57
1 Teko ikatu ma'e umàno wà.
Ni amo nuzekaiw kwaw wamàno haw rehe wà.
Ikatu ma'e ukàzym wà.
Ni amo nuexak kwaw waho haw wà.
Ikatu 'ymaw nupuner kwaw ikatu 'ym ma'e iapo haw rehe wanupe.
2 Nezewe rehe we ikatu ma'e wexak putar zeàmàtyry'ym 'ymaw a'e wà.
Ikatu haw rehe wiko ma'e
upytu'u katu utymaw pupe wà.
Tupàn uzepyk tupàn ua'u imuwete har wanehe
3 Tupàn Tuweharupi Wiko Ma'e uze'eg nezewe.
— Paze ma'e imemyr wà, kuzàwyzài puhe uker ma'e wà, kuzàwyzài wà,
pezur xe nehe.
Amume'u putar penemiapo kwer penehe hezepyk pà ihe nehe.
4 Mo rehe pepuka peiko.
Mo rehe peze'eg urywahyahy peiko penuwarurywete mua'u pà.
Ikatu 'ym ma'e iapo har romo peiko. Peiko hemu'em ma'e romo.
5 Pepyta ywyra i'àgaw iwy pe.
A'e pe pezemono iaiw ma'e iapo haw pe.
Peker kuzàwyzài wapuhe tupàn a'ua'u wamurywete kar pà. — Nezewe mehe umuezuz kar zaneremi'u ràm wà nehe, peze pezeupe. — Nezewe mehe zanemupurumuzàg kar putar wà nehe no, peze pezeupe.
Itakwaruhu yrykaw huwake har pupe
pezuka pena'yr tupàn a'ua'u wamuwete pà pe wà.
6 Pepyhyk ita ihym ma'e yrykaw pupe har tupàn a'ua'u penemimuwete romo wamuigo kar pà pe wà no.
A'e re pemono win wanupe.
Pemono arozràn wanupe wamuwete pà no.
— Nezewe haw zaneremiapo ikatu Tupàn Tuweharupi Wiko Ma'e pe a'e, peze peiko ihewe aipo.
7 Peho ywytyruhu apyr
iaiw ma'e iapo pà.
Pemono ma'e tupàn a'ua'u wanupe a'e pe no.
8 Pemuapyk tupàn a'ua'u penemiapo kwer iro ma'e
penàpuz ukenaw ikupe kutyr pe wà.
Peneharaz ihewi. Pezo'ok pekamir.
Pe'aw peker haw rehe penemimutar wapuhe.
Pemono penemetarer wanupe pepuhe wapyta haw hekuzaromo.
Nezewe mehe pezapo penemimutar iaiw ma'e.
9 Pepyhyk uri kawer. Pepyhyk kàpuhàg hyàkwegatu ma'e tetea'u no.
A'e re pemuwete tupàn ua'u Morok her ma'e peho.
Pemono kar peze'eg heraha har ywy nànàn wà, tupàn a'ua'u penemimuwete ràm wanekar kar pà wanupe wà.
A'e ze'eg heraha har oho te umàno ma'e kwer wapyta haw pe wà.
10 Pekene'o, ta'e peata tetea'u pe xe.
Nezewe rehe we napepytu'u kwaw.
Tupàn a'ua'u wanagapaw hemuhuhuk kar har omono ukàgaw peme wà.
A'e rupi napepytu'u kwaw.
11 Pekyze tuwe a'e tupàn a'ua'u wanuwi.
Mo romo wanekon wà.
Màràzàwe tuwe penemu'em ihewe.
Màràzàwe tuwe peneharaz tuwe ihewi.
Amumaw kwarahy tetea'u heze'eg 'ym pà.
Aipo a'e rupi peneharaz ihewi. Aipo a'e rupi napekyze kwaw ihewi.
12 Aexak kar putar penemiapo kwer teko nànàn ihe nehe.
Ikatu penemiapo peme.
Azeharomoete na'ikatu kwaw ihewe ihe.
13 Pehapukaz putar pepytywà àwàm henoz pà ihewe nehe.
A'e 'ar mehe tupàn a'ua'u penemimuwete tetea'u napenenu kwaw a'e wà nehe.
Ywytu weraha putar a'e tupàn a'ua'u muite xe wi wà nehe.
Pitài ipy haw umukàzym kar putar wà nehe.
Herehe uzeruzar ma'e wiko putar ywy heremimume'u kwer rehe wà nehe.
Ywytyr ikatuahy ma'e herenaw uzeapo putar waneko haw romo nehe.
Tupàn upurupuhareko haw
14 Tupàn Tuweharupi Wiko Ma'e uze'eg nezewe.
— Pemuàgà'ym pe heremiaihu waho àwàm nehe. Pemuhygatu wanape ràm nehe.
Nezewe mehe heremiaihu upuner putar ihewe uzewyr haw rehe wà nehe,
i'i Tupàn.
15 Tupàn Ikatuahy Ma'e Ywate Wera'u Ma'e a'e,
Tupàn Tuweharupi Wiko Ma'e a'e, uze'eg a'e.
— Hereko haw upyta ywate a'e. Ikatuahy a'e, ikatu 'ymaw wi imunyryk pyrer romo hekon a'e.
Aiko ikàg 'ym ma'e wainuinuromo ihe no. Aiko ma'erahy ipuraraw par wainuinuromo ihe no.
Nezewe mehe àro kar ikatu ma'e ikàg 'ym ma'e wanupe.
Amono wakàgaw ipyahu ma'e ma'erahy ipuraraw par wanupe no.
16 Namume'u wi wi kwaw heremiaihu wanemiapo kwer ikatu 'ym ma'e ihe nehe, wanupe ihe nehe.
Naiko kwaw wikwahy ma'e romo tuweharupi hepytu'u 'ym pà nehe.
Aze mo aikwahy hepytu'u 'ym pà, umàno mo wikuwe ma'e heremiapo kwer upaw rupi wà.
Ihe ae azupy wanehe wamuigo kar pà wikuwe ma'e romo upaw rupi ihe.
17 Aikwahy heremiaihu wanupe. Azepyk wanehe no ta'e uzapo ikatu 'ym ma'e wà xe.
Hewyrowyroahy amo wama'e rehe wà no.
Atyryk wanuwi ta'e aikwahy ihe xe.
Nezewe rehe we wiko wi wi uzauzarahy ma'e romo wà.
Oho wi wi wape rupi wà no.
18 Aexak wanemiapo kwer.
Nezewe rehe we amukatu putar ihe wà nehe.
Araha putar pe ikatu ma'e rupi ihe wà nehe no.
Amurywete kar putar wazemumikahy re ihe wà nehe.
19 Amono putar ze'eg hekatu haw rehe har ihe nehe uzai'o ma'e wazuru pe ihe nehe.
Amume'u waàmàtyry'ym 'ym àwàm teko nànàn ihe, teko muite har wanupe, teko muite 'ymar wanupe no.
Amukatu putar ihe wà nehe.
20 Ikatu 'ym ma'e nuzawy kwaw yryhu ykotokuhu hereko har wà:
Nupytu'u kwaw ykotok ire.
Werur to'om ywy rehe. Werur ipihe haw hehe no.
21 Naheta kwaw wapyro àwàm a'e ikatu 'ym ma'e wanupe nehe.