1 Ubbaafe geeshshi gidiya gisho naaqo yarsho wogay haysa; 2 Xuussa yarsho mehey shuketiya bessan naaqo yarsho mehey shuketto; iya suuthay yarsho bessa oyddu baggan wurxeto. 3 Iya modhuwa ubbaa, hessika goynaape bidi zoko meqethaa gakanaw de7iya modhuwa, ulo ashuwa kammida moodhiya, 4 nam7u kilahota, enta kammida moodhiyanne tiriya xeera baggaa ekidi yarsho. 5 Kahiney haysata taman xuussa yarsho oothidi Godaas yarsho; hessi naaqo yarsho. 6 Kahine yara gidida adde ubbay he yarsho ashuwa mo. He yarshoy ubbaafe geeshshi gidiya gisho geeshsha bessan meeteto.

7 Naaqo yarshuwanne nagara yarshuwa wogay issinno. He mehiya ashoy nagara atotethas yarshida kahiniyas imetees. 8 Oonika xuussa yarsho mehe ehin ekidi yarshiya kahiney he mehiya galba baw eko. 9 Coocen kompetida woyko oton kaxida woyko bashen uuketida ubbay he yarshuwa yarshida kahiniyas imetees. 10 Qassi zaytera munuqetida woyko munuqetonna katha yarsho ubbay Aarona adde nayta ubbaas issi gina shaaketidi imetees.

11 Issi asi issifetetha yarsho Godaas yarshiya wode iyaw de7iya wogay haysa; 12 I yarshey galata yarsho gidiko he yarshuwara issife zaytera munuqida uythu, irshoy gelonna uuketidi zayten tiyetida lee7o uythunne lo77o dhiillefe zaytera munuqetida uythu shiisho. 13 He issifetetha yarshuwara issife irshora uuketida uythaa imota oothidi yarsho. 14 He issi issi uythaafe issuwa denthidi Godaas yarsho oothidi eho. Hessi issifetetha yarshuwa suuthaa wurxida kahiniyas imeto. 15 He mehiya ashoy he gallas meeteto; wontas aybika attofo.

16 Shin iya yarshoy gaso yarsho woyko dosa yarsho gidiko he ashoy he yarshetida gallas meeteto; iyape attey de7iko wontetha gallas meeteto. 17 He ashuwape palahidi heedzantho gallas gakanaw gam7iko hessi taman xuugeto. 18 Issi asi shiishida issifetetha yarsho ashoy heedzantho gallasan meetetiko iya yarshoy eketenna; yarshoy yarshetidada taybetenna. He yarshoy tuna; iyape mida oonika ba nagaran oyshetees.

19 Tunabaa bochida ashoy meetetofo; I taman xuugetanaw koshshees. Hara ashuwa wogan tuna gidonna asi oonika maana giiko mo. 20 Shin issi asi tuna gidi uttidi, Godaas shiiqida issifetetha yarsho ashuwape miyaba gidiko, he uray asaa giddofe kuretto. 21 Issi asi tunaba bochiko, asa tunatethi gidin woyko tuna mehe gidin woyko hara ixetiya tunaba bochidi, Godaas yarshetida issifetetha yarsho ashuwape miiko, he uray ba asaa giddofe kureto.

22 Goday Museko haysada yaagis; 23 Isra7eele asaas haysada yaagada oda; korma woyko maraze woyko kole modho ashuwa moopite. 24 Hayqida mehe woyko do7i wodhida mehiya modhuwa harabas go7etitepe attishin, iyape aybaka moopite. 25 Godaas taman xuussa yarshos shiiqiya mehiya modho ashuwa miya oonika ba asaa giddofe kuretto. 26 Hinte de7iya bessan awun gidikoka, kafo suuthi woyko mehe suuthi moopite. 27 Suuthi miya oonika ba asaa giddofe kuretto.

28 Goday Museko haysada yaagis; 29 Isra7eele asaas haysada yaagada oda; Godaas issifetetha yarsho shiishiya oonika he issifetetha yarshuwafe shaakidi ba imota oothidi Godaas dummayidi yarsho. 30 Hessa I Godaas taman xuussa yarsho oothidi, ba kushen ekidi eho. Qassi modhuwa angaasuwara gathi ehidi yuusho yarsho oothidi Godaa sinthan yarsho. 31 Kahiney yarsho bessan modhuwa xuuggo; shin angaasoy Aaronasinne iya adde naytas imeto. 32 Hinte issifetetha yarshuwafe ushacha gedaa imota oothidi kahiniyas immite. 33 He ushacha geday issifetetha yarshuwa suuthaanne modhuwa yarshiya kahiniya gakiya gisho gido. 34 Taani Isra7eele asaa issifetetha yarshuwafe yuusho angaasuwan shiiqida gedaa Isra7eele asaape ekada, kahiniya Aaronasinne iya adde naytas gisho oothada immas. Hessi enta gakiya enta gisho gidiya gisho Isra7eele asay merinaw hessa entaw immishe daana.

35 Aaroninne iya adde nayti kahine gididi shuumetida gallas Godaas shiiqida xuussa yarshuwafe, hesika entaw gisho gididi imetis. 36 Goday enta kahinetethas tiyida gallas, hessa entaw immana mela Isra7eele asaa kiittis; hessi yaana yeletethan eqidi de7iya woga gidana.

37 Hiza xuussa yarshuwa, katha yarshuwa, nagara yarshuwa, naaqo yarshuwa, kahineti tiyetiya wode yarshetiya yarshuwanne issifetetha yarshuwa wogay haysa. 38 Isra7eele asay Siina mela biittan banta yarshuwa Godaas yarshana mela Goday kiitida gallas, Siina zuma bolla Goday Muse kiitida wogay haysa.

<- Leeweta Maxaafa 6Leeweta Maxaafa 8 ->