1 Iyosyaasa na7ay Yihuda kawoy Iyo7aqeemi kawotida wode Godaa qaalay yis. 2 Goday, “Xoossa keetha dabaaban eqa. Xoossa keethan goyinnanaw Yihuda katamatape yaa ubbaas, ta nena kiitida qaalape issuwaka ashshona oda. 3 Enti si7idi, banta iita ogiyape simmaneko ooni eri. Hessa gidiko, taani enta iitatetha gisho dhaysanaw qopidaysa aggaagana.”

4 Entako haysada yaaga: “Hinte tana si7onna ixikonne ta hintew immida higgiya kiitetonna ixiko, 5 hinte si7onna ixikoka ta zaara zaarada hinteko kiitida, ta aylleta nabeta qaala si7onnan ixiko, 6 ta ha xoossa keethaa Seeloda oothana. Ha katamaa sa7an de7iya kawotethata ubbaas baadethi oothana” yaagis.

7 Ermiyaasi Xoossa keethan ha qaala odishin, kahineti, nabetinne asa ubbay si7idosona. 8 Ermiyaasi, Goday, oda gidi immida kiita odidi ongida wode kahineti, nabetinne asa ubbay iya oykidi, “Ne hayqanaw bessaasa” yaagidosona. 9 Neeni, “ ‘Ha xoossa keethay Seeloda hanana; qassi ha katamay dhayana; baysa gidana’ yaagada, Godaa sunthan ayis tinbite odadii?” yaagidi, Xoossa keethan shiiqida asa ubbay Ermiyaasa teqidosona.

10 Yihuda halaqati hessa si7ida wode, kawo gadhope keyidi, Xoossa keethi yidosona. Xoossa keethan Ooratha Penge geetetiya pengiyan uttidosona. 11 Kahinetinne nabeti halaqatakonne asa ubbaako haysada yaagidosona: “Hinte, hinte haythan si7idaysada, ha addey ha katamaa bolla tinbite odida gisho, I hayqanaw bessees!” yaagidosona.

12 Ermiyaasi halaqatakonne asa ubbaako haysada yaagis: “Ha hinte si7ida qaala ubbay ha xoossa keethaa bollanne ha katamaa bolla hanana gada ta odana mela Goday tana kiittis. 13 Hiza hinte ogiyanne hinte oosuwa laammite; Godaa hinte Xoossaa qaalas kiitetite. Hessa hinte oothiko, Goday hinte bolla ehana gida iitabaa aggaagana. 14 Tana gidiko, ta hinte kushen de7ayis. Hintew lo77onne suure daanidaba ta bolla oothite. 15 Taani ha qaala ubbaa hintew odana mela Goday tuma tana kiitida gisho, hinte tana wodhiko, hinte hinte bolla, ha katama bollanne iyan de7iya asaa bolla xillo suutha aco ehanaysa erite” yaagis.

16 Halaqatinne asa ubbay, kahinetinne nabeti, “I, Godaa, nu Xoossaa sunthan nuus odida gisho, ha addey hayqanaw bessenna” yaagidosona.

17 Biitta cimatape issoti issoti dendi eqidi, shiiqida asaako haysada yaagidosona: 18 “Hizqiyaasi Yihudan kawotida laythan Mooreseeta addey Mikiyaasi kase Yihuda asaas haysada yaagidi, tinbite odis: ‘Xiyooney shooqada goyetana. Yerusalaame katamay laaletidi, laaletha doore gidana. Xoossa keethay keexetida derey wora gidana’ yaagees Ubbaafe Wolqaama Goday” yaagis. 19 Yaatin, “Yihuda kawoy Hizqiyaasinne Yihuda asa ubbay iya wodhidona? Akay, Hizqiyaasi Godaas yayyidi, Godaa maarotethi oychibeennee? Godaay enta bolla ehana gida iitabaa aggibeenee? Shin nuuni nu bolla iitabaa ehana hanoos” yaagidosona.

20 Qiriyat-Yi7aarima geetetiya bessan, Shamaya na7aa, Ooriyoona geetetiya issi addey de7ees. Ika Ermiyaasi odidaysada, ha katamaa bollanne ha biitta bolla Godaa sunthan kase tinbite odis. 21 Kawoy Iyo7aqeemi, iya olanchoti, iya moorinnati, Ooriyooni odidaysa si7ida wode kawoy iya wodhanaw koyis. Ooriyooni hessa si7ida wode yayyidi, Gibxe baqatis. 22 Gidoshin, kawoy Iyo7aqeemi Akboora na7aa Elnaatananne hara asata Gibxe kiittis. 23 Enti Ooriyoona Gibxefe kessidi, kawa Iyo7aqeemeko efin, iya mashshan wodhisidi derey moogetiya duufon moogidosona.

24 Shin Safaana na7ay, Akqaami Ermiyaasa maaddida gisho asay iya wodhanaw aathidi immibookona.

<- Ermiyaasa Maxaafa 25Ermiyaasa Maxaafa 27 ->