Yihudi Xaafida Kiita

Gaatha Qofa

Yihuda kiitay xaafetiday, ammanonna de7ishe ammaniya asi daanidi wordo timirte laaliya asatape ammaniya asay naagetana mela akeekisanaasa. Ha qantha kiitay ba giddon oykida qofatan nam7antho Phexroosa kiita daanees. Ha kiita xaafey, “Ammaniya asas issitohonne wursethi gakanaw imetida ammanuwas oletite” yaagidi nabbabiya asaa minthidi qofisees.

Maxaafa Ayfe Qofata

Sarotho (1-2)

Wordo astamaaretanne enta kundethaa (3-16)

Ammano minthidi naagana mela imetida zore (17-23)

Galatanne woosa (24-25)

Xoossay xeegidaysatas, Xoossa Aaway doseysatasinne Yesuus Kiristoosan naagetidaysatas ha dabdaabiya xaafayis.[a]

2 Maarotethi, sarotethinne siiqoy hintew kumo.

3 Ta siiqo ishato, nuuni issife shaaketiya atotethaaba hintew xaafanaw taani daro amottas. Shin ammaniya asaas issitohonne wursethi gakanaw imetida ammanuwas oletana mela hintena zorashe xaafanaysi taw koshshiyaba gidis. 4 Enta pirday benipe xaafetidi uttida, issi issi asati oonika eronna hinte giddo gelidosona. Enti Xoossaa eronnayisata, nu Xoossaa aadho keehatetha laymatanaw go7etiya oge oothidi ekoosona. Ba xalaala kawo gidida, nu Godaa Yesuus Kiristoosa kaddoosona.

5 Shin hinte ha ubbaa eriyaba gidikoka, Goday Isra7eele asaa Gibxe biittafe waati kessidaako, qassi guyepe ammanonayisata dhaysidaysa ta hintena akeekisanaw koyayis.[b] 6 Banta de7iyasuwa aggidi, bantaw imetida maata naagiboonna kiitanchota, gita pirda gallasay gakanaw Xoossay enta dhumape garsan merinaa santhalaatan qachi wothis. 7 Hessada, Soodomenne Gamoora asaynne enta matan de7iya katamatan de7iya asay laymatidosona; laymatethara gahetiya tunatethi oothidosona. Enti merinaa taman pirdetanaysatas leemiso gididosona.[c]

8 Hessadaka, ha amuhanchoti banta asatethaa tunisoosona; maata aawata kadhoosona; salo medhetethata cayoosona. 9 Shin kiitanchota halaqay Mika7eeli Muse ahaas Xalahera palamida wode, “Goday nena seero” yaagisipe attishin, iya bolla cashsha qaala odidi mootanaw koybeenna.[d] 10 Shin ha asati bantaw eronnabaa ubbaa cayoosona; qassi enti wozani bayna meheda medhon eriya eray, I entana dhaysana. 11 Entana ayye! Enti Qaayela ogiyan bidosona. Miishe koyidi Balaama balan kundidosona. Qore geetetiya addey Xoossaa bolla dendidaysada enti Xoossaa bolla dendidi dhayidosona.[e]

12 Ha asati, hinte siiqo gibira miya bessan hintera uttiya wode yeelli bayna kawushata. Enti bantana xalaala heemmeyisata. Enti carkoy efiya iri bayna shaara mela. Qassi ayfe woden ayfe ayfonna, xaphora shodetidi, nam7u toho melida mitha mela. 13 Enti hanqetida abba zuliya mela banta pokuwa goponteyisata. Enti merinaw sakana dhumay naagiya toylatiya xoolintota.

14 Addaamepe doomidi, laapuntha yeleta gidida Heenokey, ha asataba tinbite odishe, “Heko, Goday, ba daro mukulu geeshshatara yaana.[f] 15 Asa ubbaa pirdana; geellata ubbaa enti oothida iita ooso ubbaa gishonne makallatethan enti Xoossaa bolla odetida iita odaa ubbaa gisho pirdana” yaagis. 16 He asati ubba wode zuuzumeysatanne oda koyeyisata. Qassi banta iita amuwa kaalloosona; bantanan ceeqosonanne bantana go77iyabaa demmanaw harata sabboosona.

17 Shin ta ishato, nu Godaa Yesuus Kiristoosa hawaareti kase hintew odida qaala akeekite. 18 Enti, “Wursetha wodiyan, banta amuwa kaallidi toocheysati yaana” yaagidosona.[g] 19 He asati asaa giddon shaahetethi medheyisata, banta asho amuwas haareteysatanne Geeshsha Ayyaanay baynayisata.

20 Shin ta ishato, geeshshi gidida hinte ammanuwan hintena dichanaw minnite; qassi Geeshsha Ayyaana wolqan woossite. 21 Hintena merinaa de7uwako gathiya nu Godaa Yesuus Kiristoosa maarotethaa naagishe hintena Xoossaa siiquwan naagite.

22 Sidhey de7iya asaas qadhetite. 23 Issi issi asata tamape kessi ekite. Qassi iita amon tunida enta ma7uwa ixishe haratas yashshan qadhetite.

24 Hinte kundonna mela naaganaw borey baynaysatanne gita ufaysan kumidaysata oothidi ba bonchuwa sinthan hintena shiishanaw danda7iya, 25 nuna ashshiya issi Xoossaas, nu Godaa Yesuus Kiristoosa baggara bonchoy, gitatethi, wolqinne maati, kaseka, ha77ika, merinawuka iyaw gido. Amin7i.