Nahoome Maxaafa

Gaatha Qofa

Nabey Yoonasi Nanawes tinbite odidi simmin, xeetu laythafe guye, Nahoomey zaaridi Nanawe bolla tinbite odana mela Xoossay iya xeegis. Gidoshin, Yoonasa wode asay banta nagara paaxidi simmidaysada ha77i simmibokona. Ha nam7u nabetape giddon, Asoorey Isra7eele olada dhaysasu.

Maxaafay, Asoore waanna katama gidida Nanaweba heedzu tinbite oykis.

1. Shempo 1, nagarancho ubba bolla Xoossay ba pirda ehanaw de7eysa, ubbaafe aathidi Nanawey pirdetonna attonaysa odees.

2. Shempo 2, mata woden Nanawey pirdetanaysanne he pirday ay daaniyako odees.

3. Shempo 3, Nanawe nagara paadidi bessidaape guye, Xoossay ba pirdan xillo gideysa odees.

Nahoome maxaafay Isra7eele kacaama morke gidida Nanawe waanna katama kundethaa malaalsiya ginxon qoncisis.

Maxaafa Ayfe Qofata

Xoossa oonatethinne iya pirda (1:1-15)

Nanawe kundethay attenna (2:1-13)

Nanawe kundethas gaasota (3:1-19)

1 Elqosha kataman de7iya Nahoomi Nanaweba odida qaalaynne be7ida qoncethay haysa. 2 Goday qanaateysanne halo keyiya Xoossi; Goday halo keyeysanne hanqon kumidaysa. Goday baara eqeteyisata halo keyees; ba morketa seeranaw giigeti uttis. 3 Goday hanqetanaw ellesenna; iya wolqay gita; I qohidaysa seeronna aggenna.

Godaas gotiyanne hobbiya giddora ogey de7ees; shaaray iya tohoy yedhin dendiya baana. 4 I abbanne shaafa hanqidi melisees; Baasanenne Qarmeloosi shulloosona. Libaanose ciishshay qoqofetees. 5 Iya sinthan dereti qaaxoosona; zumati til7oosona. I qonciya wode biitti qaaxana; sa7an de7iya ubbay kokorana. 6 Iya hanquwa sinthan eqanay oonee? Iya hanquwa suulaa danda7anay oonee? Iya hanquwa tamada bukiya wode zaallati za77idi phalqetoosona.

7 Goday lo77o; meto gallas qosetidi attiya besse; I banan ammaneteyisata erees. 8 Shin I ba morketa di7on muukidi dhaysana; baara eqeteyisata dhuman gelsana.

9 Hinte Godaa bolla maqetey aybisee? I hintena kumthi dhaysana; metoy zaari dendenna. 10 Hinte mathotidi gandigareysati, wolira oyketida agunthinne buurey taman xuugetiya mela hinte taman xuugetidi dhayana. 11 Nanawe, Godaa bolla iitabaa maqeteynne iita zore zorey ne giddofe keyis.

12 Goday, “Nanaweti minonne daro gidikoka, shodetidi dhayana. Taani kase Yihuda asaa un7ethas, shin hizape guye un7ethike. 13 Taani ha77i Asooreta qambara hinte gannaafe menthana; hinte qashetida santhalaata duuserethana” yaagees.

14 Nanawe, Goday ne bolla pirdida pirday haysa: “Hizape guye ne sunthaa xeegisiya koche new deenna. Ne xoossata keethan de7iya misiletanne eeqata taani dhaysana. Neeni pathonnaba gidiya gisho, taani ne duufuwa bookana” yaagees.

15 Heko, lo77o wore odishenne sarotethaa awaajishe kiitetidi yeysa tohoy deriya bollara gakis. Yihuda asaw, hinte morketi kumthi dhaydosona; enti zaaridi hinte biitta olidi oykokona. Hessa gisho, hinte ba7aaleta bonchite; hinte qangetha gathite.

Nahoome Maxaafa 2 ->