29
Xoossa Gitatetha Sabo
Dawita Mazmure
1 Hinteno salo medhetethato,
bonchoynne wolqay Godaasa giite.
2 Godaa boncho sunthaa galatite;
iya geeshshatetha teema gisho Godaa goyinnite.
3 Godaa guunthay haathata bolla si7etees;
boncho Xoossay dadada dechees;
Goday gita haathata bolla guummees.
4 Godaa kooshinchay wolqaama;
Godaa girsay teemara de7ees.
5 Godaa girsay zigaa menthees;
Libaanosen de7iya zigaa menthees.
6 Libaanose dereta galo marada buraaqisees;
Siriyoona deriya[a] menthada gufisees.
7 Godaa girsay wol7amees.
8 Godaa girsay mela biittaa qaathees;
Goday Qaadesa mela biittaa kokorsees.
9 Godaa girsay wolaa qaathees;
mitha haythaa qoqofees.
Iya keethan de7iya ubbay,
“Bonchoy Godaas gido” yaagees.
10 Goday di7o haatha bolla
ba araata wothidi uttis;
Goday ba araatan uttidi merinaw kawotis.
11 Goday ba asaas wolqa immees.
Goday ba asaa sarotethan anjees.
<- Mazmure Maxaafa 28Mazmure Maxaafa 30 ->
- a Siriyoona deriya: Hermoona deriyas hara sunthi