1 Issi gallas Nuhaama ba na7a machiw, “Ta naate, neeni giigin daana mela taani new wula koyaako waananee? 2 Neeni entara gam7ida macca aylleta goday, Boo7ezi, nuus mata dabbo gidenneyee? I hachi qamma wudumman banga punana. 3 Neeni meecetada shitto tiyeta; ne lo77o ma7uwa ma7ada, duge wudumman ba; Bada Boo7ezi midi uyidi simmana gakanaw iya ayfen keyopa. 4 I hiixa aadhiya wode I awun dhiskiyako be7ada, iya afila qaarada iya tohoson zin7a agga. Neeni hananaba I new odana” yaagasu.

5 Uruuta, “Neeni gidaba ubba ta oothana” yaagasu. 6 Hessa gisho, Uruuta dendada duge moothi bada, I azina aayiya iw odidaba ubba oothasu.

7 Boo7ezi midi uyidi ba bolla pashkisidaape guye, katha cacha matan aadhidi zin7is. Uruuta lepara shiiqada, iya tohuwa qaarada zin7asu. 8 Giddi bilahe gidiyade I dagami dendidi shiretiya wode, issi maccasi iya tohoson zin7idaaro demmis.

9 Ika, “Neeni oonee?” yaagidi oychis.

Iya, “Taani ne aylliw Uruuto; neeni ta azinaas mata dabbonne tana wozanaw danda7ey nena gidiya gisho ta bolla ne afilaa yegga” yaagasu.

10 Boo7ezi zaaridi, “Ta naate, Goday nena anjo! ha keehatethay kase ne oothidaysafe aadhees. Neeni manqo woyko dure gidida na7atetha adde koyabaaka. 11 Ha7i ta naate babofa. Neeni oychidaba ubba new taani oothana. Ta kataman de7iya asa ubbay neeni lo77o maccasi gideysa erees. 12 Taani mata dabbo gideysi tuma; shin taape daro matey de7ees. 13 Hachi qamma haysan aqa. Wonto I nena wozanaw koyiko lo77o, wozo. Shin I wozanaw koyonna ixiko, De7o Goday eriya mela, taani nena wozana. Sa7i wontana gakanaw haysan zin7a” yaagis.

14 Hessa gisho, iya Boo7eza tohoson sa7i wontana gakanaw zin7ada aqasu. Boo7ezi, “Maccasi katha moothi yidaysa oonika eropo” gida gisho Uruuta asi ase shaakidi eronna wode wonta, daro guura dendasu.

15 Boo7ezi iyo, “Ne ma7ida yida laxana ha bessa” yaagis. Iya bessin laatamu kilo giraame banga maki qolidi iyo ba7isis. Ika ba7ada guye katama basu.

16 Uruuta ba azina aayeko simmada yin, Nuhaama, “Ta naate, ne bida allaley waanidee?” yaagada oychasu.

Uruutaka Boo7ezi oothidaba ubba odasu; 17 Gujadaka, “ ‘Ne azina aayeko mela kushe boopa’ gidi haysa laatamu kilo giraame banga immis” yaagasu.

18 Yaagin Nuhaama, “Ta naate, aybi hananeeko eretana gakanaw naaga. Addey hachi ha allaley oge oykonna shempenna” yaagasu.

<- Uruuti Maxaafa 2Uruuti Maxaafa 4 ->