1 Goday Museko, 2 asaa shiiqos xeeganawunne dunkaanida gutaape denthanaw maaddiya nam7u moyzeta birape qoxada medha. 3 Ha nam7u moyzeti punetiya wode asa ubbay Geeshsha Dunkaaniya pengen neeko shiiqo. 4 Shin issi moyze xalaali punetiko, Isra7eele kochaa halaqati ne sinthe shiiqo. 5 Moyzey koyro punetiya wode Geeshsha Dunkaaniyape doloha baggan dunkaanida kochay dendo. 6 Moyzey nam7antho punetiya wode dugeha baggan dunkaanida kochay dendo. Moyzey hessatho punetiya wode gutaape dendanaw malla gido. 7 Asa shiishanaw moyze punna, shin hankoysada dumma mallara punnofa. 8 Kahineti, Aarona nayti moyze punno. Haysi newunne yaana yeletetha ubbaas merina woga gido.

9 “Hinte gadiya bolla ola denthida hinte morkiyara hinte oletanaw keyiya wode he moyzeta goochidi punnite. He wode Goday, hinte Xoossay hintena akeekidi, hinte morketape ashshana. 10 Hinte ufaysa gallasatan hessika ageena xeeron, eretida ba7aaletan, xuussa yarsho wodeninne issifetetha yarsho wode moyze punnite. Hessi Xoossaa sinthan hintena akeekisiyaba gidana. Taani Godaa, hinte Xoossaa” yaagis.

11 Asay Gibxefe keyin, nam7antho laythan, nam7antho ageenan, laatamantho gallasan, shaaray Geeshsha Dunkaaniya bollafe dendis. 12 Yaatin asay Siina mela biittafe maaran maaran dendidosona; shaaray Paarana mela biitta gakidi wodhis. 13 Goday Muse kiitidaysada enti baanaw koyro dendidosona.

14 Koyro Yihuda kochaa baggan dunkaanida kochay banta mala ekidi keyidosona. Entana kaalethey Amnadaabe na7aa Na7asoona. 15 Yisakoora kochaa kaalethey Zu7ara na7aa Natina7eela. 16 Zabloona kochaa kaalethey Heloona na7aa Eli7aaba.

17 Yaatin, Geeshsha Dunkaaney shodetin, Gedisoona kochatinne Meraara kochati tookidi dendidosona.

18 Kaallidi Robeela kochaa baggan dunkaanida kochay banta mala oykide keyidosona. Robeela kochaa kaalethey Shade7ura na7aa Elizuura. 19 Simoona kochaa kaalethey Zurishadaya na7aa Salumi7eela. 20 Gaade kochaa kaalethey Ragu7eela na7aa Eliyasaafa.

21 Yaatin Qahaata kochay geeshsha miisheta tookidi dendidosona. Enti kaalliya guta gakanaape sinthe Geeshsha Dunkaaney toketidi uttees.

22 Kaallidi Efreema kochaa baggan dunkaanida kochati banta malla oykidi keyoosona. Efreema kochaa kaalethey Amhuda na7aa Elishama7a. 23 Minaase kochaa kaalethey Padazuura na7aa Gamali7eela. 24 Biniyaame kochaa kaalethey Gadiyoona na7aa Abdaana.

25 Wursethan Daane kochaa baggan dunkaanida kochay, ubbaas guye baggara kate gididi, banta malaoykidi keyidosona. Daane kochaa kaalethey Amsadaya na7aa Aki7ezera. 26 Aseera kochaa kaalethey Okraana na7aa Pagi7eela. 27 Niftaaleme kochaa kaalethey Enaana na7aa Akira. 28 Isra7eele asay banta zerethan zerethan gutaape dendidi biya maaray hessa.

29 Musey Midiyaame addiya Ragu7eela na7aa Hobaabako, “Goday nuus immana gida biitta laattanaw boos; Goday Isra7eele anjana gida gisho nuura yedha; nuuni new lo77oba oothana” yaagis.

30 Yaatin Hobaabi, “Akay, taani ta biitta ta dabbotako baana” yaagis.

31 Musey zaaridi, “Hayyana, nuna yeggada boopa. Nu biya mela biittan nuuni dunkaanana bessaa ne eraasa; nu baana ogiya nuna kaalethanaw danda7aasa. 32 Neeni nuura biiko, Goday nuus immiya anjuwa ubbaa Nu new shaakana” yaagis.

33 Asay Godaa zumaape dendidi, heedzu gallasa oge bidosona. Godaa caaqo Taabotey enti shempana bessi koyishe heedzu gallas entafe sinthe sinthe bis. 34 Enti dunkaanida gutaape dendiya wode ubban Godaa shaaray gallas gallas entafe bollara de7ees. 35 Taabotey dendiya wode ubban Musey, “Abeeti Godaw, denda; ne morketi laaleto; nena ixeysati ne sinthafe baqato” yaagees. 36 Taabotey shempiya wode ubban Musey, “Abeeti Godaw, daro mukulan taybetiya Isra7eele asaako simma” yaagees.

<- Taybo Maxaafa 9Taybo Maxaafa 11 ->