1 Abimelekey hayqidaape guye, Yisakoora koche gidida Dooda na7aa, Puuha na7ay Toli, Isra7eele asaa ashshanaw dendis. I derey dariya Efreema biittan Samiran de7is. 2 Toli Isra7eele asaa laatamanne heedzu laythi aysis. Toli hayqidi, Samiran moogetis.

3 Tolape kaallidi, Galada addey Ya7iri dendis. I Isra7eele asaa laatamanne nam7u laythi aysis. 4 Iyaw hastamu baqulo toggiya hastamu adde nayti de7oosona. Entaw Galada biittan hastamu katamati de7oosona. He katamati hachi gakanaw Ya7ira katamata geetetidi xeegetoosona. 5 Ya7iri hayqidi Qamoonan moogetis.

6 Qassika Isra7eele asay Godaa sinthan iitabaa oothidosona. Enti Ba7aalenne Astaroota eeqata, Soore xoossata, Sidoona xoossata, Moo7abe xoossata, Amoone xoossatanne Filisxeeme xoossata goyinnidosona. Enti Godaa aggaagidosona; iya goyinnibookona. 7 Goday Isra7eele asa bolla hanqetidi, enta Filisxeeme asaasinne Amoone asaas aathidi immis. 8 He laythi Filisxeemetinne Amooneti Isra7eele asaa un7ethidosona. Yordaanose shaafape doloha baggan, Amooreti kase de7ida Galada biittan de7iya Isra7eele asaa enti tammanne hospun laythi haaridosona. 9 Qassika Amoone asay Yihuda, Biniyaamenne Efreema kochata olanaw Yordaanose shaafa pinnidosona; Isra7eele asay daro un7etidosona.

10 Hessafe guye, Isra7eele asay, “Nuuni nena nu Xoossaa aggidi, Ba7aale goyinnidi, nagara oothida” yaagidi Godaako waassidosona.

11 Goday entako, “Gibxeti, Amooreti, Amooneti, Filisxeemeti, 12 Sidoonati, Amaaleqatinne Mo7aaneti hintena un7ethin, hinte taako waassin, taani hintena enta kushepe ashshabikina? 13 Shin hinte tana aggidi hara xoossata goyinnideta; hizape taani hintena ashshike. 14 Bidi hinte doorida xoossaako waassite. Hintena metoy gakiya wode ane enti asho” yaagidi zaaris.

15 Shin Isra7eele asay zaaridi Godaako, “Nuuni nagara oothida. Ne koydaba nu bolla ootha; shin hayyana hachi nuna ashsha” yaagidosona. 16 Allaga xoossata banta giddofe diggidi, Godaa goyinnidosona. Goday Isra7eele asaa un7etetha be7idi mishetis.

17 Hessafe guye, Amoone olanchoti olas giigidi, Galadan shiiqidosona. Isra7eele asay issife shiiqidi Galadan Mixiphan dunkaanidosona. 18 Galada biitta halaqati banta giddon, “Amoone olanchotara koyrottidi ola gahetanay oonee? He addey Galada biittan de7iya asa ubbaas halaqa gidana” yaagidosona.

<- Ayseysata Maxaafa 9Ayseysata Maxaafa 11 ->