1 Goday enta Xoossay kiitida qaala ubbaa Ermiyaasi entaw odidi wursidaape guye, 2 Hoshaya na7ay Azaariyasi, Qaraya na7ay Yohaaninne otorancho asa ubbay Ermiyaasako, “Ne wordo odaasa! Goday nu Xoossay nu Gibxe bidi uttonna mela digganaw nena nuuko kiittibeenna. 3 Shin Babiloone asay nuna wodhanaada woyko di77idi banta biitta efanaada ne nuna enta kushen aathada immana mela nena nu bolla denthiday Neera na7aa Baaroka” yaagidosona.

4 Qaraya na7ay Yohaani, toora moconati ubbaynne asa ubbay Yihuda biittan daana mela Goday enta kiitida kiitta polonna ixidosona. 5 Qaraya na7ay Yohaaninne toora moconati ubbay banta laaletida kawotethata ubbaafe Yihudan daanaw simmida Yihuda asa bantara ekidi Gibxe bidosona. 6 Kawa naageysata halaqay Nabuzardaani Safaana na7aa, Akqaama na7aa Godoliyara daana mela ashshida addeta, maccasa, naytanne kawa macca nayta ubbaa efidosona. Qassi nabiya Ermiyaasanne Neera na7aa Baaroka efidosona. 7 Enti Godaa kiitaa ixidi, Gibxe biitta gelidi, Xafinaasa katamaa gakanaw bidosona.

8 Xafinaasan Godaa qaalay Ermiyaasako haysada yaagidi yis. 9 “Gita shuchata ekada, Yihuda asay be7ishin, Xafinaasan de7iya Gibxe kawa gadho geliya bessan sintha baggara de7iya baasuwan mooga. 10 Entako, ‘Ubbaafe Wolqaama Goday, Isra7eele Xoossay haysada yaagees; ta kiittada, ta aylliya Babiloone kawa Nabukadanaxoora ehisana. Ha moogetida shuchata bolla iya kawotethaa araata wothana. I ba kawotetha dunkaaniya iya bolla essana. 11 I yidi Gibxe biitta olana. Hayqos besseysati hayqana; di7etanaw besseysati di7etana; mashshan hayqanaw besseysati mashshan hayqana. 12 Gibxen de7iya eeqa xoossata keethaa tama oythana; eeqata xuuggana woyko di77ana. Henthanchoy ba itiya ma7eysada, Gibxe biitta ma7ana. Yaatidi, yaape saro baana. 13 I, Gibxe biittan Heliyoota kataman de7iya hawultiya mentherethana; Gibxe xoossata keethaa taman xuuggana’ ” yaagis.

<- Ermiyaasa Maxaafa 42Ermiyaasa Maxaafa 44 ->