IZAI 3

Tupàn uzepyk Zeruzarez pe har wanehe

1 Peme'egatu nehe.

Zanezar Tupàn Tuweharupi Wiko Ma'e Ikàg Wera'u Ma'e upyro putar wanemi'u ràm paw Zeruzarez wi Zuta ywy wi a'e nehe.

Naheta kwaw ma'e wanupe nehe.

Ni temi'u ni 'y naheta kwaw wanupe nehe.

2 Upyro putar teko ikàg ma'e paw a'e wi wà nehe:

awa ukyze 'ym ma'e wà, zauxiapekwer wà,

pureruze'eg ma'e wà, Tupàn ze'eg imume'u har wà,

ma'e uzeapo ma'e ràm imume'u har wà, ma'e kwaw katu har wà,

3 Zauxiapekwer wanuwihaw wà, teko wanuwihaw wà, teko waneruze'egar wà, paze ma'e paw wà.

Upaw rupi upyro putar a'e wi wà nehe.

4 Tupàn Tuweharupi Wiko Ma'e wexaexak putar kwarer wà nehe, wemiaihu wanuwihaw romo wà nehe.

(Uzapo putar wemimutar kwarer ài wà nehe. Nupureruze'egatu kwaw wà nehe).

5 Teko paw uzeàmàtyry'ym putar wà nehe.

Teko paw imunar putar wapi har ma'e rehe wà nehe.

Kwàkwàmo nuzeruze'eg kwaw tua'uhez kwer wanehe wà nehe.

Teko ikatu 'ym ma'e uze'eg zemueteahy putar teko imunar 'ym ma'e wanehe wà nehe.

6 A'e 'ar mehe amo teko upyhyk putar wànàm nehe, nezewe izupe uze'eg pà nehe. — Heta kamir newe. Ezur ureruwihaw romo nereko pà nehe. Epureruze'eg 'àg ywytyr tàpuz heityk pyrer romo iapo pyrer rehe nehe, i'i putar izupe wà nehe. 7 Inugwer uwazar putar waze'eg wanupe nehe. — Napuner kwaw nepytywà haw rehe. Naheta kwaw temi'u ihewe. Ni kamir naheta kwaw heràpuz me. Nahemuigo kar kwaw pe zaneànàm wanuwihaw romo nehe, i'i putar wanupe nehe.

8 Zauxiapekwer weityk Zeruzarez imumaw pà wà.

Zuta ywy rehe weityk taw paw wà.

Teko uzapo ikatu 'ym ma'e wà. Teko umume'u ikatu 'ym ma'e wà.

Nezewe mehe nuweruzar katu kwaw Tupàn Tuweharupi Wiko Ma'e wà. Ikàg a'e, Ipuràg eteahy a'e no.

Wanemiapo kwer iro henataromo wà.

9 Wereko katu amo teko wà.

Nuwereko katu kwaw amo wà.

Teko nuzuawygatu kwaw wanenataromo wà.

A'e rupi xixak wakatu 'ymaw zane.

Nuzeàmim kwaw iaiw ma'e iapo mehe wà. Nuzawy kwaw Xotom tawhu parer wà, numim kwaw ikatu 'ym ma'e wemiapo wà.

Tuwe uzemumikahy wà nehe ta'e wakatu 'ymaw werur putar Tupàn zepykaw wanehe nehe xe.

10 Hurywete teko imunar 'ym ma'e wà.

Waneko àwàm ikatuahy putar nehe.

Wanemipyhyk ràm temetarer uhyk putar wanupe nehe.

Uma'ereko haw hekuzar uhyk putar wanupe nehe.

11 Tuwe ikatu 'ym ma'e uzemumikahy wà nehe. Waneko haw na'ikatu kwaw nehe.

Uzapo ikatu 'ym ma'e amogwer wanupe wà.

Nezewegatete amogwer uzapo putar ikatu 'ym ma'e wanupe wà nehe no.

12 Kwarearer weruze'eg heremiaihu waiko wà,

kuzàgwer upureruze'eg wà.

Heremiaihu wà, penuwihaw hemu'em waiko peme wà.

Pemuata kar pe ikatu 'ym ma'e rupi wà.

13 Tupàn Tuweharupi Wiko Ma'e nuapyk putar wenaw ikatu ma'e rehe nehe.

Umume'u putar wemiaihu wanemiapo kwer nehe, ikatu 'ym ma'e wanehe uzepyk pà nehe.

14 Uze'eg putar nezewe pureruze'eg ma'e wanupe tuwihaw wanupe a'e nehe,

wanemiapo kwer imume'u pà a'e nehe.

— Pe ae pemumaw Izaew pe wà.

Nuzawy kwaw uwà tyw ihewe wà.

Penàpuz tynehem ma'e pupe ko 'ar rehe. Pemunar a'e ma'e rehe hemetarer 'ym ma'e wanuwi.

15 Mo uzuhaw kar heremiaihu peme wà.

Mo pemumunar kar ma'e hereko 'ymar wama'e rehe, i'i putar wanupe nehe.

Zanezar Tupàn Tuweharupi Wiko Ma'e Ikàg Wera'u Ma'e

uze'eg iko a'e.

Tupàn uze'eg ahyahy kuzàgwer Zeruzarez pe har wanehe

16 Nezewe uze'eg Tupàn Tuweharupi Wiko Ma'e.

— Peme'e kuzà Zeruzarez pe har wanehe nehe. — Hepuràg eteahy ihe, i'i wà. — Apuner tuwe ihe, i'i wà.

Upir uxi wata pà tuwihaw ài wà.

Uwakahy amo wanehe ume'e mehe wà.

Wata mehe wata pe'ipe'i wà.

Ma'e wapyakazaw har ipuipu wata mehe.

17 A'e rupi ihe Tupàn Tuweharupi Wiko Ma'e azepyk putar wanehe ihe nehe, Azupin putar wàkàg ihe wà nehe.

Amuigo kar putar iapyterew ma'e romo ihe wà nehe, i'i Tupàn.

18 A'e 'ar mehe zanezar o'ok putar kuzà Zeruzarez pe har wamupuràg eteahy kar haw paw wanuwi nehe. Uzàpixipixi a'e ma'e upyakaza rehe wà, wàkàg rehe wà no, mu'yr iazuromo har rehe wà no, 19 wanami por no, wapoapy rehe har no. Upyro putar pàn wanuwamimaw nehe no. 20 Upyro putar wazapew nehe. Upyro putar wamupuràgaw wazywa rehe har nehe no. Upyro putar waku'aw har nehe, pàn wanetekwer ahaw paw nehe no. Upyro putar kàpuhàg hyru por wanuwi nehe. Upyro putar ma'e tekwe henoz taw wanuwi nehe no. 21 Upyro putar wakwàku'aw har nehe. Upyro putar iapu'a ma'e waxi rehe har nehe no. 22 Upyro putar wanopoz hekuzar katu ma'e wanuwi nehe. Upyro putar pàn waxi'ywpykaw wanuwi nehe no. Upyro putar waxi'ywànaw wanuwi nehe. Upyro putar wama'e ryru wanemiraha wanuwi nehe no. 23 Upyro putar wanopoz uzepyixak katu ma'e nehe no. Upyro putar pàn irin iapo pyrer nehe. Upyro putar pàn wàkàg iwànaw nehe. Upyro putar waxi'ywànaw wanuwi nehe no. Upaw rupi wama'e upyro putar wanuwi nehe.

24 Nuwata kwaw kàpuhàg hyàkwegatu ma'e hereko pà wà nehe. Inemahy putar wà nehe. Numunehew kwaw uku'aw har ikatu ma'e wà nehe. Kyhàhàm iànàm ma'e pupe uzàpixipixi putar wopoz wà nehe. Numuguz katu kwaw wà nehe. Iapyterew putar wà nehe. Numunehew kwaw opoz hekuzar katu ma'e wà nehe. Umunehew putar pàn iànàm ma'e ma'e ryru iapo pyr wà nehe. Ko 'ar rehe ipuràg eteahy wà. A'e 'ar mehe iro putar wà nehe. Imaranugar putar upuràg haw 'ym rehe wà nehe.

25 Zauxiapekwer uzuka putar awa Zeruzarez pe har zeàmàtyry'ymawhu pe a'e wà nehe, te ipuruzukaiw wera'u ma'e umàno putar wà nehe. 26 Tawhu pe har uzai'o putar wà nehe.

Nuzawy kwaw kuzà heityk pyrer ywy rehe wapyk ma'e wà nehe.

<- IZAI 2 IZAI 4 ->