1 Salatiyaala na7aa Zarubaabelaranne kahine halaqaa Iyyasura di7ope simmida kahinetinne Leeweti haysata:

Saraya, Ermiyaasa, Izira, 2 Amaare, Maluka, Haxusa, 3 Sakana, Rehuuma, Maremoota, 4 Ida, Ginetoona, Abiya, 5 Miyamina, Ma7ada, Belga, 6 Shama7a, Yoyaariba, Yadaya, 7 Saala, Amoka, Hilqiyaanne Yadaya. Haysati Iyyasu laythan kahinetasinne yaratas halaqa gididaysata.

8 Entara issife simmida Leeweti Iyyasu, Binuya, Qadimi7eela, Saraba, Yihudanne galata mazmure zamareyisata halaqa gidida Mataana. 9 Entara issife zamariya Baqbuqeynne Unoy entafe sinthara haa simmi eqidi yexoosona.

10 Iyyasuy Yoyaaqima yelis; Yoyaaqimi Eliyaseeba yelis; Eliyaseebi Yoyada yelis; 11 Yoyadi Yoonataana yelis; Yoonataani Yadu7a yelis. 12 Yoyaaqimi kahine halaqa gididi de7iya laythi, haysafe kaallidi xaafetidaysati kahineta yarata halaqata.

Saraya yaraa halaqay Maraya.

Ermiyaasa yaraa halaqay Hananiya.

13 Izira yaraa halaqay Masulaama.

Amaare yara halaqay Yehohanana.

14 Maluka yaraa halaqay Yoonataana.

Sabana yaraa halaqay Yoosefa.

15 Harima yaraa halaqay Adina.

Marayoota yaraa halaqay Hilqaya.

16 Ido yaraa halaqay Zakaryaasa.

Ginetoona yaraa halaqay Masulaama.

17 Abiya yaraa halaqay Zikira.

Miniyaminanne Ma7ada yaraa halaqay Pilxaya.

18 Bilga yaraa halaqay Samu7a.

Shamaya yaraa halaqay Yoonataana.

19 Yoyaariba yaraa halaqay Matanaya.

Yadaya yaraa halaqay Oza.

20 Salaya yaraa halaqay Qalaya.

Amoka yaraa halaqay Ebeera.

21 Kelqe yaraa halaqay Hasabaya.

Yadaya yaraa halaqay Natina7eela.

22 Leeweta halaqati Eliyaseebi, Yoyada, Yohaaninne Yadu7i kahine halaqa gidida dumma dumma laythan enti xaafetidosona. He mazgabey giigiday Farse biitta kawa Daariyosa laythana. 23 Gidoshin, Leeweta yarata halaqati mazgaben xaafetiday Eliyaseeba na7aa na7a gidida Yohaani hayqana gakanaw de7iya wode xalaalana.

24 Leeweta halaqati Hasabaya, Sarabanne Qadimi7eela na7aa Iyyasu. Enti Xoossa asi gidida kawoy Dawiti kiittidaysada, nam7an shaaketi eqidi, taran taran Xoossaa bonchoosonanne galata mazmure yexoosona.

25 Xoossa keetha gimbe dirsaa pengiya matan keexetida dumma dumma miishe wothiya keethaa naageysati Mataana, Baqbuuqa, Abdiyu, Masulaama, Xalmoonanne Aquba. 26 Haysati Yoxedeqa na7aa na7aa gidada Iyyasu na7aa Yoyaaqimey, biitta aysiya Nahimeynne kahinenne xaafe gidida Iziri de7ida laythan oothidosona.

27 Yerusalaame gimbe dirsay gimbetidi wurida ba7aale bonchiya wode Leeweti banta de7iya bessaafe koyetidi, daalan, diithan, maasinqon, galata mazmure yexishe ufaysan ba7aale bonchanaw Yerusalaame yidosona. 28 Ha baaliya bonchanaw zammaareti Yerusalaame heeran de7iya Naxoofata gutatape, 29 Beet-Gelgalape, Gib7apenne Azmaawetape shiiqidosona. Enti Yerusalaame heeran bantaw gutata keexidosona. 30 Kahinetinne Leeweti bantana wogada geeshidaape guye asaa, pengetanne gimbe dirsaa geeshshidosona.

31 Taani Yihuda halaqata gimbe dirsaa bolla kessas. Nam7u gita mazmure koyreta galata mazmure yexana mela oothas. Issi koyrey gimbiya huuphesoora ushachi simmidi, Pito Penge bagga bis. 32 Hoshayanne Yihuda halaqatape baggati entana kaallidosona. 33 Entara de7iya harati Azaara, Izira, Masulaama, 34 Yihuda, Biniyaame, Shama7iya, Ermiyaasinne 35 moyze punniya guutha kahineti kaallidosona. Entana kaallidi yiday Zakaryaasa; Zakaryaasi Yoonataana na7a; Yoonataani Shama7a na7a; Shama7i Mataana na7a; Mataani Mikaya na7a; Mikayey Zakura na7a; Zakuri Asaafa na7a. 36 Zakaryaasa yara gidida Shama7ey, Azari7eeli, Milaala, Gilaalay, Ma7ayey, Natina7eeli, Yihudinne Hanaani Xoossa asi gidida Dawiti zammariya wode go7etiya mazmure miishiya ubbaa ekidi, Zakaryaasa kaallidosona. Enta kaalethey xaafiya Izira. 37 Pulto Pengiya gakidaape guye Dawita Katamaako simmidi, gimbiya bolla keyidi, Dawita keethaafe pude baggara aadhidi, doloha baggara de7iya Haatha Pengiyako bidosona.

38 Nam7antho koyrey gimbiya huuphiya oykidi haddirsi simmidi bis. Taani asaape baggara gidada entafe guyera kaallas. Itoone Adussa Gimbiya aadhidi, Dalga Gimbiya bessaa gakida. 39 Yaape simmidi, Efreema Pengiya, Yeshaana Pengiya, Molo Pengiya, Hanaani7eela Adussa Gimbiyanne Xeetata Adussa Gimbiya gakanaw bida. Wursethan Dorsa Pengiya matara aadhidi Naageyisata Pengiya gakidi eqida.

40 Galata mazmure yexiya nam7u koyreti Xoossa keethan banta besse besse oykidosona. Qassi taka taara de7iya halaqatara yaa gakas. 41 Hessadaka, kahineti Eliyaqeemi, Ma7iseyi, Miniyamini, Mikayey, Eliyo7ani, Zakaryaasinne Hanaani banta moyziya oykidi, 42 Ma7iseyi, Shamayey, Alaazari, Uzi, Yehohanani, Malkiyey, Elaaminne Exeri banta bessaa bessaa oykidosona. Yizira enta kaalethin banta qaala dhoqu oothidi mazmure yexidosona.

43 He gallas daro yarsho yarshidosona. Xoossay entaw gita ufaysi immida gisho daro ufaytidosona. Maccasay nayti ubbay ufaytidosona. Yerusalaamen asay ufaytiya ufaysa kooshinchay haahon si7etees.

44 He gallas asay immiya imotata, asraatanne laythan kaxiya katha ayfiyape koyruwa shiishidi wothiya keetha naagiya halaqata dooridosona. Ha dooretida asati dumma dumma katamatan de7iya goshshatape higgey kiitteysada kahinetasinne Leewetas bessiya kathaa shiishosona. Ayis giiko, Yihuda asay kahinetinne Leeweti oothiya oosuwan daro ufaytidosona. 45 Enti Xoossay kiitidaysa oothidosona; geeshsho wogaa polidosona. Enta xalaala gidonashin zammaretinne naageysati Dawitinne iya na7aa Solomoney kiitida oosuwa polidosona. 46 Beni Dawita wodenne Asaafa wode zammaretinne Xoossas shiiqiya galata mazmureta kaalethiya halaqati de7oosona. 47 Zarubaabela laythaninne Nahime laythan Isra7eele asa ubbay zammaretasinne naageysatas bessiya kathaa gallas gallas immoosona. Leewetaska bessiya kathaa immoosona. Leeweti qassi Aarona yara gidida kahinetas bessiya kathaa immoosona.

<- Nahime Maxaafa 11Nahime Maxaafa 13 ->