Phawuloosi Titos
Xaafida Kiita
Gaatha Qofa
Titoy Ayhude gidonna asi, shin guyepe ammanidi, Phawuloosi wongela oosuwa oothiya wode matan iya maaddida asi. He wode Titoy, woosa keetha xeellanawunne naaganaw Qarxeesa woosa keethan attis. Ha kiitay heedzu ayfe qofata oykees.
1. Woosa keethi aysiya asay, iita duussu de7iya Qarxeesa asaa matan ay mela lo77o duussu daanaw koshshiyako Tito akeekisees.
2. Woosa keetha giddon de7iya dumma dumma cugata, hessika, cima asata, dondza addetanne aylleta waati tamaarsanaw bessiyako Tito zorees.
3. Ammaniya asi ammanon waanidi daaneko, hessika, sarotethaninne siiqon daanaba, woosa keetha giddofe ooshshi, palamanne shaahetethi digganaba Titos zore immees.
Maxaafa Ayfe Qofata
Gelo qofa (1:1-4)
Woosa keethi kaalethiya asaas imetida kiita (1:5-16)
Dumma dumma cugata imetida zore (2:1—3:11)
Zorenne sarotho (3:12-15)

1 Yesuus Kiristoosa hawaareynne Xoossa aylley, Phawuloosi, xaafida dabdaabiya. Xoossay doorida asaa ammanuwa dichanaadanne tuma ayyaana de7uwa waanidi daaneko bessiya tumaa eraako enta kaalethanaw taani kiitetas. 2 He ammanoynne eratethay merinaa de7uwa ufaysaa bolla zempis. Hessa daro wodepe sinthe wordotonna Xoossay nuus immana gidi qaala gelis. 3 Nuna ashshiya Xoossay ba woden ha kiitaa odana mela taw hadara immis.

4 Nu kothe ammanuwan ta tuma na7aa gidida Tito,

Xoossaa Aawapenne nuna ashshiya Yesuus Kiristoosape aadho keehatethay, maarotethaynne sarotethay new gido.[a]

Titoy Qarxeesan

5 Taani nena Qarxeesan aggada yiday, neeni attidaba giigisanaadanne taani kiittidaysada katamaa ubban woosa keetha cimata doorana melasa. 6 Cimi boretonaysa, issi mache azinaa, maara dhayon woyko kiitetetha ixon asi boronna ammaniya nayti de7iya asi gidanaw bessees.[b] 7 Woosa keetha cimi Xoossaa oosuwa hadara ekida gisho, boretonaysa, otortonaysa, elle yilotonnaysa, mathotonaysa, oda medhonaysanne bessonna go77as dafetonaysa gidanaw bessees. 8 Shin imathe mokeysa, lo77oba ubbaa doseysa, akeekancho, xillo, geeshshinne bana haareysa gidanaw bessees. 9 Harata suure timirtiyan minthethanawunne he timirtiya ixeyisata zaaranaw ba tamaarida tuma qaalan minnidi eqanaw bessees.

10 Kiitetonaysati, pathonna oda odeteysati, cimmeysati ubbaka qaxaretetha wogaa naagiya daro asati de7oosona. 11 Enti bessonna ogen miishe demmanaw koyidi, tamaarsanaw bessonnaba tamaarsishe keetha asaa ubbaa iissiya gisho enta timirtiya teqanaw bessees. 12 Enta nabetape issoy, “Qarxeesa asay ubba wode wordo odetoosona; iita do7atanne azalla yarambata”[c] yaagis. 13 Ha markatethay tuma markatethi. Hessa gisho, entaw tuma ammanoy daana mela enta hanqeta. 14 Tumaa ixiya asaa timirtiyanne Ayhudeta pathonna tossiya si7onna mela enta seera. 15 Bantaw geeshshi gididaysatas ubbay geeshshi, shin tunatasinne ammanonaysatas enta qofaynne kahay tunida gisho, entaw aybika geeshshi gidenna. 16 Enti nu Xoossaa eroos goosona, shin banta oosuwan iya kaddoosona. Enti Xoossan ixetidaysata, kiitetonaysatanne lo77o ooso ubbaas gidonnayisata.

a 2 Qoro 8:23; Gala 2:3; 2 Ximo 4:10.
b 1 Ximo 3:2-7.
c Qarxeesa asay ubba wode wordo odetoosona; iita do7atanne azalla yarambata: Hessa yaagidi odida nabey Ephimendeesa geetetees.