1 Hara gallas kiitanchoti Godaa sinthan bentanaw yidosona; Xalaheyka qassi entara issife iya sinthan bentanaw yis. 2 Goday Xalahiyako, “Neeni awupe yadii?” yaagis.

Xalahey Godaako, “Taani sa7a ubban yaanne haanne yuuyashe gam7as” yaagis.

3 Goday Xalahiyako, “Neeni ta aylliya Iyyoba loythada be7adii? Sa7a bolla iya mela borey bayna asi, suure asi, Xoosse yayyiyanne iitabaape haakida asi baawa. Gaasoy bayna taani iya dhaysana mela ne tana denthethinka ha77i gakanaw I ba suuretethan minnidi eqis” yaagis.

4 Xalahey zaaridi, “Ne shempoy atto” asi geysada asi ba shempuwa gisho baw de7iyaba ubbaa immees. 5 Shin, “Neeni ne kushiya yeddada iya asatethaa bochiyako, I nena tuma som7on baaddana” yaagis.

6 Goday Xalahiyako, “Ero lo77o, iya wodhopafe attishin, iya bolla ne koydaba oothanaw danda7aasa” yaagis.

7 Hessafe guye, Xalahey Godaa sinthafe keyidi, Iyyoba tohope huuphe gakanaw iita madunthan kaa7etana mela oothis. 8 Iyyobi bido bolla uttidi kon7an bana goodis.

9 Iya machiya, “Ha77i gakanawuka neeni ne suuretetha mintha oykadii? Xoossaa baaddada hayqaaga” yaagasu.

10 Iyyobi zaaridi, “Neeni eeya maccasada waanada odetay? Nuuni Xoossaafe lo77oba eki gam7idi, iitabay gakiya wode ekokoyee?” yaagis.

Ha waaye ubban Iyyobi Xoossa bolla iitabaa odetibeenna.

11 Heedzu Iyyoba laggeti, Temaana biittafe Elfaazi, Shuuha biittafe Beldadoosinne Na7ima biitta asi gidida Soofari Iyyoba bolla gakida metuwa si7ida wode iyaw qadhetanawunne minthethanaw issife iyako yidosona. 12 Enti iya haahon eqidi xeelliya wode I Iyyoba gideysa eribookona. Guyepe iya gideysa erida wode banta qaala dhoqu oothidi yeekidosona; banta ma7uwa peedhidi, banta huuphen baana qolidosona. 13 Enti iyara laapun gallasinne laapun qamma biittan uttidosona. Enti iya waayey keehi daro gideysa be7ida gisho oonika iya odisibeenna.

<- Iyyoba Maxaafa 1Iyyoba Maxaafa 3 ->