1 Kinkire kataman de7iya woosa keethan oothiya nu michiya Feebena lo77o maccas gideysa hinte erana mela koyayis. 2 Hinte ammaniya asati Godaa sunthan mokanaw bessiya ammaniya asatape issuwada iyo mokite. Iya hintefe koyaba ubbaa iyo maaddite. Iya ba huuphen daro asaa maaddasu; qassi tana ta huuphenka daro maaddasu.

3 Kiristoos Yesuusa oosuwa taara issife oothiya Phirisqillanne Aqila saro giite.[a] 4 Enti ta gisho banta shempuwa aathidi immidosona. Ta xalaala gidonashin, Ayhude gidonna asaa woosa keetha ubbay enta galatees. 5 Enta son shiiqiya ammaniya asaa saro giite.

Iise biittan Kiristoosa koyro ammanida, ta dosiya Ephanexoosas ta sarothuwa odite.

6 Hinte gisho ooson daro daaburida Mayraamo saro giite. 7 Taara qasho keethan aathida ta Ayhude laggeta Andiraniqosanne Yuniyasa saro giite. Enti Yesuusa hawaareta giddon eretidaysata. Qassi enti Kiristoosa taape sinthe ammanidosona.

8 Godan ammaniya ta siiqo laggiya, Philiyaxoona saro giite. 9 Kiristoosa oosuwa nuura issife oothiya Urbaanosanne ta dosiya Istakuusa saro giite. 10 Kiristoosan ammanthiya aylliya Aphelisas ta sarothuwa odite. Arsxobuloosa soo asaas ta sarothuwa odite. 11 Ta Ayhude laggiya Herodiyoona saro giite.

Narsisasinne iya soo asaape Kiristoosa ammanidaysata saro giite.

12 Godaa oosuwan daaburiya Tirufaynanne Tirufoosa saro giite. Qassi Godaas daro daaburada oothiya, ta dosiya Xarsido saro giite. 13 Godaa oosuwan daro eretida Rufoosasinne tana ba na7ada be7iya iya aayes ta sarothuwa odite.[b] 14 Asqarixoonas, Afilesonphas, Hermeesas, Phaxrobaanas, Hermaasinne entara de7iya ammaniya ishata ubbaas ta sarothuwa odite. 15 Filologuusa, Yuula, Neera, iya michiw, Alinxoosanne entara de7iya ammaniya asa ubbaa saro giite.

16 Geeshsha yeeretethi yeeretishe, issoy issuwa sarothite. Kiristoosa woosa keetha ubbay hintena saro yaagosona.

17 Ta ishato, hinte tamaarida timirtiya ixidi, hinte giddon shaaketethinne meto medhiya asatape naagetite. Entafe haakite. 18 Hessa mela asati bantaw oothosonape attishin, nu Godaa Kiristoosas oothokona. Banta mal7iya doonaninne saphothiya qaalan ayko eronna asaa wozanaa balethoosona. 19 Wongelas hinte kiitetidaysa asa ubbay si7idaysi tana ufaysees. Shin hinte lo77oba erana melanne iitabaape haakana mela ta koyayis. 20 Sarotethaa Xoossay Xalahiya hinte tohuwape garsan gaaci yeggana.

Nu Godaa Yesuus Kiristoosa aadho keehatethay hintera gido.

21 Taara oothiya Ximotiyoosi hintena saro yaagees.[c] Hessadaka, ta dabboti Luqiyoosi, Yaasoninne Sosiphaxroosi hintena saro yaagosona.

22 Taani, ha dabdaabiya xaafida, Xarxiyoosi, hintena Godaa sunthan saro yaagayis.

23 Tana mokidaynne woosa keetha ubbay iya son shiiqiya Gaayoosi, hintena saro yaagees. Katamaa miishiya oykiya Erasxoosinne nu ishaa Qarxoosi hintena saro yaagosona.[d] 24 [Nu Godaa Yesuus Kiristoosa aadho keehatethay hinte ubbaara gido. Amin7i.][e][f]

25 Galatay Xoossaas gido. Taani, Yesuus Kiristoosaba odiya Wongela qaalanne daro wodepe qosetidi gam7ida tumatethan, Xoossay hintena ammanon minthidi essanaw danda7ees. 26 Shin ha77i he tumay qoncis. Kawotetha ubbay ammanidi kiitetana mela merinaa Xoossaa kiitan nabeti he tumabaa xaafidosona.

27 Yesuus Kiristoosa baggara cincatethi iya xalaalas de7iya, issi Xoossaas merinaw bonchoy gido. Amin7i.

<- Roome Kiita 15