EZEKIEW 32

Ezit wanuwihawete nuzawy kwaw zakare u'ytaw ma'e a'e

1 Uruikuwe ipyhyk pyrer romo amo ywy rehe ure.

12 haw kwarahy rehe 12 haw zahy rehe pitài haw 'ar mehe Tupàn Tuweharupi Wiko Ma'e umume'u ko ma'e ihewe kury.

2 Awa ta'yr,

Emuzàg zegar haw purutymaw rehe har nehe, Ezit rehe har wanuwihawete rehe nehe.

— Ereiko zàwàruhu iriàw ài ywy nànànar wainuinuromo.

Nerezawy kwaw zakare u'ytaw ma'e 'y yrykawhu pe har imokotokar.

Nepo pupe eremokotok 'y.

Eremupihun yrykawhu to'om pupe.

3 Teko tetea'u wazemono'og mehe urupyhyk putar hekyhapari pupe ihe wà nehe.

Amutyk kar putar kyhapari wanupe ywyxig kutyr ihe nehe.

4 Urezar putar ywy ikàg ma'e rehe nehe.

Uruityk putar ywy rehe nehe.

Na'e arur putar wiràmiri ywy nànànar ihe wà nehe, arur putar miar ywy nànànar ihe wà nehe no.

A'u kar putar nero'o kwer wanupe nehe.

5 Azupyk putar ywytyruhu neretekwer inem ma'e pupe nehe.

Azupyk putar ywyàpyznaw ipupe nehe no.

6 Azupyk putar ywy neruwykwer pupe nehe.

Upyk putar ywytyruhu nehe.

Umynehem putar yrykawhu nehe no.

7 Nezuka mehe nehe, azupyk putar ywak ihe nehe.

Amuwew putar zahytata ihe wà nehe no.

Azumim putar kwarahy ywàkun ikupe kutyr nehe.

Zahy nuhyape kwaw nehe.

8 Amuwew putar tatainy ywak rehe har paw rupi nehe.

Neywy upyta putar ipytunahy haw rehe nehe.

Ihe nezar Tuweharupi Wiko Ma'e aiko ko ma'e imume'u har romo.

9 Urumumaw putar nehe.

Amuhàmuhàz putar ko ze'eg ywy nànàn nehe.

Te ywy neremigwaw 'ym nànàn nehe.

— Màràzàwe tuwen aipo pa, i'i putar ywy tetea'u wanehe har wà nehe.

10 Ipytuhegatu putar newe heremiapo ràm hexak mehe wà nehe.

Hetakihepuku imumymumyz mehe wanuwihawete ukyzeahy putar wà nehe.

Ne'ar haw 'ar mehe uryryryryz putar ukyze pà wà nehe, umàno àwàm rehe ukyze pà wà nehe.

11 Zanezar Tuweharupi Wiko Ma'e uze'eg wi Ezit wanuwihawete pe.

— Mawiron wanuwihawete neàmàtyry'ym putar utakihepuku pupe nehe.

12 Apyhyk kar putar takihepuku zauxiapekwer tetea'u ywy ma'erahy ipuraraw kar har rehe har wanupe nehe.

Uzuka putar Ezit ywy rehe har tetea'u wà nehe.

Eremume'u nema'e ikatuahy haw purupe.

A'e zauxiapekwer umumew putar a'e ma'e paw wà nehe.

Uzuka neremiaihu wà nehe no.

13 Azuka putar nereimaw tapi'ak wai'u haw pe waneko mehe ihe wà nehe.

Naheta kwaw teko a'e 'y imuzipiw har romo wà nehe.

Ni tapi'ak a'e 'y imuzipiw har naheta kwaw wà nehe.

14 Amuapyk kar putar izi'y nehe.

Amuzepyxakatu kar putar nehe.

Amuyryk katu kar putar yrykawhu uzenu 'ym pà nehe.

Ihe pezar Tuweharupi Wiko Ma'e aiko ko ma'e imume'u har romo.

15 Azapo putar Ezit ywy ywyxiguhu romo ihe nehe.

Azuka putar a'e pe wiko ma'e ihe wà nehe no.

Wazuka mehe teko amogwer ywy rehe har ukwaw putar Tupàn Tuweharupi Wiko Ma'e romo herekuwe haw wà nehe.

16 Kuzà amo ywy rehe har umuzàg putar a'e zegar haw purutymaw rehe har wà nehe, Ezit rehe uzai'o mehe wà nehe, teko hehe har wanehe uzai'o mehe wà nehe.

Ihe pezar Tuweharupi Wiko Ma'e aze'eg kwez kury.

Wezyw Ezit umàno ma'e kwer wapyta haw pe wà

17 Uruikuwe ipyhyk pyrer romo amo ywy rehe ure. 12 haw kwarahy rehe pitài haw zahy rehe 15 haw 'ar mehe Tupàn Tuweharupi Wiko Ma'e umume'u ko ma'e ihewe kury.

18 — Awa ta'yr, Ezai'o teko Ezit ywy rehe har wanehe nehe. Heta tetea'u wà. Emuezyw kar umàno ma'e kwer wapyta haw pe ne wà nehe, amo ywy rehe har upuner ma'e wanupi ne wà nehe. 19 Emume'u ko ma'e wanupe nehe.

— Aipo pepuràg eteahy wera'u amo wanuwi. Nezewe rehe we pewezyw putar ikatu 'ym ma'e watym awer pupe pe'ar pà pezerew pà nehe.

20 Ezit ywy rehe har u'ar putar amogwer zeàmàtyry'ymawhu pe uzezuka ma'e kwer wanehe we wà nehe. Amo takihepuku uzemuàgà'ym Ezit ywy rehe har paw wazuka àwàm rehe. 21 Zauxiapekwer ukyze 'ym ma'e wà, Ezit wanehe we upuràmàtyry'ym ma'e wà no, umuixe katu kar Ezit ywy rehe har wà, umàno ma'e kwer wapyta haw pe waneixe mehe wà. Uhapukaz ko ze'eg imume'u pà wà. — 'Aw awa nuiko kwaw Tupàn rehe uzeruzar ma'e romo wà. Umàno zeàmàtyry'ymaw pe wà. Wezyw wà xe wà. Uzeàpàrirog xe wà kury, i'i wà.

22 Axir wiko a'e pe no. Hemiruze'eg zauxiapekwer watym awer upyta izywyr wà no. Zauxiapekwer uzuka a'e awa wà. 23 Watym awer upyta umàno ma'e kwer wapyta haw iwype wà. Hemiruze'eg zauxiapekwer paw umàno zeàmàtyry'ymaw pe wà. Watym awer upyta Axir itym awer izywyr wà. Umàno 'ym mehe we umuryryryryz kar wikuwe ma'e wà. 24 Eràw izuapyapyr wiko a'e pe wà. Hemiruze'eg zauxiapekwer watym awer upyta itym awer izywyr wà. Paw rupi umàno zeàmàtyry'ymaw pe wà. Nuzeruzar kwaw Tupàn rehe wà. Wezyw umàno ma'e kwer wapyta haw pe wà. Wikuwe mehe umuhàmuhàz kyzeahy haw teko tetea'u wanehe wà. Umàno wà. Maranugar haw upyk wà. 25 Eràw uzeàpàrirog zeàmàtyry'ymaw pe umàno ma'e kwer wamyter pe. Hemiruze'eg zauxiapekwer watym awer upyta itym awer izywyr wà. Ni amo nuzeruzar kwaw Tupàn rehe wà. Paw rupi umàno zeàmàtyry'ymaw pe wà. Amo zauxiapekwer uzuka wà. Wikuwe mehe umuhàmuhàz kyzeahy haw teko tetea'u wanehe wà. Umàno wà. Maranugar haw upyk wà kury. Uzemono'og amogwer zeàmàtyry'ymaw pe uzezuka kar ma'e kwer wanehe we wà.

26 Mezek ywy wiko a'e pe. Tumaw ywy wiko a'e pe no. Hemiruze'eg zauxiapekwer watym awer upyta itym awer izywyr wà. Paw rupi umàno zeàmàtyry'ymaw pe wà. Ni amo nuzeruzar kwaw Tupàn rehe wà. Wikuwe mehe umuhàmuhàz kyzeahy haw teko wikuwe ma'e waiwy rehe wà. 27 Kwehe mehe zauxiapekwer ipuruzukaiwahy ma'e itym mehe teko umume'u wanemiapo kwer amogwer wanenataromo wà. Wezyw umàno ma'e kwer wapyta haw pe utakihe puku heraha pà wà. Teko numume'u kwaw Mezek rehe har wanemiapo kwer wazutym mehe wà. Numume'u kwaw Tumaw rehe har wanemiapo kwer wà. Teko omono watakihepuku waàkàg iwype wà. Upyk wanetekwer umim awer pupe wà. 'Aw zauxiapekwer tetea'u zuka har upuner wikuwe ma'e wamukyzeahy kar haw rehe wà, wikuwe mehe wà.

28 Zauxiapekwer ukamikamik putar Ezit wà nehe, uzeruzar 'ym ma'e wazeàmàtyry'ymaw pe izuka pyr wamyter pe wà nehe.

29 Enom izuapyapyr wiko a'e pe wà, wanuwihawete rehe we wà, wanuwihaw wanehe we wà. Wiko zauxiapekwer ukyze 'ym ma'e romo kwehe mehe wà. Ko 'ar rehe uzeàpàrirog wànàm umàno ma'e kwer wapyta haw pe wà, uzeruzar 'ym ma'e zeàmàtyry'ymaw pe izuka pyrer wainuinuromo wà.

30 Tuwihawete kwarahy heixe haw awyze har kutyr har paw wà, Xitom tawhu pe har paw wà no, upyta umàno ma'e kwer wapyta haw pe wà. Umàno Tupàn rehe uzeruzar 'ym pà wà. Wapuner haw umuhàmuhàz kyzeahy haw. Ko 'ar rehe wezyw zeàmàtyry'ymaw pe izuka pyrer wanupi wà. Teko nuzeruze'eg kwaw wanehe wà kury. Uzepàriràg u'aw pà a'e pe wà. A'e pe wezyw ma'e upyta iaiw haw rehe wà. A'e tuwihawete wà, a'e teko wà no, upyta a'e iaiw haw rehe wà no.

31 — Ezit wanuwihawete wexak putar wà nehe. A'e mehe hurywete putar nehe, ta'e a'e zauxiapekwer uzuka hemiruze'eg zauxiapekwer tetea'u a'e 'ym mehe wà xe, i'i zanezar Tuweharupi Wiko Ma'e.

32 — Amukyzeahy kar wikuwe ma'e Ezit wanuwihawete pe ihe wà. Nezewe rehe we zauxiapekwer uzuka putar a'e tuwihawete a'e wà nehe, hemiruze'eg zauxiapekwer wainuinuromo a'e wà nehe. Uzepàriràg putar uzeruzar 'ym ma'e zeàmàtyry'ymaw pe izuka pyrer wainuinuromo wà nehe. Ihe pezar Tuweharupi Wiko Ma'e aze'eg kwez kury.

<- EZEKIEW 31 EZEKIEW 33 ->