5 Goday haysada yaagees; “Ta yiluwas pirconne ta hanquwas xam7a gidida Asoore biitta ayye![a] 6 Enta shaluwa di77anaadanne bonqanaada; oge urqada enta yedhanaada Xoosse eronna kawotethaa bolla taani Asoore kiittana; tana hanqethida asaa bolla iya yeddana. 7 Shin Asoore kawoy haysa halchibeenna; iya wozanay haysa qopibeenna. I qopiday daro kawotethata dhaysanaasa. 8 Hessa gisho, I yaagidi ceeqetees; ‘Ta toora moconati ubbay kawota gidokonaayee?’ 9 Kalinoy Karkamisha katamaa mela gidenneyee? Hamaati Arfada katamaa mela gidenneyee? Samaarey Damasqo katamaa mela gidenneyee? 10 Yerusalaameninne Samaaren de7iya eeqatape dariya eeqata goyinniya kawotethata seeranaw taani ta kushiya yeddas. 11 Taani Samaare katamaa bollanne iya eeqa misileta bolla oothidaysada Yerusalaame katamaa bollanne iya eeqa misileta bolla oothikinaayee?” yaagis.

12 Goday Xiyoone deriya bollanne Yerusalaame bolla ba oosuwa ubbaa polidaape guye, Asoore kawa iya otoruwasinne ceequwas iya seerana.

13 Asoore kawoy haysada yaagees: “Ta kushe minotethan, ta cincatethaaninne ta akeekan haysa oothas. Taani kawotethata giddon de7iya zawata shoddas; enta shaluwa bonqas; ta wolqan kawotethata araatape wodhisas. 14 Asi kafo keethan kushe yeddeysada taani kawotethaa shaluwan ta kushiya yeddas. Qassi dogetida phuuphuleta shiisheysada taani biitta ubbaa shiishas. Ba qefiya qaathiday woyko doona phuqiday woyko waassiday issoyka baawa” yaagis.

15 Kalti baara qanxiya addiya bolla dendanaw danda7ii? Woyko magaazey banan go7etiya addiya bolla otoranaw danda7ii? Kushey denthonna xam7i bana baw denthii? Guufey oykiya asi bayna baw hemetii? 16 Hessa gisho, Goday, Ubbaafe Wolqaama Xoossay, iya mino olanchota bolla gilqisiya harge yeddana. Iya bonchuwa laxo tami maana. 17 Isra7eele Poo7oy tama gidana; enta Geeshshay laco gidana. Iya agunthanne iya kinchotiya issi gallas xuuggananne maana. 18 Hargey ase gilqiseysada Goday ba wora mitha bonchuwanne ba aradda biitta bonchuwa dhaysana. 19 Woran attiya mithay daro guuthi gidiya gisho, hari attoshin guutha na7ika taybidi wursana.

20 He wode Isra7eelepenne Yihudape attida guuthati bantana shocidaysan gidonashin, tuma Godan, Isra7eele Geeshshan zempana. 21 Attida Yihuda asay Wolqaama Xoossaako simmana. 22 Neno Isra7eele, neeni abba gaxan de7iya shafiya mela darikoka, attida guuthata xalaali simmana. Xillotethi kumida dhayoy iya asaas awaajetis. 23 Ee, Goday, Ubbaafe Wolqaama Xoossay sa7a ubbaa bolla ehanaw qopida dhayuwa ehana.

24 Hessa gisho, Goday, Ubbaafe Wolqaama Xoossay haysada yaagees: “Xiyoonen de7iya ta asaw, Gibxeti oothidaysada Asooreti hintena xam7an shociya wodenne banta gumba hinte bolla denthiya wode yayyofite. 25 Guutha wodepe guye, taani hinte bolla hanqetidaysa aggana; hessafe guye, ta hanqoy enta dhaysanaw dendana” yaagees.

26 Ubbaafe Wolqaama Goday Oreeba shuchaa matan Midiyaameta shocidaysada enta lisson shocana. I Gibxen oothidaysada ba xam7a abba bolla denthana. 27 He gallas, iya toohoy hinte hashiyape wodhana; iya qambaray hinte morgefe kichana. Hinte ordida gisho qambaray meqana.

28 Morkiya wotaadarati Gaye katamaa gelidosona; Migroonara kanthidosona; banta ola miishiya Mikmaasa wothidosona. 29 Enti ogiyara kanthi aadhidi, Geeban aqidosona. Raman de7iya asay kokoridosona; Gib7an, kawa Saa7ola kataman de7iya asay baqatidosona. 30 Galima asaw, waaso goochite! Laysha asaw, si7ite! Anatoota asaw, oysha zaarite! 31 Madimana asay baqatidosona; Gebima asay banta shempuwas qosetidosona. 32 Morkiya wotaadarati hachi Nooban de7oosona; enti Xiyoone zuma bolla eqidi, banta kushiya qaathidi, Yerusalaame katamaa babisoosona.

33 Heko, Goday, Ubbaafe Wolqaama Xoossay, tasheta gita wolqan shaqana; aduqida mithati qanxetana; dhoqa gidaysati kawuyana. 34 Goday siketida wora kallotana gakanaw qanxana; Libaanosey Wolqaamaa sinthan kundana.

<- Isayaasa Maxaafa 9Isayaasa Maxaafa 11 ->