Milkiyaasa Maxaafa
Gaatha Qofa
Milkiyaasa geetetiya suntha birshethay “Kiitetidaysa” guussu. Ha nabey, Xoossara caaqida caaquwa minthidi naagiya nabe. Eeqa goyinnoy darida wode bana naagida nabe (2:10-12); machi azina biletethi kawotida wode ba ammanetetha minthidi oykida nabe (2:13-16); asay asraatanne imota kaysotiya wode boretiya enta oosuwan walaketonna bana Xoossas immida asi.
Milkiyaasa maxaafan, nabey minthidi qofisey, kahineta gidin asay Xoossara caaqida caaquwa zaaridi oorathanaw bessees gidi odees. Xoossa derey ba duusan gidin ba goyinnuwan yeda para gididi, Godaa ogepe gaxa keyidosona. Kahinetinne derey bessiya yarsho immonnanne Xoossay entaw immida wogan boonna ixidi iya cimmanaw qopidosona. Hessa gisho, Xoossay oge giigisanawunne ba caaqida caaquwa awaajanaw ba kiitanchuwa koyroti kiittidi, ba asaa bolla pirdanawunne enta xillisanaw yaana.
Milkiyaasi ba kiita xaafida wode di7ope simmida ayhude asay ayyaana daaburaninne iita ogen de7oosona. Asay Xoossa siiquwanne ufaysa qaala sidhidi, Xoosse kiitetethi aykoka maaddenna gidi qelqisoosona. Enta ammanoy daaburiya wode goyinno wogan qelli gidi, nagara ubba oothidosona. Hessa gisho, Milkiyaasi, kahinetasinne asaas kaalliya tinbite qaala odis.
1. Xoossay pirdanaw yaanape sinthe banta nagarape simmana mela enta akeekisees
2. Xoossa bonchoynne anjoy enta bolla yoonna mela dhube gidida kiitetetha ixuwa diggana mela entaw odees
3. Suure wozananinne tumatethan Xoossakonne iya caaqo qaalako simmana mela odees.
Maxaafa Ayfe Qofata
Goday Isra7eeles asaa dosiya dosuwa (1:1-5)
Xoossa pirday kahineta bolla yaana (1:6—2:9)
Caaqo qaalay meqis (2:10-17)
Godaa yuussaa (3:1-4)
Xoosse cimo koshshenna (3:5-15)
Ammanetiya asaa woytonne iita asaa seero (3:16—4:6)

Yayqooba Dosetetha, Eesawe Ixetethaa

1 Goday Milkiyaasa baggara Isra7eele asaas odida tinbite qaalay haysa.

2 Goday ba asaako, “Ta hintena dosas” yaagees.

Shin hinte, “Ne nuna aybin dosadii?” yaageeta.

Goday zaaridi, “Eesawey Yayqooba isha gidenneyee? Shin taani Yayqooba dosas; 3 Eesawe ixas. Taani derey dariya Eesawe biitta baysa oothas; iya laata workanati gupiya mela biitta oothas” yaagees.

4 Eesawe koche gidida Edoome asay, “Nu katamati laaletikoka, nu enta zaaridi keexana” yaagikoka,

Ubbaafe Wolqaama Goday, “Enti zaaridi keexana, shin taani laallana. Asay enta, ‘Ha biittay iita biitta; ha asayka Goday merinaw hanqetida ase’ yaagana” yaagees.

5 Hessa hinte, hinte ayfen be7idi, “Heko, Goday Isra7eele biittafe karenka wolqaama” yaagana.

Boretida Yarsho

6 Ubbaafe Wolqaama Goday haysada yaagees: “Hinteno, ta sunthaa kawushiya kahineto, na7i ba aawa, aylley ba godaa bonchees. Yaatin, taani hintew aawa gidiko, hinte tana bonchiya bonchoy awunee? Taani hintew godaa gidiko, hinte taw yayiya yashay awunee? Hinte ta sunthaa kawushshideta. Hinte zaaridi, ‘Nuuni ne sunthaa waatidi kawushshido?’ yaageeta.

7 “Hinte ta yarsho bessan tuna kathi wotheta. Qassi, ‘Nuuni nena waatidi tunisido?’ yaageeta. Hinte, ‘Godaa yarsho bessay kadhetidaba’ yaagidi tana tunisideta. 8 Hinte qooqe mehe yarshiya wode hessi qoho gidenneyee? Hinte hargancho woyko wobe mehe yarshiya wode hessi qoho gidenneyee? Hinte hessa mela mehe hinte halaqaas immiyako, I hessa ekanabaanne iyan ufaytanaaba hintew daanii? yaagees Ubbaafe Wolqaama Goday.

9 “Ha77i Xoossay hintew qadhetana mela iya woossite. Wona hinte hessa mela imota iyaw immin, I hintena maaddanee?” yaagees Ubbaafe Wolqaama Goday.

10 “Hinte ta yarsho bessan hada tama eethonna mela xoossa keetha pengiya gordiya issi asi bentida gidereneshin! Ta hintenan ufaytike; hinte immiya imotaka ekike” yaagees Ubbaafe Wolqaama Goday.

11 “Awi doliyasope wulliyaso gakanaw ta sunthay kawotethata giddon wolqaama. Ubba bessan ta sunthaas ixaane cuyisananne geeshsha yarsho yarshana; ta sunthay kawotethata giddon wolqaama” yaagees Ubbaafe Wolqaama Goday.

12 “Shin hinte, ‘Godaa yarsho bessay tuna; iyan yarshetiya kathika kadhetidaba’ yaagidi iya kawushshideta. 13 Qassi hinte, ‘Haysi coo daabursi’ yaagidi, qidhidi cuttideta.

“Hinte bonqidi ehidaba woyko wobe woyko hargancho mehe yarsheeta; yaatin, taani hessa hinte kushepe ekanaw bessii? 14 Taani gita kawo; ta sunthayka kawotethata giddon bonchetidaysa gidiya gisho, Xoossas immana gidi doorida marazey iya mehiya giddon de7ishin, iya aggidi, boretida maraze yarsho shiishiya asinne cimmiya asi baadetidaba gido” yaagees Goday.

Milkiyaasa Maxaafa 2 ->