15 ಥೊಡ್ಯಾಂಚಾನಿ ಆಪ್‌ಲ್ಯಾ ಬಾರಿಕ್ ಮುಲಾನಾ ಯೇಸುಪ್ನಿ ಹಾತ್ ಲಾವುನ್ ಗಿಹ್ಯಾ ವ್ಹಯಿ ಮನ್ಹುನ್ ಯೇಸುಪ ಆಂತ್ಯಾಲಿ ತ್ಯಚಾ ಶಿಶಾಂಚಾನಿ ಬಗುನ್ ತ್ಯನಾ ದಪ್‌ಕ್ಯಾವ್ಲಿತ. 16 ಫನ್ ಯೇಸುನಿ ತ್ಯಾ ಮುಲಾನಾ ಆಪ್ಲಿಪ ಹಾಕ್ಟುನ್, ಆಸಾ ಮನ್ಲಾ “ಮುಲಾನಾ ಮಾಜಿ಼ಪ ಯವುದೇವಾ; ತ್ಯನಾ ಆಡ್ಯಾವು ನಕೊಸಾ ದೇವಾಚ಼ ರಾಜೆ ಆಸ್‍ಲ್ಯಾಂಚ಼ಸ್. 17 ಆನಿ ಮಿ ತುಮಾನಾ ಖರ ಸಾಂಗ್ತೊ ಕೊನ್ ಪೋರಾಚೆ ಬಾವ್ನನಿ ದೇವಾಚ಼ ರಾಜೆ ಗಿಹಿತ್ ನಾಹಿ ತ್ಯೊ ತ್ಯಾತ್ ಜಾ಼ಯಿತ್ ನಾಹಿ ಮನ್ಲಾ.

18 ಯೊಕ್ ಯೆಹುದ್ಯಾಂಚಾ಼ ಅಧಿಕಾರಿ ಯವುನ್, “ಚಾ಼ಂಗಲ್ಯಾ ಗುರು ಮನಾ ಶಾಶ್ವತ್ ಜೀವ್ ಗಾವಾ ವ್ಹಯಿತ ಮಿ ಕ್ಯಾ ಕರಾ ವ್ಹಯಿ? ಮನ್ಹುನ್ ಯೇಸುಲಾ ಇಚಾರ್ಲ.

19 ತವಾ ಯೇಸು ತ್ಯಲಾ, “ಮನಾ ಚಾ಼ಂಗ್ಲ ಮನ್ಹುನ್ ಕಾ ಮಂಥೊಸ್? ದೇವ್ ಯೊಕುಸ್ ಚಾ಼ಂಗ್ಲಾ. 20 ರಾಂಡ್ ಸಂಗತ್ ಕರುನಾಹಿ ಖುನ್ ಕರುನಾಹಿ; ಚು಼ರಿ ಕರುನಾಹಿ; ಲಬಾಡ್ ಸಾಕ್ಶಿ ಸಾಂಗು ನಾಹಿ ಆಯಿ ಬಾಲಾ ಮರ‍್ಯಾದ್ ದಿಯಾ ವ್ಹಯಿ ಹ್ಯಾ ಆಜ್ಞಾ ಠಾವ್ಯಾ ಹಾತಾ ತ್ಯವ್‍ಡ್ಯಾಸ್ ಮನ್ಹುನ್ ಸಾಂಗ್ಲ.

21 ತವಾ ತ್ಯೊಮಾನುಸ್, “ಮಿ ನ್ಹಾನ್ಪಸ್ನಿ ಹ್ಯಂಚಿ ಶಾರ್ಕಾ ಚಾ಼ಲತ್ ಆಲ್ಯೊ” ಮನ್ಹುನ್ ಮನ್ಲಾ ತವಾ.

22 ಯೇಸು ತ್ಯ ಐಕುನ್ ತ್ಯಲಾ, “ಆಜು಼ನ್ ತುಲಾ ಯಾಕ್ ಕಮ್ಮಿ ಜಾ಼ಲ್ಯಾ; ತುಜ಼ ಆಸ್‌ಲ್ಯಾಲ ಸಗ್ಳ ಇಕುನ್ ಪೈಸ ಗರಿಬಾನಾ ವಾಟುನ್ ದೇ; ಪರಲೊಕಾತ್ ತುಲಾ ಸಂಪತ್ ಗಾವಲ್ ತು ಯವುನ್ ಮಾಜೆ ಮಾಗ ಲಾಗ್ ಮನ್ಹುನ್ ಸಾಂಗ್ಲ. 23 ತ್ಯೊ ಮಾನುಸ್ ಖುಬ್ ಸಾವ್ಕೊರ್ ಹುತ್ತಾ ಮನ್ಹುನ್ ಹ್ಯ ಐಕುನ್ ಖುಬ್ ದುಃಕ್ ಜಾ಼ಲಾ.

24 ತವಾ ಯೇಸುನಿ ತ್ಯಲಾ ಬಗುನ್, “ಸಾವ್ಕೊರ್ ಮಾನುಸ್ ದೇವಾಚಾ ರಾಜಾತ್ ಜಾ಼ಯಾಚ಼ ಕ್ಯವ್ಡ ಕಠಿನ್ ಹಾ. 25 ಸಾವ್ಕೊರ್ ಮಾನುಸ್ ದೇವಾಚಾ ರಾಜಾತ್ ಜಾ಼ಯಾಚೆ ವಾಟ್ನಿಚ಼ ಹುಟ್ ಸುಚಾ ಡೋಳ್ಯಾತ್ನಿ ಜಾ಼ಯಾಚ಼ ಸಲ್ಪ” ಮನ್ಲಾ.

26 ಯೇಸುಚ಼ ಹೆ ಸಬಾತ್ ಐಕ್‍ಲ್ಯಾಲ, “ಆಸ ಜಾ಼ಲ್ಯಾ ಕುನಾಲಾ ರಕ್ಶನ್ ವ್ಹಯಿಲ್” ಮನ್ಹುನ್ ಇಚಾರ್ಲ. 27 ತವಾ ಯೇಸುನಿ ತ್ಯನಾ, “ಮಾನ್ಸಾನಾ ವ್ಹಯಿತ್ ನಸ್‍ಲ್ಯಾಲ ದೇವಾಲಾ ವ್ಹತ ಮನ್ಲಾ.

28 ತವಾ ಪೇತ್ರ, “ಆತಾ ಆಮಿ ಆಮ್ಚಿ ಘರ್ ದಾರ ಸೂಡುನ್ ತುಜೆ ಮಾಗ್ನಿ ಆಲ್ಯಾವ್” ಮನ್ಲಾ.

29 ತವಾ ಯೇಸು ತ್ಯನಾ, “ತುಮಾನಾ ಖರ ಸಾಂಗ್ತೊ. ಕೊನ್ ದೇವಾಚಾ ರಾಜಾ ಸಾಟಿ ಘರ್, ಬ್ಯಾಯ್ಕೊ ಬಾಹು ಆಯಿ ಬಾ ಪೊರಾನಾ ಸುಡುನ್ ಹಾ. 30 ತ್ಯಲಾ ಆತಾಚಾ ಕಾಲಾತ್ ಖುಬ್ ವಾಟ್ನಿ ಗಾವ್ನಾರ್; ಆನಿ ಮೊರ್ಲೆ ದುನೆತ್ ಶಾಶ್ವತ್ ಜೀವ್ ಮಿಳ್ನಾರ್” ಮನ್ಹುನ್ ಸಾಂಗ್ಲ.

31 ಯೇಸುನಿ ಆಪ್‌ಲ್ಯಾ ಬಾರಾ ಜಾ಼ನ್ ಶಿಶಾನಾ ಹಾಕ್ಟುನ್ ತ್ಯನಾ, “ಬಗಾ ಆಮಿ ಯೆರುಸಲೇಮಿತ್ ಜಾ಼ತ್ಯಾವ್ ಆನಿ ಮಾನ್ಸಾಚಾ ಲೇಕಾಚೆ ಗುಶ್ಟಿತ್ ಪ್ರವಾದಿಂಚಾನಿ ಲಿವ್‍ಲ್ಯಾಲ ಸಗ್ಳ ತ್ಯಚಿಪ ಗಡ್ನಾರ್. 32 “ತ್ಯಲಾ ಯೆಹುದ್ಯ ನಸ್‍ಲ್ಯಾಲ್ಯಾ ದಿಸರ‍್ಯಾ ಲೊಕಾಂಚಾ ತಾಬ್ಯಾತ್ ದೇನಾರ್ ತೀ ತ್ಯಚಿ ನಿಂದಾ ಕರ್ನಾರ್ ಸಿವ್ಯಾದೇನಾರ್ ಥುಕ್ನಾರ್ 33 ಕಾಟ್ಯಾಚಾ ಬಾರ‍್ಕುಲಾನಿ ಮಾರುನ್ ಜೀವ್ ಕ್ಯಾಡ್ನಾರ್. ಆನಿ ತೀನ್ ದಿಸಾ ನಂತರ್ ತ್ಯೊ ಪರತ್ ಜಿತ್ತಾ ವ್ಹವುನ್ ಉಠುನ್ ಯನಾರ್” ಮನ್ಹುನ್ ಸಾಂಗ್ಲ.

34 ಫನ್ ಶಿಶಾಂಚಾನಿ ಹ್ಯಾತ್ಲಿ ಯೇಕ್ ಗ್ಯೊಶ್ಟ್ ಬಿ ಸಮಜು಼ನ್ ಗಿತ್ಲಿ ನಾಹಿ ಹ್ಯಾ ಗುಶ್ಟಿ ತ್ಯನಾ ಆಡ್‍ಶಾ ಹುತ್ಯಾ.

35 ಯೇಸು ಯೆರಿಕೊಚೆ ಜ಼ವಳ್ ಆಲಾ ತವಾ ವಾಟಚೆ ಕಡಸ್ ಬಸುನ್ ಭೀಕ್ ಮಾಗ್‍ತ್ಯಾಲಾ ಯೊಕ್ ಕುರ್ಡಾ ಹುತ್ತಾ. 36 ತ್ಯನಿ ವಾಟನಿ ಹಿಂಡಾನಿ ಜಾ಼ತ್ಯಾಲ್ಯಾ ಲೊಕಾಂಚ಼ ಸಬ್ದ ಐಕುನ್ ಹ್ಯ ಕ್ಯಾ ಮನ್ಹುನ್ ಇಚಾರ್ಲ.

37 ತ್ಯಂಚಾನಿ ತ್ಯಲಾ, “ನಜ಼ರೇತಿಚಾ಼ ಯೇಸು ಹೆ ವಾಟನಿ ಜಾ಼ತ್ಯೊ” ಮನ್ಹುನ್ ಸಾಂಗ್ಲ.

38 ತವಾ ತ್ಯೊ ಕುರ್ಡಾ “ಯೇಸುಗಾ ದಾವಿದಾಚಾ ಲೇಕಾ ಮಾಜಿವ ಕರ್ನಾ ದ್ಯಾವ್” ಮನ್ಹುನ್ ಜೊ಼ರಾನಿ ಮನ್ಲಾ.

39 ಮೊರ‍್ಹ ಜಾ಼ತ್ಯಾಲ್ಯಾ ಲೊಕಾಂಚಾನಿ ಗಪ್ ರ‍್ಹಾ ಮನ್ಹು‍ನ್ ತ್ಯಲಾ ದಪ್‌ಕ್ಯಾವ್ಲಾ ತವಾ ತ್ಯೊ, “ದಾವಿದಾಚಾ ಲೇಕಾ, ಮಾಜಿವ ಕರ್ನಾ ಥೆವ್” ಮನ್ಹುನ್ ಆನಿಕ್ ವರಾಡ್ಲಾ.

40 ತವಾ ಯೇಸು ಉಬಾರಾಹುನ್ ತ್ಯಲಾ ಆಪ್ಲಿಪ ಹಾಕ್ಟುನ್ ಆನಾಯಾ ಸಾಂಗ್ಲ 41 ತ್ಯೊ ಜ಼ವಳ್ ಆಲಾ ತವಾ ಯೇಸುನಿ ತ್ಯಲಾ, “ಮಿ ತುಲಾ ಕ್ಯಾ ಕರಾ ವ್ಹಯಿ ಮಂಥೊಸ್” ಮನ್ಹುನ್ ಇಚಾರ್ಲ್ಯಾಲ್ಯಾಲಾ ತ್ಯನಿ, “ಮಿ ಆನಿಕ್ ಸಗ್ಳ ಬಗಿ ಜೊ಼ಗ ಕರ್” ಮನ್ಲಾ.

42 ಯೇಸು ತ್ಯಲಾ, “ತುಲಾ ದಿಸುನಿ; ತುಜಾ ಇಸ್ವಾಸಾನಿ ತುಲಾ ಬರಾ ಕೆಲ್ಯಾ” ಮನ್ಲಾ.

43 ತವಾಸ್ ತ್ಯಲಾ ದಿಸಾಯಾಲಾಗ್ಲ ತ್ಯೊ ದೇವಾಲಾ ವವ್ಯಾಳಿತ್ ಯೇಸುಚೆ ಮಾಗ್ನಿ ಗೆಲಾ ಲೊಕ ಸಗ್ಳಿ ಚಾ಼ಲ್ಯಾಲಿ ಹಾಕಿಗತ್ ಬಗುನ್ ದೇವಾಲಾ ಉಪ್ಕಾರ್ ಕರಾಯಾ ಲಾಗ್ಲಿತ.