1 Goday Museko haysada yaagis; 2 Xompey to7onna eexishe daana mela iyaw koshshiya gum7idi xillisida shamaho zayte new ehana mela Isra7eele asaa kiitta. 3 Geeshsha Dunkaaniya giddon de7iya markatetha magarajuwafe kare baggara omarsafe wonta gakanaw Aaroni Godaa sinthan he xompiya ubba wode eetho. Yaana yeletetha ubbaas hessi merinaa woga gido. 4 Xompe wothiya walahi bayna worqa kocaa bolla de7iya xompeti Godaa sinthan ubba wode eexana mela Aaroni naago.

5 Tammanne nam7u kilo giraame gidiya lo77o dhiille ekada tammanne nam7u uythi uuka. 6 He uythata usupuna usupuna nam7u maaran Godaa sinthan de7iya walahi bayna worqa xarpheeza bolla wotha. 7 Godaas xuugetanaw shiiqida katha yarsho gideysa erisanaw, nam7u maarata miyen geeshsha ixaane wotha. 8 Ha uythaa Sambaatan Sambaatan ubba wode Aaroni Isra7eele asaa gisho merinaa caaqo oothidi Godaa sinthan wotho. 9 Hessi Aaronanne iya adde nayta gakiya gisho; enti iya geeshsha bessan mo. Hessi Godaas xuussa yarshuwafe wogaada Aaronanne iya nayta gakiya gisho gidiya gisho Ubbaafe Geeshshi.

10 Ba aayen Isra7eele, ba aawan Gibxe asi gidida issi uray de7ees. Issi gallas I hara Isra7eele asara heeran wadhetis. 11 Ba aayen Isra7eele gidida uray Godaa sunthaa cayis; yaatin iya asay Museko ehidosona. He uraa aayiya Daane koche gidida Debira na7a. I sunthay Salomito. 12 He uraa waataneko Godaa sheney qoncana gakanaw iya naagisidosona.

13 Goday Muse haysada yaagis; 14 He cayida uraa gutaape gaxa kessa. I cayishin si7ida asa ubbay banta kushiya iya huuphiya bolla wotho; Isra7eele maabara ubbay iya shucha caddidi wodho. 15 Isra7eele asaas haysada yaagada oda; issi asi ba Xoossaa cayiko, I ba nagaran oyshetana. 16 Godaa sunthaa cayiya asi hayqo; Isra7eele maabara ubbay iya shuchan caddo. Bete asi woyko gade asi Godaa sunthaa cayiko hayqo.

17 Ase wodhida asi hayqo. 18 Asa mehe wodhida asi oonika ba wodhida mehiya gisho paxa mehiya qanxo. 19 Issi asi ba shooruwa qohiko, I oothidaysada iya bolla ooseto. 20 Menthiko me77o; ayfe gisho ayfe; acha gisho ache. Asa bolla qoho gathida oonika I gathida qohuwada iya bolla gako. 21 Mehe wodhida asi he mehiya gatiya qanxo; shin ase wodhida asi hayqo. 22 Bete asaasinne Isra7eele asas higgey issino gido. Taani Godaa hinte Xoossaa.

23 Musey hessa Isra7eele asaas odis; enti he cayida uraa gutaape gaxa kessidi, shuchan caddidi wodhidosona. Yaatidi Isra7eele asay Goday Muse kiitidaysada oothidosona.

<- Leeweta Maxaafa 23Leeweta Maxaafa 25 ->