1 Ta ishato, hinte nu boncho Godaa Yesuus Kiristoosa ammaniyaba gidiko, asa som7o xeellidi ase bonchofite. 2 Leemisos, worqa migiddo aathidi, lo77o ma7o ma7ida dure asi hinte shiiquwa yis. Qassi curqa ma7o ma7ida manqo asika yis. 3 Lo77o ma7o ma7ida addiya hinte aathidi bonchidi, “Ne haysan lo77iya oydiyan utta” gidi, qassi manqo addiya, “Ne yan eqa woyko haysan ta tohuwa matan sa7an utta” geeta. 4 Yaatin, hinte, hinte giddon shaaketethi medheysatanne iita qofara de7iya daynnata mela gideketiyee?

5 Ta siiqo ishato, si7ite. Ammanon dure gidana melanne bana siiqeysatas immana gida salo kawotethaa laattana mela ha sa7an de7iya manqota Xoossay dooribeneyee? 6 Shin hinte manqota toocheta. Hintena un7etheysati dureta gidokonaayee? Hintena daynna sinthe goocheysati enta gidokonaayee? 7 Hinte xeegetida lo77o Godaa sunthaa cayeysati enta gidokonaayee?

8 Shin Geeshsha Maxaafan, “Ase ubbaa nena ne doseysada dosa” geetetidi xaafetida Xoossaa kawotethaa higgiya hinte poliko lo77o ootheeta.[a] 9 Shin hinte asa som7o xeellidi bonchiko, nagara ootheeta qassi higgey hintena higge menthida asada pirdana. 10 Oonika higge ubbaafe issuwa menthidi, attida ubbaa naagiko ubbaa menthidaada taybetees. 11 “Laammofa” gida Goday, qassi “Wodhopa” gis. Shin neeni laammonna aggada wodhidaba gidiko, higgiya menthadasa.[b] 12 Aylletethafe kessiya higgiya sinthan pirda ekanaw de7iya asada odetitenne oothite. 13 Ase maaronna oonaka Xoossay maaronna pirdana. Shin maarotethay pirdaa xoonees.

14 Ta ishato, hintefe issi asi taw ammanoy de7ees gidi, ba ammanuwa ooson bessonna ixiko iya ay maaddanee? Iya ammanoy iya ashshanaw danda7ii? 15 Leemisos issi ishay woyko issi michiya kallotikonne entaw miyabay dhayiko, 16 hintefe issi asi entako, “Saro biite! Tama kayite! Kallidi miite!” gidi, koshshiyaba entaw immonna ixiko enta ay maaddii? 17 Hessa gisho, oosoy bayna ammanoy barka hayqidaysa.

18 Shin issi asi, “New ammanoy de7ees; qassi taw oosoy de7ees. Neeni ne ammanuwa ne oosuwape shaakada tana bessa; taka ta ammanuwa ta oosuwan nena bessaana” gaana. 19 Neeni, issi Xoossay de7eysa ammanaasa; hessi lo77o. Tuna ayyaanatika ammanoosona; yashshan kokoroosona. 20 Neno eeyaw! Ammanoy oosope shaaketidi maaddonnaysa eranaw koyay? 21 Nu aawa Abrahaamey, ba na7aa Yisaaqa yarsho bessa bolla wothida wode ba oosuwan xillibeennee?[c] 22 Iya ammanoynne iya oosoy issife oothidaysa be7ikii? Iya ammanoy iya oosuwan poletis. 23 Geeshsha Maxaafay, “Abrahaamey Xoossaa ammanis. Xoossay hessa iyaw xillotethi oothidi taybis” gidaysi poletis. Qassi I Xoossaa dabbo geetetidi xeegetis.[d] 24 Asi ammano xalaalan gidonashin, ooson xilleysa be7aasa.

25 Hessadaka, laymiya Ra7aaba Isra7eelepe kiitetidaysata mokada hara ogera enta moyzida wode ba oosuwan xillabeekee?[e]

26 Shempoy shaaketida asatethay hayqo gideysada, oosoy shaaketida ammanoyka hayqidaysa.

<- Yayqooba Kiita 1Yayqooba Kiita 3 ->