2 Goday zaaridi, “Woxiya addey nabbabana mela loche shucha bolla taani new qoncisiya qaala ordisada xaafa. 3 Qoncethay ba wodiya naagees; qoncethay poletiya wodey elle gakana; wordo gidenna. Gam7ikoka naaga; I tuma hanana; gam7enna.” 4 Heko, iya wozanay otortis; iya qofay suure gidenna; shin xilloy ba ammanuwan de7on daana. 5 Duretethi ase cimmees; ceeqetiya uraas shempoy baawa. I duufoda yaramba gidiya gishonne hayqoda kalli eronna gisho, kawotethata ubbaa baw shiishees; asa ubbaa baw di77ees.

6 Di7etida asay simmidi enta borishenne qelqisishe haysada yaagana: “Babaa gidonna miishe shiishidi dooreysanne bonqidi duretidaysata ayye! Haysi haysada hanidi, awude gakanaw daanee?” yaagana. 7 Neeni entafe bonqida asati ne akeekona ne bolla dendidi nena kokorsana. Hessafe guye, enti ne shaluwa ubbaa bonqana. 8 Neeni daro asa shaluwa bonqida gisho, entafe attidaysati ne shaluwa bonqana. Ne daro asa suuthaa gussadasa; sa7aa bolla, katamata bollanne yan de7iya asaa ubbaa bolla iita ooso oothadasa. 9 Metoy nena gakenna mela ne keethaa dhoqa bessan keexanaw geellatethan miishe shiishidayso nena ayye! 10 Daro asaa genada dhaysida gisho, ne soo asaa kawushadasa; neeni ne bolla dhayo ehadasa. 11 Hari attoshin ne keetha gimbe shuchay ne bolla waassana; keethaa tuuqeti waasuwa kooshummana. 12 Katamaa iitatethan baasidi asa suuthan keexeysato hintena ayye! 13 Asay oothiyaba ubbay tama kaho gidana mela, kawotethati daaburida ubbay hada gidana mela oothiday Ubbaafe Wolqaama Godaa gidennee? 14 Abbi haathan kumeysada sa7i Godaa bonchuwa eratethan kumana.

15 “Ba shooroy kallotin be7ana gidi, mathoyiya ushshi ushshiya uraa ayye! 16 Neeni boncho aggada kawushe ma77ana. Ha77i mathoy ne tara; ne uyada kallota. Godaa ushacha kushiyan de7iya xuu7ay new imetana; ne bonchoy yeellan laametana. 17 Ne Libaanose dhaysidaysada neka dhayana. Ne do7ata wursadasa, ha77i enti nena yashisana. Ne daro asaa suuthaa gussadasa; sa7a bolla, katamata bollanne iyan de7iya asa bolla iita ooso oothadasa.

18 “I baw eeqi ay maaddii? Iya asa kushen giigis gidennee? Wordofe attishin, iyan harabay bentenna. Yaatin, iya medhida uray ha aykoka odetonna eeqan ammaneteysi iya ay maaddanee? 19 Mithafe giigidaysa ‘Barka’ geyso, qassi shempoy bayna shuchaa ‘Denda’ geyso nena ayye! I wona new ay qoncisanaw danda7ii? Heko, worqaninne biran meeshetis; iyaw shempoy baawa.

20 “Shin Goday ba geeshsha keethaana. Hessa gisho, sa7an de7iya asa ubbay iya sinthan si77i go” yaagis.

<- Inbaqoome Maxaafa 1Inbaqoome Maxaafa 3 ->