1 “Taani tuma woyne ubba. Goshshanchoy ta Aawa. 2 I, ta bolla de7iya ayfe ayfonna tashiya ubbaa karees. Ayfiya tashiya kasepe aadhidi ayfana mela he tashiya I giigisana. 3 Taani hintew odida qaala gisho hinte geeshshi. 4 Tanan de7ite; taanika hintenan de7ana. Woyne tashey ubbara doona ixiko he tashey barka ayfe ayfanaw danda7enna. Hessadaka, hinteka tanan de7onna ixiko ayfe ayfanaw danda7eketa.

5 “Taani woyne ubba; hinte tasheta. Tanan de7eysinne taani iyan de7eysi, I daro ayfe ayfana. Ta bayna hinte xalaala aykoka oothanaw danda7eketa. 6 Tanan doonna uray tashiyada karen yegitidi melana. Hessa mela tasheti shiiqidi taman yegetana, xuugetana. 7 Hinte tanan de7iko, ta qaalayka hintenan de7iko, hinte koyiyabay ayba gidikoka woossite; hinte ekana. 8 Hinte daro ayfe ayfiya ta tamaare gidiko, hessan ta Aaway bonchetana. 9 Aaway tana doseysada taanika hintena dosayis; ta siiquwan de7ite. 10 Taani ta Aawa kiitaa naagada iya siiquwan de7idaysada hinteka ta kiitaa naagiko ta siiquwan daana.

11 “Ta ufaysay hintenan gidana melanne hinte ufaysay polo gidana mela taani hintew hessa odas. 12 Ta kiitay haysa; taani hintena dosidaysada hinteka issoy issuwa dosite.[a] 13 Ba shempuwa ba laggiyas aathidi immeysafe aadhiya gita siiqoy baawa. 14 Taani hintena kiittidaba ubbaa oothiko hinte dosetidaysata.

15 “Aylley ba goday oothiyaba eronna gisho taani hintena hizape guye aylleta giike. Shin ta Aawape si7ida ubbaa taani hintew odida gisho hintena dosetidaysata gas. 16 Taani hintena doorasipe attishin, hinte tana dooribeketa. Hinte bidi dhayonna ayfe ayfana mela taani hintena shuumas. Yaaniko, ta Aaway hinte ta sunthan woossidaba ubbaa immana. 17 Ta kiitay haysa: issoy issuwa dosite.

18 “Alamey hintena ixiko koyrottidi tana ixidaysa akeekite. 19 Hinte alamiyaba gidiyako alamey hintena dosana. Shin taani hintena alamepe doorida gishonne hinte alamiyaba gidonna gisho alamey hintena ixees. 20 ‘Aylley ba godaape aadhenna’ gada taani hintew odidaysa akeekite. Enti tana gooddidaba gidiko hintenaka gooddana. Enti ta qaala naagidaba gidiko hinte qaalaka naagana.[b] 21 Shin enti tana kiittidaysa eronna gisho ha ubbaa ta gaason hinte bolla oothana. 22 Taani yada entaw odonnaba gidiyako nagara gidenna. Shin ha77i enti oothida nagaraas gaasoyabay baawa. 23 Tana ixeysi ta Aawaka ixees. 24 Oonika oothiboonna ooso ta enta giddon oothaboonnaba gidiyako entaw nagara gidonna attana. Shin ha77i enti taani oothida oosuwa be7idi tanaka ta Aawaka ixidosona. 25 Shin enta higgiyan, ‘Tana coo ixidosona’ geetetidi xaafetidaysi poletana mela hessi hanis.[c]

26 “Aawape yaa tumaa qoncisiya Ayyaana ta hintew kiittana. I hintena minthethana, tabaa markatana. 27 Hinteka koyrope doomidi taara de7iya gisho tabaa markatana.