1 Wontetha gallas Yeruba7aala geetetiya Gediyooninne iyara de7iya asa ubbay wonta guura dendidi bidi, Harooda pultuwa matan dunkaanidosona. Midiyaame asay entafe pudeha baggara More zumaa matan de7iya zangaaran dunkaanidosona. 2 Goday Gediyoonako, “Neera de7iya asay daro gidiya gishonne Isra7eele asay, ‘Nuuni nu wolqan xoonida’ gidi ta bolla ceeqetonna mela taani Midiyaameta hinte kushen aathada immike. 3 Hessa gisho, asaako, ‘Yayyiya asi de7iko Galada zumaape simmidi guye ba soo soo boo’ yaagada awaaja” yaagis. Yaatin, laatamanne nam7u mukulu asay guye simmin tammu mukulu asi attis.

4 Gidoshin, Goday Gediyoonako, “Ha77ika asay daro. Ne enta ekada duge shaafa wodha; taani enta yan paacana. Taani, ‘Haysi neera boo’ geysi neera boo; taani, ‘Haysi neera boopo’ geysi boopo” yaagis.

5 Gediyooni asaa shaafu ekidi bis. Goday iyako, “Ha asaa giddofe gulbatidi haathe uyeysatanne kanada haathe inxarsan uyeyisata shaaka” yaagis. 6 Banta kushen haathe uyeyisata tayboy heedzu xeeta; shin attidaysati ubbay haathe gulbatidi uyidosona.

7 Goday Gediyoonako, “Banta kushen haathe kophetidi uyida heedzu xeetu asatan taani hintena ashshana; Midiyaameta hintew aathada immana. Shin attida asa ubbay ba soo soo simmo” yaagis. 8 Hessa gisho, Gediyooni asata shinqiyanne enta moyziya ekida heedzu xeetu asata baara ashshidi, hanko asa ubbaa enta soo soo yeddis. Ha ubbay haniya wode Midiyaame olanchoti entafe garsa baggara de7iya zangaaran dunkaanidi uttidosona. 9 He qamma Goday Gediyoonako, “Taani new aathada immida gisho dendada enti dunkaanida bessan de7ishin ola. 10 Neeni enta olanaw yayyiko ne oosanchuwa Puura ekada enti dunkaanida bessaa duge wodha. 11 Enti giyaba si7a. Hessafe guye, neeni enta olanaw minotethi demmana” yaagis.

Gediyooninne iya aylley Puuri, Midiyaameti dunkaanida bessaa matan naagiya olanchotako bidosona. 12 He wode booleda darida Midiyaameti, Amaaleqatinne doloha bagga asa ubbay zangaaran dunkaanidi uttidosona. Enta gimaleti abba gaxan de7iya shafe mela taybanaw danda7etenna.

13 Gediyooni yaa gakiya wode issi addey ba amuhuwa ba laggiyas odishin si7is. Hessika, “Issi banga uythi okoleti gakidi Midiyaameta dunkaaniya dom7is; dunkaaney shireti wodhidi micetis” yaagis.

14 Iya laggey zaaridi, “Hessi Isra7eele addiya, Iyo7aasa na7aa Gediyoona mashshafe attishin, haraba gidenna. Xoossay Midiyaamenne Midiyaametara de7iya olanchota ubbaa Gediyoonas aathidi immis” yaagis.

15 Gediyooni he amuhuwanne iya birshethaa si7ida wode gulbatidi Xoossaa goyinnis. Isra7eele asay dunkaanida bessaa guye simmidi, “Dendite; Goday Midiyaame olanchota hinte kushen aathidi immis” yaagis. 16 Heedzu xeetu asata heedzu cugan shaakidi entaw huuphen huuphen issi issi moyzenne giddon eexiya xompey de7iya issi issi xaaro immis. 17 Gediyooni entako, “Tana xeellite; taani enti dunkaanida bessaa gakiya wode ootheysada hinteka oothite. 18 Tanne taara de7eysati ubbay moyze punniy wode hinteka enti dunkaanida bessaa yuushuwan eqidi moyze punnishe, ‘Godaasanne Gediyoonasa’ yaagidi waassite” yaagis.

19 Giddi bilahe gidiya wode naageysati laametidaape guye Gediyooninne iyara de7iya xeetu asati bidi, Midiyaameti dunkaanida bessaa gakidi banta moyziya punnidosona; oykida xaaruwa menthidosona. 20 Hara baggara de7iya nam7u cugay hessada oothidosona. Banta haddirsa kushen eexiya xompe, banta ushacha kushen moyze oykidi, “Godaanne Gediyoona mashshaa” yaagidi waassidosona. 21 Asa ubbay Midiyaameti dunkaanida bessaa yuushon ba bessan bessan eqidashin, Midiyaame olanchoti ubbay waassishe baqatidosona. 22 Heedzu xeetu asay banta moyziya punnida wode morke olanchoti banta mashshaa issoy issuwa bolla denthana mela Goday oothis. Attida olanchoti Xararako simmidi Beet-Shixa gakanaw, yaape aadhidi, Xabaata matan de7iya Abeel-Mahoola gakanaw baqatidosona. 23 Hessafe guye, Niftaaleme, Aseeranne Minaase kochati xeegetidi, shiiqidi Midiyaameta yedethidosona. 24 Derey dariya Efreema biittan de7iya asaako Gediyooni kiittidi, “Midiyaameta olanaw duge wodhidi Beet-Baara gakanaw de7iya Yordaanosen geliya shaafata entafe kasetidi oykite” yaagis. Efreema asa ubbay xeegetidi, shiiqidi Beet-Baara gakanaw Yordaanosen geliya shaafata oykidosona. 25 Enti Oreebanne Zeba geetetiya nam7u Midiyaame halaqata di77idosona. Oreeba, “Oreeba Zaalla” geetetiya bessan, qassi Zeba, “Zeba Woyne Gum77iya Bessi” geetetiya bessan wodhidosona. Hessafe guye, attida Midiyaameta yedethidi, Oreebanne Zeba qoodhiya qanxidi enta huuphiya, Yordaanose shaafape hefinthan de7iya Gediyoonako ehidosona.

<- Ayseysata Maxaafa 6Ayseysata Maxaafa 8 ->