Milkiyaasa Maxaafa 3

1 “Heko, ta sinthan oge giigisana mela ta kiitanchuwa kasetada kiittana. Hinte koya Goday qoponna de7ishin ba keetha yaana. Hinte ufaysan naagiya, caaqo kiitanchoy yaana” yaagees Ubbaafe Wolqaama Goday.

2 Shin I bira seerisidi geeshshiya tama melanne ma7uwa meeciya saamuna mela gidiya gisho, I yaa gallasan danda7i eqanay oonee? Qassi I qonciya wode iya sinthan eqanaw danda7ey oonee? 3 I bira sheeshiyanne geeshshiya asada uttana. I Leewe kochata biradanne worqada geeshshana. He wode enti Godaas xillotethan yarsho yarshana. 4 He wode Yihudanne Yerusalaame yarshoy beni wodetanne aadhida laythada Godaa ufaysiyaba gidana.

5 “Hessafe guye, pirdas taani hinteko yada, bitanchota, laammeyisata, wordon caaqeyisata, oosanchota damooze diggeyisata, am7etanne yi7ota un7etheyisata, betanchotas pirda diggeysatanne taw yayyonnayisata bolla eeson markatana” yaagees Ubbaafe Wolqaama Goday.

Xoossaba Kaysoto

6 “Taani Goday laametike; hessa gisho, hinteno Yayqooba kochato, hinte dhaybeketa. 7 Hinte mayzata wodepe doomidi, ta wogape kare keydeta; iya naagibeketa. Ha77i taako simmite; taanika hinteko simmana” yaagees Ubbaafe Wolqaama Goday.

Shin hinte, “Nuuni ay ogen simmino?” yaagidi oycheeta.

8 “Asi Xoosse kaysotii? Shin hinte tana kaysotideta.”

Qassika hinte, “Nuuni nena waatidi kaysotido? yaageeta.

“Hinte asraataninne imotan tana kaysideta. 9 Isra7eele asa ubbay tana kaysotida gisho, hinte baadetidaysata. 10 Ta keethan kathi daana mela asraata ubba shaalen yeggite. Yaatidi, taani salo maskootiya dooyada anjo hintew palahisada immonna ixiko hessan tana paacite” yaagees Ubbaafe Wolqaama Goday.

11 “Kathi moonna mela taani hinte gisho, gonduwa seerana; gaden de7iya woyne ayfeyka qoqofetenna. 12 Hinte biittay daanaw injetiya biitta gidiya gisho, kawotethati ubbay hintena anjetidaysata yaagana” yaagees Ubbaafe Wolqaama Goday.

13 Goday haysada yaagees: “Hinte ta bolla mino qaala odetideta. Yaatidi qassi, ‘Nuuni ne bolla woygidi mino qaala odetido?’ yaagidi oycheeta.

14 “Hinte, ‘Xoossas ootheysi hada; iya kiita naagidi, Ubbaafe Wolqaama Godaa sinthan azzaniya asada simeretethi nuna ay maaddidee? 15 Ha77ika nuuni otoreyisata anjetidaysata goos; iita ootheysati duretoosona; hari attoshin enti Xoossaa paacisheka kessi ekoosona’ yaageeta” yaagees Xoossay.

16 He wode Godaas yayyeysati issoy issuwara odetidosona; Godayka hayzidi si7is. Godaas yayyeysatinne iya sunthaa boncheysati dogetonna mela enta hassaysiya maxaafay iya sinthan xaafetis. 17 “Enti tabaa gidana; taani oothiya gallas enti taw buzo miishe gidana; aawi baw oothiya ba na7a maareysada taani enta maarana. 18 He wode hinte simmidi xilluwanne nagaranchuwa giddon, Xoossas kiiteteysanne kiitetonaysa giddon de7iya dummatethaa be7ana” yaagees Ubbaafe Wolqaama Goday.

<- Milkiyaasa Maxaafa 2 Milkiyaasa Maxaafa 4 ->