Link to home pageLanguagesLink to all Bible versions on this site

1 Yaatin, salon daro asay,

“Xoossay galatetto!
Atotethay, bonchoynne wolqay nu Xoossaas gido.
2 Iya pirday tumanne xillo.
Sa7aa tunisida iita laymiw Xoossay pirdis.
Xoossay ba aylleta suuthaa iipe achis”
yaagishin si7as.[a]

3 He asay zaaridi banta qaala dhoqu oothidi,

“Xoossa galati gako.
He katamiya merinaw cuyashe daana”
yaagidosona.[b]

4 Laatamanne oyddu cimatinne de7on de7iya oyddu medhetethati araatan uttida Xoossaas gufannidi,

“Amin7i! Xoossa galati gako”
yaagidi goyinnidosona.

5 Yaatin,

“Xoossa aylleti,
Xoosse yayiya guuthinne giti ubbay,
nu Xoossaa galatite”
giya qaalay araatape keyis.[c]

6 Yaatin, daro asada wocamiya, wolqaama shaafada guummiya, dadada dechiya girsay,

“Xoossaa galati gako;
nu Goday, Ubbaafe Wolqaama Xoossay kawotis.[d]
7 Dorsaa yaaganoy gakida gishonne iya geliyara giigida gisho,
nu ufaytoos, galatoosinne Dorsaa bonchoos.
8 Gelos giigidaara phooliyanne geeshshi gidida
liino ma7ana mela iw imetis”
yaagishin ta si7as. (Liino ma7oy geeshshata xillo ooso leemiso.)

9 Hessafe guye, kiitanchoy taako, “Dorsa yaagano xeegetidaysati anjetidaysata” gada xaafa. He kiitanchoy gujidi, “Haysi Xoossaa tuma qaala” yaagis.[e]

10 He wode ta iya goyinnanaw iya tohuwa bolla kundas. Shin I, “Hessa oothofa! Taani Yesuusaba markatiya ne melanne ne ishata mela. Ne Xoossaa goyinna” yaagis. Hiza, Yesuusaba markatidaysatas nabetetha ayyaani de7ees.

Bootha Para Toggidaysa
11 Yaatin, saloy dooyetin, yan bootha pari de7eysa be7as. He para toggidaysi Ammanetidaysanne Tumancho geetetees. I xillotethan pirdesinne oletees.[f] 12 Iya ayfey tama laco daanees; iya huuphen daro kallachi de7ees. Iya bolla I attishin, hari oonika eronna xaafetida sunthi de7ees.[g] 13 I suuthan muuketida ma7o ma7is; iya sunthayka Xoossaa Qaala. 14 Phooliyanne geeshshi gidida liino ma7ida salo olanchoti bootha parata toggidi iya geedo kaalloosona. 15 Kawotethata qanxiya qara mashshay iya doonape keyees. I birata xam7an asaa haarana. Ubbaafe Wolqaama Xoossaa hanqo woyne ushsha gum7iya bessaa I yedhana.[h] 16 Iya ma7uwa bollanne iya wodiriya bolla, “Kawota Kawuwanne godata Godaa” giya sunthay xaafetis.

17 Hessafe guye, issi kiitanchoy awa bolla eqidaysa be7as. He kiitanchoy salora piradhiya kafo ubbaas ba qaala dhoqu oothidi, “Haa yiite! Xoossaa gibira maanaw issi bessi shiiqite.[i] 18 Yidi kawota ashuwa, shaalaqata ashuwa, wotaadareta ashuwa, parata ashuwa, parata toggeyisata ashuwa, asa ubbaa ashuwa, aylleta ashuwa, womaannota ashuwa, gitatanne guuthata ashuwa miite” yaagis.

19 Do7ay, para toggidaysaranne iya olanchotara oletanaw sa7a kawotinne enta olanchoti issi bessi shiiqidashin be7as. 20 Shin he do7aynne iya sunthan malaatata oothida wordo nabey iyara issife oyketis. He malaatatan do7aa mallay de7eysatanne iya misiliya goyinneyisata I balethis. Do7aynne wordo nabey nam7ayka diinnen eexiya tama abban paxa yegetidosona.[j] 21 Attidaysati para toggidaysa doonape keyiya mashshan hayqidosona. Kafoti ubbay enta ashuwa midi kallidosona.

<- Yohaanisa Qoncethi 18Yohaanisa Qoncethi 20 ->