1-2 Yoosefi ba ishatape ichashata dooridi Gibxe kawako gelidi haysada yaagis; “Ta aawaynne ta ishati, banta dorsa, banta deesha, banta mehiyanne bantaw de7iyaba ubbaa ekidi Kanaane biittafe yidi, ha7i Geesamen de7oosona” yaagis.

3 Kawoy he ishatako, “Hinte oosoy aybee?” yaagidi oychis.

Enti kawako, “Nuuni ne aylleti nu aawatada dorse haariya asata” yaagidi zaaridosona. 4 Qassika enti iyako, “Kanaane biittan koshi keyida gishonne nu mehiyas miyabay dhayda gisho, nuuni haysan daanaw yida. Hayyana, nuna ne aylleta Geesame biittan de7o garki” yaagidosona.

5 Kawoy Yoosefako, “Ne aawaynne ne ishati neeko yidosona. 6 Hiza Gibxe biittay ne kushena. Ha biittan ubbaafe aadhidi lo77iya bessan ne aawanne ne ishata wotha; enti Geesame biittan de7ona. Enta giddofe dumma qaratethi de7eysati de7iko, hessata ta mehiya bolla shuuma” yaagis.

7 Hessafe guye, Yoosefi ba aawa Yayqooba gelsidi, kawa sinthe aathis. Yayqoobi Gibxe kawa anjidaape guye, 8 Kawoy Yayqooba, “New aapun laythee?” yaagidi oychis.

9 Yayqoobi kawako, “Taani daabursan de7ida laythay xeetanne hastama. Ta laythay beni ta aawati daabursan de7ida laythafe guuthanne metoy darida laythi” yaagis. 10 Hessafe guye, Yayqoobi kawa anjidi, iya sinthafe kare keyis.

11 Yoosefi kawoy kiitidaysada ba aawanne ba ishata Gibxe biittan Ramse katama matan de7iya ubbaafe aadhida arada biittan enta wothis. 12 Yoosefi ba aawas, ba ishatasinne baara de7iya ubbaas enta nayta taybuwada kathi immis.

13 Biitta ubban koshi suullida gisho biittan ubban kathi baawa; Gibxeynne Kanaane biittay qohetidosona. 14 Yoosefi Gibxe katha bayzidi, Gibxeninne Kanaane biittatan de7iya miishiya ubbaa shiishidi Gibxe kawa keetha gelsis. 15 Gibxe miisheynne Kanaane miishey wurida wode Gibxe asa ubbay Yoosefako yidi “Nuus kathi imma. Nu miishey wurida gisho nuuni ne sinthan ayis koshan hayqanee?” yaagidosona.

16 Yoosefi entako, “Hinte mehiya eki yiite. Hinte miishey wuridaba gidiko, taani katha hinte mehiyara laammana” yaagis. 17 Hessa gisho, enti banta mehiya Yoosefas ehidosona. Yoosefi enta para, dorsa, deesha, miizanne hariya kathara laammis. I he laythi enta mehiya ubbara kathaa laammidi, enta muzidi shaachis.

18 Enti kaalliya laythan iyako yidi “Nuuni nu godaape qosiyabay baawa; nu miishey ubbay wuris. Nu mehiyaka new immi diggida. Nu bollafenne nu gadiyape attishin, nu godaas immanabay harabay baawa. 19 Nuuni ne be7ishin ayis koshan hayqanee? Nu gadeyka ayis dhayii? Nunaka nu gadiyaka shammada nuus kathi imma. Nuuni kawas aylletana, nu gadeyka iyabaa gido. Nuuni hayqonna attana mela nu gadeyka oxonna mela zerethi nuus imma” yaagidosona.

20 Yoosefi Gibxe biitta ubbaa kawas shammis. Koshi suullin, Gibxe asay un7etidi banta gadiya bayzin gadey kawuwaba gidis. 21 Yoosefi asa ubbaa Gibxes ha gaxape hini gaxa gakanaw kawas aylle oothis. 22 Shin kawoy kahinetas kathi immiya gisho Yoosefi enta gadiya shammibeenna. Hessa gisho, banta gadiya bayzibokona.

23 Yoosefi asaako, “Hiza hachi taani hintenanne hinte gadiya kawas shammida gisho, zerethi efidi hinte gaden zerite. 24 Shin kathaa shiishiya wode ayfidabape ichashu kushiyape issi kushiya kawas immite. Attida oyddu kushey hinte gadiyas zerethi, hintewunne hinte soo asaas kathi gido” yaagis.

25 Enti, “Neeni nuna ashshadasa. Nu godaa sinthan nuuni sabetiko, nuuni kawas aylletana” yaagidosona. 26 Hessa gisho, Yoosefi Gibxe biittan ayfidabape ichashu kushiyape issuwa kawas immeysa higge kessis. He wogayka hachi gakana eqidi de7ees. Kahineta gadiyape attishin, hari ubbay kawuwaba gidis.

27 Isra7eeleti Gibxe biittan Geesame giya bessan de7idosona. Enti yan duretidosona; yeleti daridosona.

28 Yayqoobi Gibxe biittan tammanne laapun laythi de7is. Yayqoobi de7ida laythay xeetanne oytamanne laapuna. 29 Isra7eeles hayqiya wodey matatin, ba na7aa Yoosefa xeegisidi haysada yaagis; “Taani ne sinthan sabetidaba gidiko, ne kushiya ta shempuwa bolla wotha. Neeni taw mishetiyaba gidiko tana Gibxen moogike gada taw caaqa. 30 Shin taani hayqiya wode tana Gibxefe efada, ta mayzati moogetidasuwan mooga” yaagis.

Yoosefi, “Taani, nena ne gidaysada oothana” yaagis.

31 Yayqoobi iyako, “Ane taw caaqa” yaagis. Yoosefi iyaw caaqis. Hessafe guye, Isra7eeley ba guufiya bolla katidi Xoossaa goyinnis.

<- Medhetetha Maxaafa 46Medhetetha Maxaafa 48 ->