4
Salon De7iya Araata
1 Hessafe guye, taani salo xeelliya wode dooyetida penge be7as. Qassi ta kase si7ida moyze girsaa melay taako, “Ha keya; haysafe guye, hananaw de7iyaba ta nena bessaana” yaagis. 2 He wode ta Ayyaanan haaretada de7ayis. Heko, saluwan araata bolla issoy uttidaysa be7as.[a] 3 He uttidaysa malay yasphedenne sardiyoone al7o shucha mela. Iya araata yuushuwan al7o margide shuchi daaniya zuulli de7ees. 4 He araata yuushuwan laatamanne oyddu araatati de7oosona; enta bolla bootha ma7o ma7idi, huuphen worqa kallachaa wothida laatamanne oyddu cimati uttidosona. 5 Araatape wol7anthi, guunthinne deshoy keyees. Araata sinthan laapun poo7iya xompeti de7oosona; enti laapun Xoossaa ayyaanata.[b] 6 Araata sinthan birille daaniya phooliya burcuko abbay de7ees.[c][d]
Sintharanne guyera ayfey de7iya oyddu de7ora de7iya medhetethati araata yuushuwaninne araata giddon de7oosona. 7 Koyro medhetetha medhoy gaammo daanees; nam7anthoy boori daanees; heedzanthoy ase daanees; qassi oyddanthoy piradhiya arganthi daanees. 8 Oyddu medhetethata ubbaas usupun qefey de7ees; enta asatethaa ubbay ayfen kumis.[e] Enti qammanne gallas qanxonna,
“Geeshshaw, geeshshaw, geeshshaw,
Godaw, Ubbaafe Wolqaama Xoossaw,
Kaseka, ha77ika de7eyso, sinthafe yaanayso”
yaagosona. 9 He medhetethati araatan uttidaysasinne merinaw de7eysas saba, bonchonne galata immida wode, 10 laatamanne oyddu cimati araatan uttidaysanne merinaw de7eysa sinthan gufannidi goyinnidosona; banta kallachaa araata sinthan wothidi,
11 “Nu Godaw, nu Xoossaw,
neeni boncho, sabanne wolqaa ekanaw bessaasa.
Neeni ubbaa medhadasa;
ubbabay ne sheniyada hanis, medhetis”