1 Godaa kiitanchoy Galgalape Bookima bidi, Isra7eele asaako haysada yaagis; “Taani hintena Gibxefe kessada beni hinte mayzatas immana gada caaqida biitta hintena gelsada, ‘Taani hintera caaqida caaquwa menthike; 2 hinte ha biittan de7iya asatara caaqofite; enta yarsho bessa laallite’ yaagas. Shin hinte taw kiitetibeketa; ayis hessa hanidetii? 3 Hessa gisho, taani enta hinte sinthafe gooddike; enti hintew morke gidana; enta xoossati hintew xihe gidana” yaagis. 4 Godaa kiitanchoy Isra7eele asaas hessa odida wode asay banta qaala dhoqu oothidi yeekidosona. 5 Yaatidi he bessaa Bookima[a] yaagidi sunthidi yan Godaas yarshidosona.

6 Iyyasuy Isra7eele asaa yeddidaape guye, asay issoy issoy bana gakida laata biitta ekanaw bis. 7 Iyyasuy paxa de7iya laythaninne Goday Isra7eele asaas oothida gita ooso ubbaa be7ida cimati de7iya wode asay Godaas kiitetidosona.

8 Godaa aylley, Nawe na7ay Iyyasuy laythay xeetanne tamma gidin hayqis. 9 Enti iya Ga7aasa zumaape pudeha baggan, Efreema gezze biittan, Timnaat-Saraha geetetiya bessan iya laata biittan moogidosona. 10 He yeletetha ubbay hayqidi banta mayzatan gahetidosona. Hessafe guye Godaa woyko Goday Isra7eele asaas oothidaba eronna hara yeletethi dendis.

11 Hessafe guye, Isra7eele asay Godaa sinthan iitabaa oothidosona; Ba7aale eeqa misileta goyinnidosona. 12 Gibxe biittafe enta kessida Godaa, banta mayzata Xoossaa aggidosona. Enta yuushuwan de7iya asaa eeqatako simmidi, entaw goyinnidosona; hessan Godaa hanqethidosona. 13 Qassi Godaa aggidi, Ba7aalenne Astaroote eeqa goyinnidosona. 14 Yaatin, Godaa hanqoy Isra7eele asaa bolla eexis; bonqeysati enta bonqana mela oothis. Enta yuushuwan de7iya morketas aathidi immis. Yaatin, enti banta morketara eqetanaw danda7ibookona. 15 Enti oletanaw keyiya wode ubban, Goday kase entaw odidaysadanne caaqidaysada enti xoonetana mela I enta bolla dendis. Yaatin, enti daro un7etidosona.

16 Yaatin, Goday ayseysata entaw denthin, enti Isra7eele asaa bonqeyisata kushepe ashshidosona. 17 Gidoshin Isra7eele asay haareysatas kiitetibookona; Godaas ammanetona ixidi hara xoossata goyinnidosona. Enta aawati Godaas kiitetidi hemetida ogiya aggidi hara soo simmidosona. 18 Goday entaw ayseysata denthida wode ubban I ayseysatara issife gididi he ayseysi paxa de7iya laytha ubban enta morketa kushepe ashshis. Enti un7aninne meton gididi Godaako waassiya wode ubban Goday entaw qadhetees. 19 Shin ayseysi hayqidaape guye, asay guye simmidi, kase enta aawati oothida iitaape aadhida iita oothidosona. Enti hara xoossatako simmidi, entaw goyinnidosona. Banta iita oosuwanne geella ogiya aggonna ixidosona. 20 Goday Isra7eele asaa bolla yilo eexidi, “Ha asay taani enta mayzatas caaqida caaquwa menthida gishonne taw kiitetonna ixida gisho, 21 Iyyasuy hayqiya wode biitta bolla attida kawotethatape issuwaka taani enta sinthafe gooddada kessike. 22 Isra7eele asay kase banta mayzatada ta ogiya kaalliyakonne kaallonnaako paacanaw taani ha attida kawotethata go7etana” yaagis. 23 Hessa gisho, Goday he kawotethati biittafe goodetonna gam7ana mela oothis. I enta ellesidi gooddi kessibeenna; enta Iyyasus aathidi immibeenna.

<- Ayseysata Maxaafa 1Ayseysata Maxaafa 3 ->