8 Ichashantho gallas wonta guura baanaw dendin, na7e aaway, “Hayyana, guutha kathi mada, gashtada omarsi ba” yaagis. Enti nam7ayka issife kathi midosona.
9 Leewey ba laggetheranne ba aylliyara baanaw keyin, na7e aaway, “Heko, sa7i qammis; ha77ika aqite; wonta guura dendidi hinte soo biite” yaagis.
10 Shin I yan aqanaw koyiboona gisho ba laggethiw, ba aylliyanne nam7u caanetida hareta ekidi Yaabuse geetetiya Yerusalaame katamaa gakidosona. 11 Enti Yaabuse matiya wode sa7i daro omarsin, aylley, “Haysan, Yaabuseta kataman aqiko waananee?” yaagidi ba godaa oychis.
12 Shin iya goday, “Haysan, Isra7eele asi bayna allaga katamaa booko. Gib7a katamaa gakanaw baana” yaagis. 13 Qassika ba aylliyako, “Haaya, nuuni Gib7an woyko Raman aqiya bessi demmana” yaagis. 14 Hessa gisho banta ogiya oykidi bidosona. Biniyaame biittan Gib7a katamaa enti matiya wode awi wullis. 15 Enti Gib7a katamaa gelidi aqanaw yaa bidosona. He katamaa asay duulata uttiya bessan uttidosona; shin enta ba soo efidi aysiya asi bentibeenna.
16 Enti yan uttidashin, sa7i omarsin gadepe ba soo simmiya issi cima addey enta matara aadhis. Ha addey kase derey dariya Efreema biittafe yida asi; shin ha77i Gib7a kataman de7ees. He biittan Biniyaame kochaafe yeletida asay de7oosona. 17 He cima addey, katamaa asay duulata uttiya bessan uttida addiya be7idi, “Awupe yadii? Awu bay?” yaagidi oychis.
18 Leewey zaaridi, “Nuuni Yihuda biittan Beeteleme katamaape yida. Ha77i derey dariya Efreema biittan, haaho bessan de7iya Xoossa keethinne nu soo boos. Nuna ba soo efidi aysiya asi demmibooko. 19 Nu haretas utullinne kaley de7ees; taw, ta laggethesinne ta aylliyas gidiya kathinne woyne ushshi de7ees; nuus koshshiyaba ubbaa oykida” yaagis.
20 Cima addey, “Saroy hintew gido; ta soo yedhite; ta son aqite; hinte koyaba ubbaa ta hintew immana. Ha katamaa dabaaban hinte aqanaw bessenna” yaagis. 21 Enta ba soo efis; enta haretas miyaba yeggis. Imathati banta tohuwa meecetidi kaho midosona.
22 Enti ufaytishin, katamaape iita asati yidi, keethaa teqidi, pengiya qoxethi doomidosona. Enti cima addiyako, “Ha ne soo gelida addiya haa kessa; nuuni iyara gahetanaw koyoos” yaagidosona.
23 He keethaa goday, “Hanenna; ta ishato, hessa mela palaba oothopite; ha addey ta imathe. 24 Heko, ta geela7o na7iyanne iya laggethiya haysan de7oosona. Taani enta hintew kare kessana; hinte enta bolla koydaba oothite; shin ha addiya bolla hessa mela iitabaa oothopite” yaagis.
25 Shin asati I gidaysa si7onna ixidosona. Leewey ba laggethiw kare holis. Sa7i wontana gakanaw qamma kumethi taran taran iira wolqan gahetidi, iyo paxa kaa7ishe aysidosona; sa7i wontana hanishin iyo yeddi aggidosona. 26 Wontanaw gontey zo77iya wode yada, I goday aqida cima addiya keethaa pengen kundasu; xalqey dolana gakanaw yan zin7asu.
27 Wonta I goday dendidi, ba ogiya baanaw pengiya dooyidi keyiya wode iya laggethiya keethaa pengen ba kushiya miccada gufannidaaro be7is. 28 I goday, “Denda; ane boos” yaagis. Shin iya aykoka zaarabuuku. Yaatin, I aha haren caanidi ba soo bis. 29 I ba soo gakida wode mashsha ekidi, ba laggethe aha tammanne nam7u bessan qanxerethidi, issi issi qanxuwa tammanne nam7u Isra7eele kochatas yeddis.
30 Hessa be7ida ubbay, “Isra7eele asay Gibxe biittafe keyoodepe hachi gakanaw haysa melabay hanibeenna; nuka be7ibooko. Ane haysa qopi be7idi, akeekan zoretidi, ay oothaneko nuus odite” yaagidosona.
<- Ayseysata Maxaafa 18Ayseysata Maxaafa 20 ->