1 Goday taako, “Gita saleeda ekada, ‘Di7anaw ellesa! Bonqanaw dirga!’ yaagada nabbabetiya pidalen xaafa. 2 Kahiniya Urayanne Baraka na7aa Zakariyasa ammanetiya marka oothada taani xeegana” yaagis.

3 Hessafe guye, taani nabe gidida ta machera aqas; iya qanthatada adde na7a yelasu. Goday taako, “Iya suntha, ‘Mahaar-Shalal-Hash-Baaz’ yaagada xeega. 4 Na7ay, ‘Abbo, immo’ gidi xeessi eranaape sinthe Asoore kawoy, Damasqo duretethaanne Samaariya shaluwa ekidi baana” yaagis.

5 Qassika Goday taako haysada yaagis. 6 “Ha asay loddara goggiya Salihoome haatha ixidi, Razinanne Ramala na7aa ufaytidi ekidosona. 7 Hessa gisho, Goday minonne daro gidida Efraxiisa haatha, Asoore kawa, iya olanchotara ehana hanees. I haathi kixidi kumeysada gaxaa ubbaa ma7idi goggana. 8 Di77ishe Yihuda gelana; kixay qoodhe gakanaw kumidi yaara kanthana.” Abeeti Amanu7eela, iya qefiya micethay ne biitta ubbaa ma7is.

9 Hinteno kawotethato, issife olas shiiqite, shin hinte dhayana. Haaho biittan de7iya asato, si7ite; olas giigite; shin hinte liiqana! Ee, olas giigite; hinte wurana. 10 Xoossay nuura de7iya gisho, olas maqetite, shin hinte maqoy kanthenna; halchite, shin hinte halchoy halana.

11 “Goday ba mino kushiya ta bolla wothidi, ta ha asaa ogiyan boonna mela taw minthidi odis. 12 Ha asaa maqo ubbaa maqo goopite; enti yayyiyaba Yayyofite; dagammopite. 13 Hinte geeshshi gaanaw bessey Ubbaafe Wolqaama Godaa; iyaw yayyanawunne dagammanaw bessees. 14 I, geeshsha bessi gidana; shin Yihudasinne Isra7eeles I, dhube shuchinne kundisiya zaalla gidana. Yerusalaamen de7iya asaas I gitenne xihe gidana. 15 Entafe daroti dhubetana; kundidi me77ana; xihen oyketidi di7etana” yaagis.

16 Ta odeysa naaga; ta tamaareta giddon higgiya attama. 17 Taani ba som7uwa Yayqooba zerethafe genthiya Godaa naagana; iyan ammanetana.[a]

18 Tananne taw Goday immida nayta be7ite. Nuuni Xiyoone deriyan de7iya Ubbaafe Wolqaama Godaape Isra7eele asaas mallanne malaata.[b]

19 “Suyqishenne kalkashishe odiya marotanne moytilleta oychite” yaagidi hintena zoriya asay de7oosona. De7on de7eysatas hayqidaysata oycheysafe asay banta Xoossaa oychanaw bessennee? 20 Higgiyanne Godaa marka si7ite! He asati ha qaalada haasayonna ixiko entaw sa7i wontenna.

21 Asay waayetishenne koshatishe biitta bolla toylatana. Enti koshatida wode yilotidi, pude salo xeellidi banta kawanne banta Xoossaa baaddana. 22 Sa7aa duge xeelliya wode waaye, dhumanne yashshiya caagana be7ana; enti sakana dhuman holetana.

<- Isayaasa Maxaafa 7Isayaasa Maxaafa 9 ->