1 Addaamey ba mache Hewaannira aqis. Iya qanthatada adde na7a yelasu. “Goday tana maaddin adde na7a demmas” gada Qaayela gada sunthasu. 2 Iya ishaa Aabela yelasu. Aabeli dorse heemmees qassi Qaayeli biitta oothees. 3 Undenna wodepe guye, Qaayeli ba gaden kaxida kathaafe Godaas yarsho yarshis. 4 Shin Aabeli ba dorsa wudiya giddon bayra yeletidaysa shukidi iya ashuwape modho bagga yarshis. Goday Aabelanne iya yarshuwa ekis. 5 Shin Qaayelanne iya yarshuwa ekibeenna. Hessa gisho, Qaayeli daro yilotis; iya som7oy dhumis.

6 Goday Qaayelako, “Ayis yilotay? Ne som7oy ayis dhumidee? 7 Neeni lo77o oothidaba gidiyako, ne som7oy pashka gidennee? Shin neeni lo77o oothonna ixiko, nagari do7ada ne pengen naagees. I nena haaranaw koyees, shin neeni iya xoonanaw bessees” yaagis.

8 Hessafe guye, Qaayeli ba ishaa Aabelako, “Ane demba bessi boos” yaagis. Enti demban de7ishin, Qaayeli ba ishaa Aabela bolla dendidi iya wodhis.

9 Goday Qaayela, “Ne ishay Aabeli awunee?” yaagidi oychis.

Qaayeli zaaridi, “Taani erike; ta isha naagey taneyee?” yaagis.

10 Goday Qaayela, “Haysa ayis oothadii? Heko, ne ishaa suuthay biittafe taako xillo pirdas waassees. 11 Neeni baadetidaba gidiya gisho biitta zaarada oothanaw danda7aka. Ne ishaa wodhadasa iya suuthaaka biittan gussadasa. 12 Neeni oothinka biittay new ayfena; bete asada neeni sa7a bolla toylattada daaburana” yaagis.

13 Qaayeli Godaako, “Ne ta bolla pirdida pirday ta wolqafe bolla. 14 Neeni tana hachi biittafe yedethaasa; ne sinthafeka haassasa. Bete asada taani sa7a bolla daaburana; tana demmiya oonika wodhana” yaagis.

15 Goday iya, “Nena oonika wodhenna; wodhiko, taani laapun toho halo keyana” yaagis. Hessa gisho, iya demmiya oonika wodhonna mela Goday iya bolla naagiso malla wothis. 16 Qaayeli Godaa sinthafe keyidi, Edene baggafe doloha baggan de7iya Nooda,[a] biittan de7is.

17 Qaayeli ba machera aqis; iya qanthatada Heenoke yelasu. He wode Qaayeli katama keexidi, he katama ba na7aa sunthan “Heenoke” gidi sunthis. 18 Heenokey Gayda yelis. Gaydi Ma7eela yelis. Ma7eeli Matusa7eela yelis. Matusa7eeli Laameha yelis.

19 Laamehi Adonne Siilo geetetiya nam7u macho ekis. 20 Ada Yabaala yelasu. Yaabali mehe haariyanne dunkaanen de7iya asata aawa. 21 Iya ishaa sunthay Yubaala. Yubaali qassi diithi diixeysatanne suusul7e punniya asata ubbaa aawa. 22 Siila qassi Tubalqayna geetetiya na7aa yelasu. Tubalqayni naase biratapenne biratape dumma dumma miisheta qoxeysata aawa. Tubalqayna michiya Na7imo.

23 Issi gallas Laamehi ba macheta, “Ade, Siile, si7ite; ta macheto, taani odiyaba hayzite. Issi pantha addey tana dechidi madunxisida gisho, taani iya wodhas. 24 Qaayela haluwa keyanaw laapun kushe koshshiko, Laameha haluwa keyanaw laapun tammanne laapun kushe koshshees” yaagis.

25 Addaame machiya hara adde na7aa yelasu. Yaatada, “Qaayeli wodhida Aabela gisho Xoossay taw hara na7a immis” gada iya Seeta[b] gada sunthasu. 26 Seeti adde na7a yelidi iya “Henoosa” gidi sunthis. Asay Godaa suntha xeegidi goyinno doomiday he wode.

<- Medhetetha Maxaafa 3Medhetetha Maxaafa 5 ->