1 Tupàn ze'eg imume'u har Amakuk her ma'e uze'eg putar Tupàn pe kury. Na'aw ize'eg awer xe kury.

2 — O Tupàn Tuweharupi Wiko Ma'e. Teko umume'u neremiapo kwer ihewe wà.

Akyze katu teko ihe kury.

Kwehe mehe erezapo purumupytuhegatu kar haw. Ezapo wi agwer ma'e ko 'ar rehe nehe kury.

Nezewe mehe urupuner putar hexakaw rehe ure nehe no.

Erekwahy iko ne.

Nezewe rehe we urepuhareko pe nehe.

3 Tupàn ur iko Enom ywy wi. Tupàn Ikatuahy Ma'e ur iko Pàrà ywytyr wi. Ikàgaw uhyape katu ma'e upyk ywak a'e. Ywy rehe har paw umume'u ikatu haw wà.

4 Heny katu tatainy ài.

Tatainy uhyape katu ipo rehe.

Ma'e pe teko uzeàmim putar ikàgaw wi wà. A'e ipo rehe uzeàmim ikàgaw a'e.

5 Ma'erahy ipuraraw paw oho waiko henataromo wà.

Ma'eahy haw puruzuka ma'e ur waiko haikweromo wà.

6 Aze upytu'u, ywy uryryryryz a'e.

Ume'e teko ywy nànànar wanehe. Ukyze katu a'e teko a'e mehe wà.

Ywytyr kwehe arer otohotohog wà.

Ywytyruhu kwehe arer u'au'ar wà.

Izypy mehe arer we Tupàn wata a'e ywytyruhu rehe.

7 Aexak teko Kuxà ywy rehe har wazeputupytupykahy mehe ihe wà.

Aexak teko Minià ywy rehe har wakyze katu mehe ihe wà no.

8 Aipo erekwahy yrykawhu wanupe, Tupàn Tuweharupi Wiko Ma'e.

Aipo erekwahy yryhu wanupe.

Aipo a'e rupi erezur nereimaw kawaru waku'az wà.

Aipo a'e rupi erezur neàmàtyry'ymar waneityk arer romo ywyramawa pupe.

9 Erepyhyk newyrapar.

Erezemuàgà'ym neru'yw imomor àwàm rehe.

Ereywykàz ywy 'y tetea'u uwyryk ma'e pupe.

10 Ywytyruhu nerexak wà. Na'e uryryryryz wà.

U'ar amo 'y tyapu ma'e ywak wi.

'Y ywy iwype har okororo wà.

'Ykotok aiha katu ma'e upu'àm wà.

11 Kwarahy a'e, zahy a'e no, upytu'u uhyape katu re wà,

neru'yw heny katu haw hexak mehe wà,

nepurukutukaw heny katu haw hexak mehe wà.

12 Nekwahy mehe ereata ywy nànàn.

Nekwahy mehe erepyrog teko ywy nànànar wanehe.

13 Erehem eho nereko haw wi neremiaihu wapyro pà,

tuwihawete neremixak kwer ipyro pà no.

Erekutuk ikatu 'ym ma'e wanuwihawete.

Eremumaw hehe we har zauxiapekwer paw wà no.

14 Ur ywytuàiw àmàn inuromo har ài ureàmàtyry'ym pà wà.

Erezuka zauxiapekwer wanuwihaw neru'yw pupe wanur mehe wà.

Wiko wera'u urewi wà, a'e rupi ipuruzuka wer urerehe wà.

Ikàg ma'e uzuka hemetarer 'ym ma'e, muite amogwer teko wanuwi ikwaw kar 'ym pà wanupe. Nezewe a'e zauxiapekwer ipuruzuka wer urerehe wà.

15 Ereapyk nereimaw kawaru waku'az ne, yryhu rehe neata pà ne.

Ykotok hehaite ma'e rehe ereata.

16 A'e ma'e henu mehe hepytuhegatu ihe.

Hereme uryryryryz hekyze mehe ihe.

Hekàgaw uhem ihewi.

Napuner kwaw hepy rehe hepu'àmaw rehe kury.

Nezewe rehe we àro putar Tupàn 'ar hezemumik 'ym pà nehe.

A'e 'ar mehe uzepyk putar ureàmàtyry'ymar wanehe nehe.

17 Aze pi 'yw na'i'a kwaw nehe,

aze uwà 'yw na'i'a kwaw nehe,

aze naheta kwaw uri ipo'o pyràm nehe,

Aze naheta kwaw arozràn ipo'o pyràm nehe,

aze naheta kwaw àràpuhàràn ka'api'i pe wà nehe,

aze naheta kwaw tapi'ak pari pupe wà nehe,

18 Nezewe rehe we amume'u putar Tupàn Tuweharupi Wiko Ma'e ikatu haw izupe nehe.

Herurywete putar Tupàn hepyro har rehe nehe.

19 Tupàn Tuweharupi Wiko Ma'e hezar wiko hekàgaw romo.

Hemuata katu kar arapuha ka'a pe har hehaite ma'e ài hemuigo kar pà.

Hereraha putar ywytyruhu rehe nehe.

Ikatuahy putar hereko àwàm a'e pe nehe.