2Ximotiyoosa 4

1 Taani nena Xoossaa sinthaninne, kawo gididi haaranaw qoncciya wode paxatanne hayqqidayssata pirddanaw de7iya Kiristtoos Yesuusa sinthan zorays. 2 Qaala oda; wodey injjetin injjetonna ixxin minnada oda. Daro dandda7aninne tamaarsson asaa zora seeranne denthetha. 3 Asay tuma timirttiya si7onna ixxiya wodey yaana. Entti bantta amuwaa kaallidi, banttaw si7anaw ufayssiyabaa odiya asttamaareta shiishoosona. 4 Entti tuma timirttiya aggidi, tuma gidonna odaa si7anaw bantta haytha zaarosona. 5 Shin neeni ubbaban nena haara. Metuwa dandda7a. Wonggelaa markkatethaa oosuwa ootha. New imettida Xoossaa ooso ubbaa pola.

6 Taani yarshshettiya wodey gakkis; ha alamiya aggada biya wodey matis. 7 Taani lo77o ola olettas; ta gaadiya woxxada wurssas; ammanuwa naagas. 8 Sinthafe xillotetha kallachchay [a] tana naagees. Hessa xillo pirddaa pirddiya Goday he gallas taw immana. Hessa ta xalaalas gidonnashin, iya qonccethaa amottiya ubbaas immana.

Phawuloosa buzo qofata

9 Ellesa yada tana be7a. 10 Deemasi ha alamiyan de7iyabata dosidi, tana aggidi, Teselonqe katamaa bis. Qerqisi Galatiya biittaa, qassi Titoy Dilmmaxiya biittaa bis.[b] 11 Luuqaasa xalaali taara de7ees. Marqqoosi Xoossaa ooson tana maaddanaw dandda7iya gisho, neera ekkada ya.[c] 12 Taani Tikiqoosa Efesoona katamaa kiittas.[d] 13 Neeni yashe, Xiro7aada kataman Karppoosa matan aggada yida ta kootiyanne maxaafata taw ekkada ya. Ubbaka galbban xaafettida maxaafati ekkonna yooppa.

14 Biraata qoxxiya Iskkinddirey tana daro qohis; Goday iya oosuwada iyaw zaarana.[e] 15 I nu timirttiya daro ixxiya gisho iyappe nena naaga.

16 Koyro ta mootettiya wode ubbay aggidi bidosonappe attin oonikka tana maaddibeenna. Xoossay he balaa enttaw tayboppo. 17 Shin taani kumetha kiitaa Ayhude gidenna asa ubbaas markkatin, entti si7ana mela Goday ta matan eqqidi taw wolqqa immis. Qassi koshattida gaammoda doona dooyida hayquwappe tana ashshis. 18 Goday tana iita ubbaafe ashshidi ba salo kawotetha saron efana. Iyaw merinaappe merinaa gakkanaw bonchchoy gido. Amin7i.

Wurssetha Sarotho

19 Phirisqilas, Aqiilasinne Anesfoora soo asaas ta sarothuwa oda.[f] 20 Erasxoosi Qoronttoosa kataman attis. Xirofimoosi harggettida gisho, Malaaxe kataman aggas.[g] 21 Balggoy gelanaappe sinthe ellesada ya.

Ewubulusi, Phudeesi, Linuusinne Qilaadeynne hara ammaniyaa asati ubbay nena saro saro goosona.

22 Goday Yesuus Kiristtoosi ne ayyaanaara gido.

Xoossaa maarotethay hintte ubbaara gido.

<- 2Ximotiyoosa 3