1 Goday Museko, 2 “Isra7eele asaa haysada yaaga; hinte daana mela ta hintew immiya biitta geliya wode, 3 xuussa yarsho gidin woyko gaso yarsho gidin woyko dosan yarshiya yarsho gidin woyko ba7aale gallasa yarsho gidin, mehepe woyko dorsaafe Godaas taman xuugetiya sawiya yarsho yarshite. 4 Yarshuwa yarshiya uray katha yarshuwas issi kilo giraame lo77o dhiille sayso litiro shamaho zayten munuqetidaysa eho. 5 Qassi xuussa yarshos woyko hara yarshos ehiya issi issi dorsaara sayso litiro woyne ushsha yarsho oothidi giigisite. 6 Maraze yarshiya wode nam7u kilo giraame lo77o dhiille issi litironne bagga shamaho zayten munuqetidaysa ehite. 7 Ushsha yarshuwas siko litiro woyne ushsha yarshuwas ehite. Hessi Godaas sawiya yarsho gidana. 8 Gaso woyko issifetetha yarshos wofaano xuussa yarsho oothada Godaas yarshiya wode, 9 wofaanuwara issife heedzu kilo giraame lo77o dhiille, nam7u litiro shamaho zayten munuqetidaysa katha yarsho oothada eha. 10 Ushsha yarshuwas bagga litiro woyne ushsha ehite. Hessi Godaas sawiya xuussa yarsho gidana.

11 “Issi issi wofaanoy woyko issi issi marazey woyko issi issi koley yarshetiya wode haysada hanidi ooseto. 12 Daro mehey yarshetiya wode yarshetiya katha yarshoyka hessada daro. 13 Isra7eele asi gidida oonika sawiya xuussa yarsho Godaas yarshiya wode ubban haysada oothanaw koshshees. 14 Yaana yeletethan hinte giddon de7iya bete woyko hara asi oonika sawiya xuussa yarsho Godaas yarshanaw koyiko hessada oothanaw koshshees. 15 Hintewunne hinte giddon de7iya bete asaas he wogay issino; hessi yaana yeletethaaska eqidi daana woga; Hinteka bete asatika Godaa sinthan issino. 16 Hintewunne hinte giddon de7iya bete asaas higgeynne wogay issino” yaagis.

17 Goday Museko, 18 “Isra7eele asaas haysada gada oda; taani hintena efiya biitta hinte gelidi, 19 he biittan kaxiya kathi hinte miya wode he kathaafe xeera kessidi hinte Godaas yarshite. 20 Hessika, bayra kaxida kathaafe uukida koyro uythi, gidishin, kathi bukiya wudumaafe immiya yarsho oothidi yarshite. 21 Yeletetha ubban hinte biittan kaxida kathaafe koyruwa uukidi Godaas yarsho yarshite.

22 “Goday, Muses odida kiitaa hinte eronna ixidi naagonna attiko, 23 woyko Goday iya baggara immida kiita ubbaa, Goday immida gallasaape doomidi yaana yeletetha gakanaw naagonna ixiko, 24 qassi hessa Isra7eele maabaray eronna oothidaba gidiko maabara ubbay Godaas issi wofaano sawiya xuussa yarsho oothidi, wogay kiiteysada katha yarshuwaranne ushsha yarshuwara yarsho; qassi nagara yarsho oothidi issi kole yarsho. 25 Kahiney kumetha Isra7eele maabaraas nagara atotetha yarsho shiishees. Enti eronna balida banta naaquwa gisho Godaas xuussa yarshonne nagara yarsho yarshida gisho enta nagaray atto geetetana. 26 Isra7eele maabaraynne enta giddon de7iya bete asay eronna he bala oothida gisho asa ubbaa nagaray atto geetetana.

27 “Issi asi eronna nagara oothiko issi laytha kole nagara yarsho oothidi yarsho. 28 Eronna de7ishe nagara oothida uraas kahiney Godaa sinthan nagara atotetha wogaa polo; iya nagaray atto geetetana. 29 Eronna nagara oothida uraas kahiney Godaa sinthan nagara atotetha wogaa polo; iya nagaray atto geetetana.

30 “Shin Isra7eele asi gidin woyko bete asi gidin erishe otoron nagara oothiya uray Godaa cayees. He uray deriya giddofe dhayo. 31 He uray Godaa kiitaa erishe kadhida gishonne iya kiitaa kawushida gisho iyaw dhayoy bessees. Iya balay iya bolla gido” yaagis.

32 Issi gallas Isra7eele asay mela biittan de7ishin, issi uray Sambaata gallas mithi mixishe oyketis. 33 He uraa asay Museko, Aaronakonne Isra7eele maabaraako ehidosona. 34 Enti iya bolla oothanaba eriboona gisho qashon gam7isidosona. 35 Hessafe guye, Goday Museko, “Ha uray hayqanaw bessees; Isra7eele maabaray banta gutaape gaxa kessidi shuchan caddidi wodho” yaagis. 36 Yaatin Isra7eele maabara ubbay Goday Muse kiitidaysada, gutaape gaxa kessidi shuchan caddidi wodhidosona.

37 Goday Museko, 38 “Isra7eele asaas haysada gada oda; hintenne yaana yeletethay hinte afilaa gaxan macara kessidi he macara gaxan kaalose qacina sikite. 39 He macaraa hinte be7iya wode ubban ta kiitata, akeekidi poleeta; taape haakidi hinte ayfiya amuwanne hinte wozanaa qofaa kaallidi laameteketa. 40 He macaraa be7idi hinte ta kiita ubbaa akeekidi polananne Xoossaas dummatidaysata gidana. 41 Taani Godaa, hinte Xoossaa; ta hinte Xoossaa gidanaw hintena Gibxefe kessas. Taani Godaa, hinte Xoossaa yaaga” yaagis.

<- Taybo Maxaafa 14Taybo Maxaafa 16 ->