1 Nabiya Ermiyaasi di7etida asaa giddon de7iya attida cimatas, kahinetas, nabetasinne Nabukadanaxoori Yerusalaamepe di77idi, Babiloone efida ubbaas Yerusalaamepe yeddida dabdaabey haysafe kaallidi xaafetidaysa. 2 Haysi haniday, kawoy Ikoniyaani, iya aayiya kawiya, iya moorinnati, Yihudanne Yerusalaame halaqati, kushe hiillanchotinne birata qoxeysati Yerusalaamepe di7etidi bidi simmina. 3 Ermiyaasi Yihuda kawoy Sedeqiyaasi Babiloone kawa Nabukadanaxoorako kiitetida Safaana na7aa El7aasanne Kalqqe na7aa Gamaara bolla he dabdaabiya yeddis.

Dabdaabey haysada yaagees: 4 “Ubbaafe Wolqaama Goday, Isra7eele Xoossay, Yerusalaamepe Babiloone di7etida asa ubbaas haysada yaagees: 5 Keethe keexidi yan de7ite. Kathi zeridi ayfiya miite. 6 Macho ekidi macca na7anne adde na7a yelite. Hinte adde naytas macho oychidi immite; hinte macca nayta azinas immite. Enti macca adde yelo; yan taybon darite; guuxofite. 7 Hinte di7etidi bida katamaas saroy daana mela koyite. He katamaas Godaa woossite. Iyaw saroy de7iko, hintewuka saroy daana. 8 Hinte giddon de7iya hinte nabetinne maroti odiyaban cimetofite; enti amuhiya amuhuwa si7opite. 9 Enti ta sunthan wordo tinbite odoosona; ta enta kiittabike” yaagees Ubbaafe Wolqaama Goday, Isra7eele Xoossay.

10 “Hinte Babiloonen gam7iya laapun tammu laythay poletiya wode ta hinte gisho yada, hintena, hinte biitta zaarada ehana gada gelida qaala polana. 11 Taani hintew qopiya qofaa erayis. He qofay, wursethay lo77onne ufaysi de7iya, hintena go77iya qofape attishin, qohiya qofa gidenna. 12 Hessafe guye, hinte tana xeegana; taako yaananne tana woossana; taka hintena si7ana. 13 Hinte tana koyana; hinte tana hinte kumetha wozanan koyida wode demmana. 14 Ta hintew bentana; ta hintena di7etethaafe zaarana. Taani hintena laallida kawotethatapenne dumma dumma bessaafe shiishana. Ta hintena di7on denthida hinte biitta guye zaarada ehana” yaagees Goday.

15 Hinte, “Goday nabe nuus Babiloonen denthis” yaagideta. 16 Gidoshin, Dawita araatan uttiya kawabanne hinte mela di7etidi boonna attida asaabanne hinte dabbotabaa Goday haysada yaagees. 17 “Ta enta bolla mashshe, koshanne gado yeddana. Ta entana meetetanaw danda7etonna iitida balase mitha ayfeda oothana. 18 Taani enta mashshan, koshaninne gadon yedethada, enta sa7an de7iya kawotetha ubbaas dagama oothana. Qassi ta enta kessada yeddida biitta ubban baadethas, dagamas, boresinne cashshas oothana. 19 Ta aylleta nabeta baggara zaarada zaarada kiitida ta qaala enti si7onna ixidosona. Hinte di7etidi bidaysatika si7onna ixideta. 20 Hinteno, Yerusalaamepe Babiloone di7etidi bida asaw, hinte ubbay Godaa qaala si7ite” yaagees Ubbaafe Wolqaama Goday.

21 Ta sunthan wordo tinbite odiya, Qolaya na7aa Akaababanne Maseya na7aa Sedeqiyasaba Ubbaafe Wolqaama Goday, Isra7eele Xoossay haysada yaagees. “Ta enta Babiloone kawa Nabukadanaxooras aathada immana. Hinte xeellishin, I enta wodhana. 22 Hessafe guye, Yihudape di7etidi, Babiloone bida asay issi asi baaddanaw koyiko, ‘Babiloone kawoy taman xuuggida Sedeqiyasadanne Akaabada Goday nena ootho’ yaagana. 23 Enti Isra7eelen iita nagara oothidosona. Enti banta shoorota machetara laymatidosona; ta enta kiittonna wordo tinbite ta sunthan odidosona. Hessa erey tana; hessas taani marka” yaagees Goday.

24 Nahelame addiya Shamayas haysada yaagada oda: 25 “Ubbaafe Wolqaama Goday, Isra7eele Xoossay haysada yaagees: ‘Neeni ne sunthan Yerusalaamen de7iya asaas, Ma7iseya na7aa kahiniya Sofoniyasasinne hara kahinetas dabdaabe yeddadasa.’ Ne Sofoniyasas haysada yaagadasa: 26 ‘Xoossa keethan halaqa gidana mela Goday nena Yoodahe bessan kahine oothidi shuumis. Bana nabe gidi tinbite odiya gooya oonaka iya tohuwa duthan, iya qoodhiya santhalaatan neeni qachanaw bessees. 27 Yaatin bana nabe giya Anatoota addiya Ermiyaasa ayis hessada oothabikii? 28 Ermiyaasi, di7etetha laythay daro gidiya gisho Babiloonen keethe keexidi de7ite; kathi zeridi ayfiya miite’ ” yaagidi nuna kiittis.

29 Kahiney Sofoniyaasi nabiya Ermiyaasas dabdaabiya nabbabis. 30 Godaa qaalay Ermiyaasako haysada yaagidi yis; 31 “Ha kiitaa di7on de7iya asa ubbaas kiitta; Nahelama addiya Samayeba Goday haysada yaagees; Taani kiittonna Shamayey wordo tinbite odidi hinte wordon ammantana mela oothis. 32 Ta Nahelama addiya Shamayanne iya soo asaa seerana. I ta bolla makallaba odida gisho ha asaa giddon iyaw issi asika de7on attenna. Taani ta asaas oothana keehatetha I be7enna” yaagees Goday.

<- Ermiyaasa Maxaafa 28Ermiyaasa Maxaafa 30 ->