Abdiyu Maxaafa

Gaatha Qofa

Ha Abdiyu maxaafay, hayqo abbaafe dugeha baggan de7iya Edoome bolla gakana pirda odees. Edoome asay, Yisaaqa nayta, Eesawu sheeshata. Entika Yayqooba isha Eesawu banta mayzan ceeqitiya gisho Isra7eele dabbota. Ha qantha maxaafay Yerusalaamey K.Y.S. 586 laythan laaletidaape guye de7iya woden xaafetis.

Abdiyu maxaafay nam7u kifiletan shaaketees.

1. Paydo 1-14 gakanaw de7iya kifiley, Edoome asay banta otoro nagara gishonne Yihuda kundethaninne Yerusalaame laaletethan ufaytida gisho pirdetanaw de7eysa entaw odees.

2. Paydo 15-21 gakanaw de7iya kifiley, Edoomey Isra7eele morketara issife xoonetanaysanne iita pirda ekanaw de7eysa odees.

Maxaafa Ayfe Qofata

Edoome otoruwanne pirdetetha (1-9)

Edoome wozana minotethi (10-14)

Isra7eeley xoonana (15-21)

1 Abdiyuy be7ida qoncethaa. Godaa Xoossay Edoomeba haysada yaagees:

Edoomeba Goday, ba kiittiya addiya bolla kawotethatas kiittidaysa nuuni si7ida; “Dendite! Edoome olanaw boos” yaagis. 2 “Heko, ta nena kawotethata giddon laafa kessana; neeni daro kadhetidaysa gidana. 3 Neno, zaalla qopho giddon de7eyso, ne keethaa dhoqa dereta bolla keexidayso, ne wozanan, ‘Tana haysafe sa7an wodhisanay oonee?’ yaageyso, nena ne wozanaa otoroy cimmis. 4 Ne arganthada pude haakada piradhikoka, ne keethaa xoolintota giddon keexikoka, ta nena yaape duge wodhisana” yaagees Xoossay.

5 “Kaysoy woyko banqiya asi qamma yiiko, bantaw gideysa mela xalaala kaysotokonayee? Woyne maxeysati maxishe, poshile ashshokonaayee? Shin ne morketi nena polo dhaysana. 6 Abeeti Eesawey waanidi bonqetandee? Qosan de7iya iya shaloy waanidi eketandee? 7 Neera caaqidaysati ubbay nena ne biittafe gooddana; qassi ne ammanetida laggeti cimmidi nena xoonana. Ne kathaa midaysati ne ogen gite yeggana, shin neeni hessa akeekaka” yaagees.

8 “He gallas taani Edoomepe cincatanne Eesawe zumaape akeeka dhaysana. 9 Hinteno, Temaana asato, hinte olanchoti dagammana; Eesawe zuma bolla de7iya asa ubbay goyretana” yaagees Goday.

10 Ne ishaa Yayqooba bolla ne oothida iitabaa gisho, ne yeella ma77ana; ne merinaw dhayana. 11 Imathatinne allagati iya shaluwa bonqiya gallas neeni gaxa keyada eqa xeelladasa. Qassi iya pengera gelidi, Yerusalaame katamaa bolla saama yeggiya wode neeni entafe issuwa mela gidadasa. 12 Neeni ne ishay metootiya gallas iya metuwan ufaytanaw bessennashin; Yihuda asaa bolla waayey gakiya gallas hashshu gaanaw bessennashin. Enta un7a gallasan otoron odetanaw bessennashin! 13 Neeni enta metuwa gallas ta asay de7iya katamaa gelanaw, enta waayan neeni ufaytanawunne enta metuwa gallas enta shaluwa bonqanaw bessennashin! 14 Baqateyisata wodhanaw neeni daggala ogen naaganawunne attidaysata enta un7aa gallas morketas aathada immanaw bessennashin!

15 Godaa pirda gallasay kawotethata ubbaa bolla matis. Neno Edoome, neeni harata bolla oothidabay ne bolla oosetana; ne oosoy ne bolla simmana. 16 Ta geeshsha zumaa bolla ne uyidaysa mela kawotetha ubbay qanxonna uyana; gujidika uyana; enti kase hani eronnabaa hanana.

17 “Shin Xiyoone zuman kessi ekidaysati daana; Xiyooney geeshshi gidana; Yayqooba kochay banta biitta zaari laattana. 18 Yayqooba kochay tama gidana; Yoosefa kochay laco gidana; Eesawe kochay buure gidana. Tami buure meysada, Yayqooba zerethaynne Yoosefa kochay Eesawe kochaa midi polo dhaysana” yaagees Goday.

19 Negebe mela biittan de7iya asay Eesawe zuma laattana; gadha biittan de7iya asay Filisxeeme biitta, Efreema biittanne Samaare biitta laattana. Qassi Biniyaame kochay Galada biitta laattana. 20 Di7etethafe simmida Isra7eele asay, Kanaanepe bidi Sirafta gakanaw de7iya biitta laattana. Yerusalaamepe de7etidi, Safarada geetetiya bessan de7iya asati Negebe katamata laattana. 21 Ashsheysati Eesawe asaa haaranaw Xiyoone zuma bolla keyana; kawotethay Godaaba gidana.