3 ಯಕ ಯಳಿ ಕೊನ್ತರಿ ದುಸ್ರೆ ತರನಿ ನಿಯಮ್ ಸಿಕಿವ್‌ತ್ಯಾತ ಆನಿ ಆಮಚಾ಼ ಪ್ರಭು ಯೇಸು ಕ್ರಿಸ್ತಾಚಿ ಖರಿ ವಚನ ಆನಿ ಭಕ್ತಿನಿ ಮಿಳಾಲ್ಯಾಲಿ ಪುರ್ನ ಸಿಕ್ಷನ್ ಗಿಹಿತ್ನಾಹಿತ. 4 ತ್ಯೊ ದಿಮಾಕಾನಿ ಬರ್‌ಲ್ಯಾಲಾ ಹಾ. ಆನಿ ತ್ಯಲಾ ಕಾಯೆಕ್ ಠಾವನಾಹಿ. ತ್ಯಚೆ ನಕೊಜಾ಼ಲ್ಯಾಲೆ ಆಶೆನಿ ವಾದ್ ಗಾಲ್ಹಿತ್ ರಾಥೊ ಆನಿ ಸಬ್ದ ಉಪೇಗ್ ಕರುನ್ ಕಳ್ ಕರ್ತೊ. ದುಬಾವ್, ಖೊಟ ಫನ್, ನಿಂದಾ ಕರಾಚಿ, ಆನಿ ಬುರ್ಶಾ ಸಿವ್ಯಾ ಯತ್ಯಾತಾ. 5 ಯವ್ಡಸ್ ನವ್ಹ ಬುಧಿ ಖರ‍್ಯಾಲಾ ದುರ್ ರಾಹುನ್ ದೆವಾಚಿ ಬಕ್ತಿ ಲಾಬಾಚ಼ ವಸ್ತು ಮನ್ಹುನ್ ಸಮಜ಼ತ್ಯಾಲ್ಯಾಹ್ಯಾ ಮಾನ್ಸಾತ್ನಿ ಖಾಯಿಮ್ ಕಳ್ ವ್ಹನಾರ್.

6 ಖರ‍್ಯಾನಿಸ್ ದೇವಾಚಿ ಸೇವೆ ಕರ್ತ್ಯಾಲಾಸ್ನಿ ಮಾನುಸ್ ಸಾವ್ಕೊರ್ ವ್ಹತ್ತೊ. ಆನಿ ಆಪ್ಲಿಪ ಕ್ಯಾ ಹಾ ತ್ಯಾತುಸ್ ತ್ಯೊ ಸಂತೊಶ್ ವ್ಹತ್ತೊ. 7 ಆಮಿ ದುನೆತ್ ಆಲಾವ್ ತವಾ ಕ್ಯಾ ಗಿಹುನ್ ಆಲಾವ್? ಕಾಯ್ ನಾಹಿ. ಆಮಿ ಮರ್ತಾನಾ ಕಾಯೇಕ್ ಗಿಹುನ್ ಜಾ಼ನಾರ್ ನಾಹಿ. 8 ಮನ್ಹುನ್ ಜೆವಾನ್ ಕಪ್ಡ ಆಸ್‌ಲ್ಯಾವ ಪುರೊ. ತ್ಯಾತುಸ್ ಆಮಿ ಸಮಾದಾನಾನಿ ರಾಥಾವ್. 9 ಫನ್ ಸಾವ್ಕೊರ್ ವ್ಹಯಾ ಪಾಯ್ಜೆ ಮಂಥ್ಯಾಲಾ ಆಪ್‌ಲ್ಯಾಲಾ ಆಪ್ನುಸ್ ಪರೀಕ್ಷೆತ್ ಗಾಲ್ಹುನ್ ಗೇನ್ಹಾರ್. ತೇ ಖುಬ್ ಮುರ್ಖಾತ್ ಆನಿ ಹಾಳ್ ಕರ್ತ್ಯಾಲೆ ಆಶೆತ್ ಗಾವಲ್ಯಾತ ತ್ಯ ತ್ಯನಾ ಹಾಳಾತ್ ಆನಿ ಗೈಪಾತ್ ಗ್ಯಾಲ್ತ. 10 ಪೈಶಾಂಚಿ ಆಶಾ ಸಗಳೆ ತರಚಾ ಬುರ್ಶಾ ಫನಾಲಾ ಮುಳ್ ಜಾ಼ಲ್ಯಾ. ಥೊಡ್ಯಾಂಚಾನಿ ತ್ಯಚಿಸಾಟಿ ಗಾಹಿ ಕರುನ್, ತ್ಯನಿ ಕ್ರಿಸ್ತಾಚಾ಼ ಇಸ್ವಾಸ್ ಸುಡುನ್, ಫಿರತ್ ಖುಬ್ ತರಾಸಾನಿ ಆಪಲ್ಯಾಲಾ ಬುಚು಼ವುನ್ ಗೆತ್ಯಾತ.

11 ಫನ್ ತು ದೇವಾಚಾ಼ ಮಾನುಸ್ ಜಾ಼ಲ್ಯಾಸ್ ತ್ಯಚಿಸಾಟಿ ಹ್ಯಾ ಸಗ್‌ಳ್ಯಾ ಪಾಪಾತ್ನಿ ದುರ್ ರ‍್ಹಾ ಆನಿ ನಿಯೆತಿನಿ ಬಕ್ತಿಚಿ ಸೆವಾ ಇಸ್ವಾಸ್, ಮಾಯಾ, ಧೀರ್, ಸಾತ್ವಿಕತೆತ್ ಮಿಳುನ್ ರ‍್ಹಾ. 12 ಇಸ್ವಾಸಾಚಾ ಪಳನ್ಯಾತ್ ತುಜಾ ಪುರ‍್ಯಾ ಚಾಂಗಲ್ಯಾಸಾಟಿ ಪಳ್‍. ಆನಿ ತುಜಿಸಾಟಿ ಶಾಸ್ವತ್ ಜೀವ್ ಜಿತ್. ತುಲಾ ಹ್ಯಚಿಸಾಟಿಸ್ ಹಾಕಟ್‌ಲ್ಯಾ ತು ಖುಬ್ ಸಾಕ್ಷಿಚೆ ಮೊರ್ಹ ತ್ಯ ಖುಬ್ ಚಾ಼ಂಗಲ್ಯಾನಿ ಗೆತಲ್ಯಾಸ್. 13 ದೇವಾಚೆ ಮೊರ್ಹ ತ್ಯೊ ಸಗ್‌ಳ್ಯಾನಾ ಜೀವ್ ದೆತೊ. ಆನಿ ಕ್ರಿಸ್ತ ಯೇಸುಚೆ ಮೊರ‍್ಹ ತ್ಯೊ ಪೊಂತಿ ಪಿಲಾತಾಚೆ ಮೊರ್ಹ ಖುಬ್ ಚಾ಼ಂಗ್ಲಿ ವಳಕ್ ದಿಲ್ತಿ. ಮಿ ತುಲಾ ಆಜ್ಞಾ ದೆತೊ. 14 ಆಮಚಾ಼ ಪ್ರಭು ಕ್ರಿಸ್ತ ಯೇಸು ದಿಸಪರ‍್ಯಾತ್ ತುಲಾ ದಿಲ್ಯಾಲಿ ಆಜ್ಞಾ ಪಾಳಿತ್ ಇಸ್ವಾಸಾನಿ ಚಾ಼ಲಿವ್. 15 ಆಪ್ನಿ ಥರಿವಲ್ಯಾಲ್ಯಾ ಶಾರ್ಕ್ಯಾ ಯಳಾಲಾ ತ್ಯಲಾ ದ್ಯಾವ್ನಾರ್. ತ್ಯೊ ಭಾಗ್ಯ ಆಸ್ನಾರಾ ಆನಿ ಯಕ್ಲಾಸ್ ರಾಜ್ಬಾರ್ ಕರ್ನಾರಾ ರಾಜಾಚಾ಼ ರಾಜಾ಼ ಪ್ರಭುಚಾ಼ ಪ್ರಭು ಜಾ಼ಲ್ಯಾ. 16 ಮರಾನ್ ನಸ್ನಾರಾ ತ್ಯೊ ಯಕ್ಲಾಸ್ ತ್ಯೊ ರಾಥ್ಯಾಲ್ಯಾ ಉಜಿಡಾಚೆ ಜ಼ವಳ್ ಲೊಕಾನಾ ಜಾ಼ಯಾಲಾ ವ್ಹನಾರ್ ನಾಹಿ ತ್ಯಚಿ ಮರ‍್ಯಾದ್ ಆನಿ ಶಾಸ್ವತ್ ಬಳ್ ಖಾಯಿಮ್ ರಾಹುನಿ. ತಸ ವ್ಹವುನಿ.

17 ಹ್ಯಾ ಲೊಕಾತ್ ಕೊನ್ ಸಾವ್ಕೊರ್ ಹಾ ತ್ಯಲಾ ಆಜ್ಞಾ ದೆ. ಗರ್ವಿಶ್ಟ ರಾಹುನಕೊಸಾ, ನಾಸ್ ವ್ಹತ್ಯಾಲೆ ಸಾವ್ಕರ್ಕಿವ ಆಸೆ ಥಿವು ನಕೊಸಾ. ತ್ಯ ಖರ ನವ್ಹ ಚಾ಼ಂಗಲ್ಯಾ ದೇವಾವ ಇಸ್ವಾಸ್ ಥೆವಾ. ತ್ಯೊ ಆಮಚಾ ಆನಂದಾಸಾಟಿ ಸಗಳ್ಯಾ ಗುಸ್ಟಿ ಸಗಳ್ಯಾ ಪುರ್ನ ಕರ್ನಾರ್.

18 ತ್ಯನಾ ಆಜ್ಞಾ ದೆ ತೇ ಚಾಂಗಲ್ಯಾ ಕಾಮ ಕರಾಯಾ ಆಜ್ಞಾ ಆನಿ ಚಾ಼ಂಗಲ್ಯಾ ಕಾಮಾನಿ ಸಾವ್ಕೊರ್ ವ್ಹವುಂತ ಉದಾರಾನಿ ಆನಿ ಯಕಾ ಸಂಗ ಆಪ್ಲಿ ಸಾಮ್ನ ದಿವುಂತ. 19 ತವಾ ಪರಲೋಕಾತ್ ಯೇಕ್ ಠೆವ್ ತ್ಯಂಚಾನಿ ರಾಖುನ್ ಥೆವ್‌ಲ್ಯಾಚೆಗತ್ ವ್ಹತ್ತೆ. ಹ್ಯಚಿಸ್ ಲಾಗುನ್ ತೇ ಜೀವ್ನಾಲಾ ದರ‍್ಹುನ್ ರಾನ್ಹಾರ್ ತ್ಯೊ ಖರಾ ಜೀವ್ನಾ ಜಾ಼ಲ್ಯಾ

20 ತಿಮೊಥ್ಯಾ, ತುಲಾ ದಿಲ್ಯಾಲ ತು ರ‍್ಯಾಕ್. ಭಕ್ತಿ ನಸ್‌ಲ್ಯಾಲ್ಯಾ ಬೊಲ್ಯಾಸ್ನಿ ಆನಿ ವಾದಿಂಚಾ ಲಬಾಡ್ ಬೊಲ್ಯಾಸ್ನಿ ತ್ಯಲಾ ಚು಼ಕುನ್ ದುರ್ ರ‍್ಹಾ. 21 ಥೊಡ್ಯಾಂಚಾನಿ ತ್ಯ ಲಬಾಡ್ ಶಿಕ್ಷೆನ್ ಐಕುನ್ ಕ್ರಿಸ್ತಾಚಾ ಇಸ್ವಾಸಾತ್ನಿ ದುರ್ ಜಾ಼ಲಿತ.ಕ್ರುಪಾ ತುಮಚಿ ಸಂಗ ರಾಹುನಿ.

<- ತಿಮೊತ್ಯಾಲಾ 5