1 Iyyasuy daro cimida wode Goday iyako, “Neeni cimadasa; ne laythayka sugetis, gidoshin oyketona attida daro biittati de7oosona. 2 Oyketiboonna biittati haysata; Filisxeemetanne Geeshureta biitta ubbaa. 3 Gibxefe doloha baggan de7iya Shihoora Shaafape bidi, pudeha baggan de7iya Ekroona biitta gakanaw de7iya biitta ubbaa. He biittati Kanaane biitta geetetoosona. Entika ichashu Filisxeeme kawoti aysiya Gaaza, Ashdooda, Asqeloona, Gaatenne Ekroona geetetiya katamata. Aweeta biittayka buroo oyketibeenna. 4 Dugeha baggan de7iya Kanaaneta biittanne, Sidoonata biitta gidida Maarape bidi Amooreta zawa Afeeqa gakanaw de7iya biittay oyketibeenna. 5 Gebaalata biittaynne Ba7aal-Gaadepe doloha baggan de7iya Armoona zumaape bidi, Hamaata pino gakanaw buroo oyketibeenna. 6 Libaanosepe bidi Maseroona gakanaw gezze biittan de7iya Sidoonata ubbaa taani Isra7eeleta sinthafe goodda kessana. Taani nena kiitidaysada he biitta Isra7eele asaas laata oothada shaaka. 7 Neeni he biitta uddufun kochatasinne Minaase kochaafe baggaas shaaka” yaagis.

8 Robeela kochaas, Gaade kochaasinne Minaase kochaafe baggaas Godaa aylley Musey Yordaanosepe hefinthan, doloha baggan de7iya biitta kase laata oothidi entaw immis. 9 Enta biittay Arnoona Zangaara matan de7iya Aro7eerape bidi, he zangaaran de7iya katamaape bidi, Medeba gezziya kanthidi Diboona gakanaasa. 10 Qassi Haseboonan uttidi Amooneta zawa gakanaw haariya Amooreta kawa Sihoona katamata ubbaa gakees. 11 Hessadaka, Galadata, Geeshuretanne Ma7ikata biitta ubbaa, Armoona zuma ubbaanne Salaka gakanaw de7iya Baasane biitta ubbaa oykees. 12 Astarooteninne Edraa7an uttidi, haarida Baasane kawa Ooge biitta ubbaa oykees; He biittay kase Raafaymetape attida biitta. Musey enta xoonidi biittafe gooddidi kessis. 13 Shin Isra7eele asay Geeshuretanne Ma7ikata gooddidi kessibookona. Enti hachi gakanaw Isra7eele asaa giddon de7oosona.

14 Musey Leewe kochaas laata biitta immibeenna. Goday, Isra7eele Xoossay, entaw kiitidaysada taman xuussa yarsho entaw laata oothidi immis.

15 Musey Robeela kochaas enta kochan kochan laata immis. 16 Enta biittay Arnoona Zangaara matan de7iya Aro7eerape bidi, he zangaaran de7iya katamaa kanthidi gezze Medeba gakees. 17 Haseboona, gezze katamata, Diboona, Baamot-Ba7aala, Beet-Baal-Me7oona, 18 Yahaaxa, Qedemoota, Mefaata, 19 Qiratayma, Sebama, derey dariya zangaaran de7iya Xeret-Shahaare, 20 Beet-Pa7oora, Pisga zumaape garsan de7iya biittanne Beet-Yashimoota geetetiya biittata ubbaa gakees. 21 Qassi gezzen de7iya katamatanne Haseboonan uttidi haarida Amooreta kawa Sihoona biitta ubbaa gakees. Musey kawa Sihoonanne Midiyaameta halaqata Ewa, Reqeema, Xuura, Huranne Reeba olidi xoonis. Haysati kawa Sihoonape garsan he biitta haareyisata. 22 Isra7eele asay maruwa, Bi7oora na7aa, Balaama wodhidosona. 23 Robeela kochaas wuloha bagga zaway Yordaanose shaafa. Robeela kochaas kochan kochan laata gididi imetida katamatinne gutati haysata.

24 Musey Gaade kochaas enta kochan kochan laata biitta shaakidi immis. 25 Enta biittay Ya7izeera, Galadan de7iya katamata ubbaanne Amooneta biittafe baggaa ekidi, Raaba doloha baggan de7iya Aro7eera gakees. 26 Hessadaka, Haseboonape dendidi, Ramoot-Mixiphanne Bexonima gakees. Qassi Mahinaymape bidi Dabeera zawa gakees. 27 Qassi Yordaanose zangaaran, Haseboona kawa Sihoona kawotethaafe attida, Beet-Harame, Beet-Nimira, Sukotanne Xafoona geetetiya katamata ekees. Enta zaway wuloha baggan Yordaanose shaafa, qassi pudeha baggan Kenereeta abba gakees. 28 Gaade kochaas kochan kochan laata biitta gididi imetida katamatinne gutati haysata.

29 Musey Minaase kochaafe baggaas enta kochan kochan laata biitta immis. 30 Enta biittay Mahinaymanne Baasane biitta ubbaa gaki oykees. Baasane kawa Ooge kawotetha ubbaanne Baasanen de7iya usupun tammu Ya7ira katamata oykees. 31 Qassi Galadape bagganne Baasanen Ooge kawotethaas waanna katamaa gidida Astarootenne Edraa7a geetetiya katamata gakees. He ubbay Minaase na7a Makira kochaas enta kochan kochan gakidaysa.

32 Musey Yordaanosepe hefinthan, Iyaarkofe doloha baggan de7iya Moo7abe denban de7ishe shaakidi immida biittay haysa. 33 Shin Musey Leewe kochaas laata biitta immibeenna. Goday, Isra7eele Xoossay enta laata.

<- Iyyasu Maxaafa 12Iyyasu Maxaafa 14 ->