Ermiyaasa Maxaafa 10

Tuma Xoossinne Eeqata

1 Hinteno, Isra7eele asaw, Goday odiya qaala si7ite! 2 Goday haysada yaagees: “Hara kawotethata ogiya tamaaropite. Enti salo bolla malaata be7idi dagammikoka, hinte dagammopite. 3 Enta wogay hada; enti worape mithi qanxoosona; masseysi kaltan massees. 4 Enti biraninne worqan alleeqisosona; qaaxonnaada misimaaren dhishidi oythoosona. 5 Enta eeqati leehe giddon kafo daganthanaw essiya malla mela. Enti odetokona; enti hemetanaw danda7onna gisho asay enta tookosona. Entas kumthi yayyofite. Enti qohanawuka maaddanawuka danda7onna gisho entaw yayyofite” yaagees Goday.

6 Abeeti Godaw, ne mali oonika baawa. Neeni gita; ne sunthayka gitanne wolqaama. 7 Abeeti kawotethata Kawaw, nena bonchonay oonee? Cinca asaa giddoninne enta kawotethaa giddon ne meli bayna gisho new boncho bessees. 8 Enti eeyanne eri dhayidaysata; enti mithafe massida, pathonna eeqatape ay tamaarona? 9 He eeqati Tarsesa biraninne Afeeza worqan alleeqetidosona. Enti ubbay kushe hiillanchotan oosetida woynenne kaalose daaniya ma7uwan kametidosona. 10 Shin Goday tuma Xoossaa; I de7o Xoossaanne merinaa kawa. Iya hanquwan biittay qaaxees; kawotethati iya yiluwa danda7okona.

11 “Haysati salonne sa7a medhiboonna xoossati sa7apenne salope dhayana” yaagada neeni entaw oda.

12 Ba wolqan sa7aa medhiday,

ba cincatethan sa7aa essiday,

ba akeekan salota micciday, Xoossaa.

13 I, ba kooshincha sissiya wode,

salon de7iya haathati guummoosona.

I shaara sa7a gaxape pude denthees;

wol7anthi irara yeddees;

carkuwa ba minja keethaafe kessees.

14 Asi ubbay era dhayidi eeyis;

worqaa sheeshiya ubbay ba eeqan yeellatis.

Enti medhida eeqati wordo;

entaw shempoy baawa.

15 Enti pathonnabaanne hada;

enti seeretiya wode dhayana.

16 Shin I ubbaa medhida gisho,

Yayqooba Saama gidida Xoossay

hessa mela gidenna;

Isra7eeley, I baw doorida kawotethi;

iya sunthay Ubbaafe Wolqaama Godaa.

Yaana Dhayo

17 Hinteno, morkey teqidaysato, biittafe keyanaw hintew de7iyaba shiishite. 18 “Taani, ha wodiyan, ha biittan de7iya asaa kessada yambarana. Enta qohoy eretana gakanaw enta bolla iitabaa ehana” yaagees Goday.

19 Ta madunxas! Ta madunthay paxenna. Shin taani, “Haysi ta harge; ta danda7anaw bessees” yaagas.

20 Ta dunkaaney laaletis; iya wodoro ubbay duuxeretis. Ta nayti ubbay taape shaaketidi bidosona; enti baawa. Ta dunkaaniya zaaridi tokanaw woyko ta magarajuwa kaqanaw issi asika attibeenna.

21 Henthanchoti eeyidosona; enti Godaa oychibookona. Hessa gisho, entaw injetonna ixis; enta wude ubbay laaletis. 22 Ooratha odi yis; si7ite. Pudeha baggan de7iya kawotethan gita dirgoy medhetis. Iya olanchoti yidi, Yihuda katamata baysanne workanati gupiya bessi kessana.

23 Abeeti Godaw, asa de7oy iyaw buzo gidonaysanne ba ogiya suurisanaw iya shene gidonnaysa ta erayis. 24 Abeeti Godaw, tana seera; shin likera gido. Ta dhayonna mela ne hanquwan ta bolla yoopa. 25 Ne sheniya, nena eronna kawotethata bollanne ne sunthaa xeegonna asaa bolla gussa. Enti Yayqooba asaa midosona; enta mittidosona; enta biitta dhaysidosona.

<- Ermiyaasa Maxaafa 9 Ermiyaasa Maxaafa 11 ->