1 Tophe shaafatape hefinthan giiriya qefeti de7iya biitta ayye! 2 He biittay, kiitetiya asata mayre wogolon wothidi Nayle Shaafa bollara kiittees. Hinteno, eeson kiiteteysato, adusenne liiqo asaako, mataninne haahon yashshiya asaako, wolqaamanne xooniya kawotethaako, shaafan enta zaway shaaketida biittako biite.

3 Hinteno, sa7an de7iya ubbato, hinteno, biittan de7eysato, zumaa bolla malli eqiya wode hinte be7ana; moyzey punetiya wode hinte si7ana. 4 Goday taako, “Seeta gallas si77i gidi poo7iya awada, qassi kathi cakiya ageenan, hombiya qamman bentiya aka mela taani si77i gada, ta de7iya bessaafe duge xeellana” yaagis. 5 Kathaa cakiya wodiyape kase, ciishshay qoletidi simmin, woyne teeriya wode oco baacan xeera qanxeysada I he biitta asaa dhaysana. 6 Enti ubbay deriya huuphiyan de7iya, miyaba wochiya kafotasinne do7atas attana. Kafoti balgon, do7ati bonen enta midi shaacana.

7 He wode adussenne liiqo asaape, mataninne haahon yashshiya asaape, wolqaamanne xooniya kawotethaafe, zaway shaafan shaaketida biittafe, Ubbaafe Wolqaama Godaas imoti Xiyoone Zumaa, iya sunthay de7iya bessaa yaana.

<- Isayaasa Maxaafa 17Isayaasa Maxaafa 19 ->