1 “Moyze punna! Enti ta caaquwanne ta higgiya menthida gisho, Godaa asaa bolla morkey ankoda aales. 2 Isra7eele asay, ‘Abeeti nu Xoossaw, nuuni nena eroos’ yaagidi taako waassoosona. 3 Shin Isra7eele asay lo77oba ixida gisho, morkey enta yedethana. 4 Enti tana oychonna bantaw kawota kawothidosona; ta eronna de7ishin bantaw halaqata dooridosona. Dhayanaw machidi eeqa misileta banta birapenne worqafe medhidosona. 5 Samaare asaw, hinte mari daanisidi medhida eeqa ta ixas; ta hanqoy hinte bolla eexis. Enti tunida mela awude gakanaw daanee? 6 Ha mara eeqa misiley kushe hiillan medhetisipe attishin, I xoosse gidenna. Samaare eeqa misiley meqeretana.

7 “Enti carko zeridi gote buucosona. Eqon de7iya enta kathaas ayfey bentenna; dhiilleyka baawa; ayfey de7ikoka allagati maana. 8 Isra7eele asay ha77i allaga asaa giddon mitetidosona; enti pathonna asi gididosona. 9 Enti baddo harey barka toylateysa mela toylatishe Asoore bidosona. Efreema asay banta miishiyan laggetho shammidosona. 10 Bantana maaddana mela miishen shammikoka ta enta shiishana. Kare biitta kawotinne halaqati entana un7ethin enti coo dhayana.

11 “Efreema asay nagara yarsho yarshiya daro bessata keexis, shin he yarsho bessati nagara oothiya bessi gididosona. 12 Taani entaw ta higgiyan darobaa xaafas, shin enti he higgiya allagabada xeellidosona. 13 Enti yarshanaw dosoosona; yarsho ashuwa moosona, shin Goday enta yarshuwa ekibeenna. I ha77i enta nagara hassayana; enta nagaraa gisho enta seerana; enti Gibxe biitta simmana. 14 Isra7eele asay bana Medhidaysa dogidi, kawo gadhota keexis. Yihuda asay gimbetida daro katamata keexis. Shin taani he katamatan tama yeddin, enta miixa maana” yaagees.

<- Hose Maxaafa 7Hose Maxaafa 9 ->