1 Godaa qaalay, haysada yaagishe taako yis: 2 “Neeni macho ekofa; macca na7anne adde na7a ha bessan yelopa. 3 Ha bessan yeletiya macca naytabaanne adde naytabaa, enta yeliya aayetanne aawataba Goday haysada yaagees. 4 Enti iita hargen hayqana; entaw yeekiya woyko enta moogiya asi bentenna. Enta ahay biitta bolla pito mela yegetana; enti mashshaninne koshan wurana; enta ashoy salo kafotasinne sa7a do7atas kathi gidana” yaagis.

5 “Yeeho keethi gelopa; yeekanaw woyko qadhetanaw boopa. Taani ha asaa bollafe ta sarotethaa, ta siiquwanne ta maarotethaa diggas. 6 Gitinne guuthi ha biittan hayqana; enti moogetokona. Oonika entaw yeekenna; oonika bana gaarenna woyko huuphe meedetidi kayotenna. 7 Yeekiya asaas shochu efidi, entara issife midi uyidi, kayuwa balethiya asi issoyka deenna. Hari attoshin, aayiya woyko aawi hayqida asaaka minthethiya asi baawa.”

8 “Entara maanawunne uyanaw gibiri de7iya keethi gelopa. 9 Ubbaafe Wolqaama Goday, Isra7eele Xoossay haysada yaagees: ‘Taani ufaysinne ililsi, yaagano yethi ha bessaafe diggana. Hessa asay banta laythaninne banta ayfiyan be7ana.’ ”

10 “Ne ha qaala ubbaa asaas odiya wode, enti, ‘Goday ayis haysa mela iitabaa nu bolla awaajidee? Nu ay balido? Godaa, nu Xoossaa bolla nu ay nagara oothido?’ ” yaagana. 11 He wode ne entako; “Hinte aawati tana aggida gishosa, enti hara xoossata kaallida gishosa, entaw oothidanne goyinnida gishosa, tana aggidi ta higgiya naagonna ixida gishosa. 12 Hinte, hinte aawatape aadhidi iita oothida gishosa. Hinte issoy issoy ero goonna hinte iita wozanaa kaallideta; taw kiitetonna ixideta. 13 Hessa gisho, ta hintena ha biittafe denthada, hinte woyko hinte aawati eronna biitta holana. Yan hinte hara xoossata gallasinne qamma haggaazana; taani hintew qadhetike” yaagees Goday.

14 Asay, “Isra7eele asaa Gibxe biittafe kessida Goday eriya mela” yaagidi caaqonna wodey yaana. 15 Hessa aggidi, “ ‘Isra7eele asaa pudeha bagga biittafenne enta laallida biitta ubbaafe zaaridi ehida Goday eriya mela’ yaagidi caaqana. Taani enta kase enta aawatas immida biitta zaarada ehana” yaagees Goday.

16 “Ta molo oykiya daro asaa kiittana; enti enta oykana. Hessafe guye, daro shankatiya asaa kiittana; derepe, zumapenne shucha qophope enta shankatidi kessana. 17 Ta ayfey enta ogiya bolla de7ees; enti taape qosetibookona; enta nagaray ta sinthafe geemmibeenna. 18 Ta enta iitatethaanne enta nagaraa gisho entaw nam7u kushe zaarana. Enti aha daaniya banta ixetida eeqatan ta biitta tunisidosona; shaatiya banta misiletan ta laata kunthidosona” yaagees Goday.

19 Abeeti Godaw, ta wolqaw, ta miixaw, meto gallas ta baqatada attiya bessaw, kawotethati sa7aa gaxape neeko yidi, “Nu aawati pathonnanne maaddonna wordo xoossata xalaala laattidosona. 20 Asay bantaw xoossata medhanaw danda7oona? Ee, enti medhiyakoka tuma xoossata gidokona!” yaagana.

21 “Hessa gisho, ta enta tamaarsana; ta wolqaanne ta gitatetha enta erisana. He wode enti ta sunthay Godaa gideysa erana” yaagees Goday.

<- Ermiyaasa Maxaafa 15Ermiyaasa Maxaafa 17 ->