Link to home pageLanguagesLink to all Bible versions on this site
9
Isra7eele Dooretethi
1 Taani Kiristoosan tuma odayis, wordotike. Geeshsha Ayyaanay kaalethiya ta kahay taani wordotonnaysa taw markatees. 2 Ta wozanan Isra7eeletas daro qadhetaysinne qamma gallas qopayis. 3 Taani, ta ishata gisho, Kiristoosape shaaketada Xoossaa baadethafe garsan de7idaako dosaysishin. 4 Enti Isra7eeleta, Xoossay enta ba nayta oothis, ba bonchuwa entaw qoncisis. Entara caaqis; higgiya entaw immis. Enti Xoossaa goyinnana tuma ogiya bessis; Xoossay ufaysa qaala entaw immis.[a] 5 Enti yeletethan mayzata koche; qassi Kiristoosi ashon enta koche gididi yis. Ubbaafe bolla gidida Xoossay merinaw galatetto. Amin7i!

6 Gidoshin, Xoossay gelida qaalay poletonna attis guussu gidenna. Isra7eele asa ubbay Xoossaa asi gidokona. 7 Qassi Abrahaame zare ubbay Abrahaame nayta gidokona. Xoossay Abrahaames, “Ne kochay Yisaaqa baggara xeegetana” yaagis.[b] 8 Hessa guussay ashon yeletida nayti ubbay Xoossaa nayta gidokona. Shin tuma Isra7eele nayti Xoossay Abrahaames gelida qaalada yeletida nayta.[c] 9 Xoossay immana gidi gelida qaalay, “Taani wonto laythi hannoode yaana; Saaraka adde na7a yelana”[d] yaageysa.

10 Hessa xalaala gidonashin, Irbiqinne Yisaaqi yelida mente adde naytabaa akeekite. 11 Enti yeletanaape woyko iita woyko lo77o oothanaape sinthe Xoossaa dooroy ooson gidonashin xeessan gideysa qoncisanaw, 12 “Bayray kaaluwas kiitetana” yaagidi Goday Irbiqas odis.[e] 13 Hessika Geeshsha Maxaafan, “Yayqooba dosas, Eesawe ixas”[f] geetetidi xaafetis.

14 Yaatin, nuuni woyganee? Xoossay ase asape shaakiyee? Gidenna. 15 Goday Museko,

“Ta maaranaw koydaysata maarana;
ta qadhetanaw koydaysatas qadhetana”[g] yaagis.
16 Hiza, Xoossaa dooroy asa shenen woyko ooson gidonashin iya maarotethaana.

17 Geeshsha Maxaafan, Gibxe kawako, “Taani, ta wolqaa nenan bessanawunne ta sunthay alame ubban eretana mela hessas nena kawothas”[h] geetetidi xaafetis. 18 Hiza, Xoossay maaranaw koyeysa maarees; wozanaa muumisanaw koyeysa wozanaa muumisees.

Xoossa Hanqonne Maarotethi
19 Hintefe issoy, “Yaatin, Xoossay ase iita ooso gisho ayis borii? Xoossaa sheniya ixas gaanay oonee?” yaagidi oychanaw danda7ees.

20 Shin ta ishaw, Xoossara palamanaw neeni oonee? Urqafe Medhetida miishey bana medhidaysa, “Tana haysada oothada ayis medhadii?”[i] gidi oychanaw danda7ii? 21 Woyko urqa medheysi issi urqafe issuwa boncho miishe, hankuwa qassi tooshe miishe oothidi medhanaw maati baawee?

22 Xoossay ba hanquwa bessanawunne ba wolqaa erisanaw koyidi, pirdas giigida hanqo nayta daro gencan danda7idaako ne ay eray? 23 Hessa I oothiday koyrottidi bonchoos giigisida, ba doorida naytas ba bonchuwa qoncisanaasa. 24 Ayhude gidin, woyko Ayhude gidonna asa ubbay Xoossan dooretida.

25 Nabiya Hose maxaafan,

“Ta ase gidonnayisata, ‘Ta ase’ gada xeegana.
Ta siiqaboonna deriya, ‘Siiqetidaysata’ gada xeegana.[j]
26 Enti, ‘Ta ase gideketa’ geetetidi xeegetida bessan,
‘De7o Xoossaa nayta’ geetetidi xeegetana”[k] yaagees.

27 Nabiya Isayaasi Isra7eele asaaba,

“Isra7eele asay abba gaxan de7iya shafeda darikoka,
entafe guutha asa xalaali attana.[l]
28 Goday alamiya ubbaa bolla ellesidi polo pirdaa pirdana.”

29 Qassika Isayaasi,

“Ubbaafe Wolqaama Goday nuus guutha koche ashshonaba gidiyako,
nuuni Soodomenne Gamoora katamaada dhayanashin”[m]
yaagidi koyrottidi odis.

30 Yaatin, nu woyganee? Xillotethaa koyiboona Ayhude gidonna asay ammanon xillotethi demmidosona. 31 Shin xillotethako gathiya higgey de7iya Isra7eele asay xillotethi demmibookona. 32 Ayis demmibookona? Enti xillotethaa ammanon gidonashin, ooson ekanaw koyida gishosa. Yaaniya gisho, enti, “Dhubiya shuchan” dhubetidosona. 33 Geeshsha Maxaafan,

“Taani Xiyoonen dhubbi kundisiya shuchaa wothana.
Iyan ammaniya oonika yeellatenna”[n]
geetetidi xaafetis.