy rehe har a'e wà nehe, aze nuiko kwaw neremiruze'eg romo wà nehe, amumaw putar a'e teko ihe wà nehe.
Aityk putar a'e teko azeharomoete ihe wà nehe.
13 Heta ywyra ikatuahy ma'e Irimano ywy rehe.
Na'aw her xe: xiperet, piner, zimiro.
Teko werur putar agwer ywyra newe wà nehe.
Nezewe mehe umupuràg eteahy wera'u kar putar heràpuzuhu ipupe a'e wà nehe.
Amupytu'u kar hepy a'e pe ihe.
14 Amo tuwihaw upuraraw kar ma'erahy newe wà, ikatu 'ym ma'e iapo pà newe wà. Wana'yr ur putar newe wà nehe no.
Wapyk putar upenàràg rehe nerenataromo wà nehe.
Nerehe uze'eg zemueteahy ma'e kwer paw ur putar newe wà nehe no.
Umuhyk putar uwa ywy rehe nerenataromo wà nehe.
— Tawhu Tupàn Tuweharupi Wiko Ma'e heko haw, i'i putar newe wà nehe.
— Ywytyr Xiàw her ma'e Izaew wazar Ikatuahy Ma'e henaw, i'i putar newe wà nehe no.
15 Teko upytu'u putar nerehe wakatuwawahy 'ym ire wà nehe. Na'iakatuwawahy wi pixik kwaw wà nehe.
Nereiko pixik kwaw tawhu teko heta 'ym ma'e romo nehe. Tuweharupi heta putar nepupe wiko ma'e wà nehe.
Urumupuràg eteahy kar putar ihe nehe. Upuner ma'e romo urumuigo kar putar nehe no.
Ereiko putar tawhu hurywete ma'e romo tuweharupi nehe.
16 Amo ae ywy rehe har a'e wà nehe, wanuwihawete a'e wà nehe no, uzekaiw putar nerehe a'e wà nehe.
Wiko putar kuzà umemyr pe ukamy imono har ài newe wà nehe.
Nezewe mehe erekwaw putar Tupàn Tuweharupi Wiko Ma'e nepyro har romo hereko haw nehe.
Erekwaw putar Izaew wazar Upuner Ma'e nemekuzar har romo hereko haw nehe no.
17 Narur kwaw itazu morog newe nehe, arur putar itazu or newe nehe.
Narur kwaw itaper newe nehe, arur putar itaxig parat newe nehe.
Arur putar itazu morog itaper rehe we nehe, ywyra hekuzaromo nehe, ita hekuzaromo nehe no.
Zeàmàtyry'ym 'ymaw amuigo kar putar neruwihawete romo ihe nehe.
Ureruze'eg kar putar ikatu haw pe ihe nehe no.
18 Teko nuzuka pixik kwaw amo teko neywy rehe wà nehe.
Zauxiapekwer numumaw pixik kwaw neywy wà nehe. Nuweityk pixik kwaw neràpuz wà nehe.
— Purupyro haw, ere putar nepàrirogaw pe nehe.
— Tupàn ikatu haw imume'u haw, ere putar nerukenaw pe nehe.
19 Kwarahy nuhyape katu pixik kwaw 'ar romo nehe.
Zahy nuhyape pixik kwaw pyhaw nehe,
ta'e ihe Tupàn Tuweharupi Wiko Ma'e aiko putar tatainy newe tuweharupi har romo ihe nehe xe.
Hepuràg eteahy haw hekàgaw uhyape katu putar nerehe nehe.
20 Aiko putar kwarahy romo newe nehe, aiko putar zahy romo newe nehe no.
Aiko putar kwarahy wixe pixik 'ym ma'e romo nehe, aiko putar zahy uhyape re upytu'u pixik 'ym ma'e romo nehe no.
Ahyape katu putar nerehe tatainy ài tuweharupi nehe.
Pezemumikahy haw i'ar upaw putar nehe.
21 Teko nepupe har wiko ma'e uzapo putar ikatu ma'e a'e wà nehe.
Tuweharupi ereiko putar Ywy Imume'u Pyrer izar romo nehe.
A'e teko wiko ma'eà'yz heremitygwer ài wà.
Hepo pupe azapo ihe wà,
ta'e hepurexak kar wer hekàg wera'u haw rehe purupe ihe xe.
22 Naheta tete kwaw wà kury. Heta tetea'u putar wà nehe.
Teko ko ywy rehe har na'ikàg kwaw wà. Ikàg wera'u putar amo teko wanuwi upaw rupi katete a'e wà nehe.
Aiko Tupàn Tuweharupi Wiko Ma'e romo ihe.