1 Kawoy Nabukadanaxoori, Iyo7aqeema na7aa, Yihuda kawa Ikoniyaana, Yihuda halaqatara, kushe hiillataranne birata qoxeysatara Yerusalaamepe Babiloone di77idi efidaape guye, Goday tana qoncethi bessis. Goday tana, Xoossa keethas sintha baggara balasey de7iya nam7u keesheta bessis. 2 Issi keeshiyan koyro teerida daaniya lo77o balasey de7ees; hanko keeshiyan qassi maanaw giigonna iita balasey de7ees. 3 Goday taako, “Ermiyaasa, ne be7ey aybee?” yaagidi oychis.

Taani, “Balase be7ayis; lo77o teeray daro lo77o; iita teeray qassi maanaw giigonna daro iita” yaagas.

4 Hessafe guye, Godaa qaalay taako yis: 5 Goday Isra7eele Xoossay haysada yaagees: “Yihuda biittafe di7on Babiloone biitta yeddida asata, ha lo77o balase teerada lo77o gaana. 6 Taani lo77o ayfen enta xeellana; qassi enta zaarada ha biitta ehana. Ta enta keexanape attishin, laallike; enta tokanape attishin, shoddike. 7 Taani Godaa gididaysa enti erana mela entaw wozana immana. Enti banta kumetha wozanape taako simmanaw de7iya gisho, enti ta ase gidana; ta enta Xoosse gidana” yaagees.

8 Gidoshin, “Yihuda kawa Sedeqiyaasa, iya moorinnata, ha biittan gidin Yerusalaamen attida asaanne Gibxe biittan de7eyisata maanaw giigonna daro iita balase teerada iita gaana. 9 Taani enta gooddada yeddiya biitta ubban, ha sa7a kawotethati enta be7idi dagammana. Taani enta ixetidaysata, cayetidaysata, boretidaysata, leemiseteyisata, qelqiseteyisata, baadetidaysata oothana. 10 Ta entawunne enta mayzatas immida biittafe enti polo dhayana gakanaw mashsha, koshanne bosha enta bolla yeddana” yaagees Goday.

<- Ermiyaasa Maxaafa 23Ermiyaasa Maxaafa 25 ->