1 Iitabaa halcheyisata, qassi banta hiixan de7ishe, gene waati oothaneko qopeyisata ayye! Wolqay enta kushen de7iya gisho, sa7i wontiya wode banta qofaa poloosona. 2 Enti goshsha gade koyiko, wolqan ekoosona; keethe koyiko wolqan oykoosona. Asa maata yedhidi, iya laata coo bonqoosona.

3 Hessa gisho, “Heko, taani hinte bolla iitabaa ehanaw qopas; hinte kessi ekanaw danda7eketa. I iita wode gidiya gisho, hinte otoron simeretanaw danda7eketa.

6 Asay taako, “Nu bolla tinbite odopa; hinte bolla haysa melabay gakana gada nu bolla tinbite odopa. Hessa mela kawushabay nuna gakena” yaagosona.

7 Taani entako, “Yayqooba kochato, Godaa danda7ay wurdeyee? I hessa malaba oothiyee? Suure ogen beysatas ta qaalay lo77oba oothennee? yaagidi hinte oychanaw bessii? yaagas. 8 Shin mata wodepe doomidi, ta asay ta bolla morkeda dendis. Hirgi bayna hinte giddora aadhiya saro asaa olape qaaretidi simmiya asada oothideta. 9 Ta asaa giddon de7iya maccasata enta lo77o keethafe laaggidi kesseeta; ta anjuwa enta naytape merinaw ekideta. 10 Ha bessay tunatethaa gaason iitida gisho, dendidi biite. Haysi hintew shempo bessi gidenna. 11 Issi cimmiya wordanchoy yidi, ‘Hinte sinthafe woyne ushshaninne mathoyiya ushshan ufaytana’ yaagidi wordo tinbite odiko, I hintew nabe gidana.

12 “Yayqooba kochato, taani hintena ubbaa shiishana; taani Isra7eele asaape attidaysata tuma issife shiishana. Dorsi girben shiiqeysadanne wudey hentha bessan shiiqeysada, taani enta issife shiishana. He bessay daro asan kumana. 13 Entaw oge dooyidi kaaletheysi entafe sinthatidi keyana; entika pengiya menthidi, keyana. Goday, enta kawoy ba huuphen entaw enta sinthe aadhidi enta kaalethana” yaagees.

<- Mikiyaasa Maxaafa 1Mikiyaasa Maxaafa 3 ->