27
Iyyoba Haasaya
1 Iyyobi kaallidi haysada yaagis;
2 “Suure pirdaa tana diggidi,
ta de7uwa camo oothida,
Ubbaa Danda7iya Xoossan taani caaqayis.
3 Ta shempoy de7ishin,
ta siidhey shempishin
4 ta doonay wordo odetenna;
ta inxarsay cimo odetenna.
5 Hinte oday like gada ta ekike;
hayqana gakanaw ta tana suure geysa aggike.
6 Ta xillotethaa mintha oykanaape attishin, aggike;
ta de7ida laytha ubban ta kahay tana mootenna.
7 “Ta morketi nagaranchoda,
taara eqeteysati bala gido.
8 Xoossay enta shempuwa entafe ekiya wode,
enta laytha qaamisiya wode,
iitatas de7iya ufaysay aybee?
9 Enta bolla metoy gakiya wode,
Xoossay enta waasuwa si7ii?
10 Ubbaa Danda7iya Xoossan enti ufaytanee?
Enti ubba wode Xoossaa xeeganee?
11 “Taani hintena Xoossaa wolqaaba tamaarsana;
Ubbaa Danda7iya Xoossaa qofaa ta hintefe qottike.
12 Hinte ubbay hessa be7ideta;
yaatin, haysa mela coo haasaya ayis odeteetii?
13 Xoossay iita asatas giigisida qaaday,
Ubbaa Danda7iya Xoossaafe ekiya woytoy haysa.
14 Enta nayti ay darikoka olan wurana;
enta kochay miyaba dhayidi koshatana.
15 Hessafe attidaysati gadon wurana;
enta am7eti entaw yeekokona.
16 Iita asati bira biittada shiishikoka,
ma7o urqada shiishidi doorikoka,
17 enta bira xillo asati shaaki ekana;
enta ma7uwa geeshshati ma7ana.
18 Enti keexiya keethati shango haada melanne
gaabba mela laaletana.
19 Iita asati dure gididi hiixan zin7oosona;
shin enti dhiskofe barkiya wode aykoyka baawa.
20 Dagami di7o haathada qoponna enta bolla yaana;
qamma gotey enta denthidi efana.
21 Doloha carkoy enti de7iyasuwape pitidi efana.
22 Enti kessi ekanaw baqatishin,
qadhey bayna enta bolla wodhana.
23 Ba kushiya baqidi enta bolla qelqisana