1 Goday Museko, 2 “Isra7eele asaas haysada gada oda; hinte Kanaane geliya wode ta hintew laata oothada immana biitta zaway haysa. 3 Dugeha bagga zaway Siina mela biittafe dendidi Edoome zawa kanthees. Doloha baggara hinte zaway Maxine Abbaafe duge baggara doomidi, 4 Aqirabima aadhiya bessaa shaakidi Siina biitta bazzuwa kanthidi dugeha baggara Qaades-Barne gakees. Yaape Hadar-Adaara kanthidi Aximoona gakees. 5 Aximoonape dendidi Gibxe shaafa guye simmidi Medetiraane Abbaa gakees.

6 “Wuloha bagga zaway Medetiraane Abbaa gaxa gidana.

7 “Pudeha bagga zaway Medetiraane Abbaa kaallidi Hoora zuma gakanaw bees. 8 Hoora zumaape Hamaata geliya bessaa gakanaw bees; he zawa wursethay Xadaada. 9 Yaape dendidi Zifiroona gakidi, Haxar-Enaanan eqees; pudeha bagga zaway haysa.

10 “Doloha bagga zaway Haxar-Enaanape Safaama mallaa gakees. 11 Safaama mallafe dendidi Aynape doloha baggara Irbila duge wodhidi Kenereeta Abbaafe doloha baggara de7iya zumata gakees. 12 Hessafe hinte zaway duge Yordaanose shaafa wodhi zawaydi Maxine Abbaa gakees. Hinte biitta yuusho zawati haysata” yaagis.

13 Musey Isra7eele asaa haysada yaagidi Kiittis; “Uddufun bagga kochaas hinte saama yeggidi shaakana laata biittay haysa. 14 Robeela kochay, Gaade kochaynne Minaase kochaafe baggay, 15 banta laata Iyaarkofe hefinthan, Yordaanose Shaafape doloha baggan ekidosona” yaagis.

16 Goday Museko, 17 “Kahiniya Alaazaranne Nawe na7aa Iyyasuy he biitta asaas shaako. 18 Qassi biitta shaakanaw maadana mela issi issi kochaafe issi issi halaqa doorite.” 19 Enta sunthay haysafe kaallidi de7eysa.